ອຸບັດເຫດຮຸນແຮງ ໜ້າວັດຫລັກ 8 ຍ້ອນເບກລົດຄ້າງ ເຈົ້າຂອງລົດຍອມຮັບຜິດຊອບທັງໝົດ

ທ່ານ ພັຕ ສິນລະສອນ ຈັນທະວົງສາ ຫົວໜ້າກອງຮ້ອຍຈະລາຈອນເມືອງສີສັດຕະນາກ ໃຫ້ສຳພາດຕໍ່ວິທະຍຸກະຈາຍສຽງ ວັນທີ 6 ກຸມພາ 2023 ນີ້ວ່າ: ຕໍ່ກັບອຸບັດເຫດລົດໃຫຍ່ຕຳກັບລົດຈັກ ຢູ່ບໍລິເວນໜ້າວັດຫຼັກ 8 (ສາມແຍກເຂົ້າບ້ານຫາດຊາຍຂາວ) ເມືອງຫາດຊາຍຟອງ ນະຄອນຫຼວງວຽງຈັນ ວັນທີ 24 ມັງກອນ ທີ່ຜ່ານມານັ້ນ ເຈົ້າໜ້າທີ່ລົງໄດ້ໄປສະຖານທີ່ເກີດເຫດ ແລະ ເບິ່ງກ້ອງວົງຈອນບໍລິເວນດັ່ງກ່າວ ແລະ ເກັບກຳຂໍ້ມູນເຫດການໃນຄັ້ງນັ້ນ ເພື່ອນຳໄປເປັນຫລັກຖານໃນການສືບສວນສອບສວນ.
ຜ່ານການການສືບສວນ-ສອບສວນ ຈຶ່ງຮູ້ວ່າ ສາເຫດຂອງການເກີດອຸບັດເຫດໃນຄັ້ງນີ້ເປັນຍ້ອນເຕັກນິກຂອງລົດ ເຮັດໃຫ້ຄັນເລັ່ງຄ້າງ ແລ້ວເລັ່ງຄວາມໄວສູງ ໄປຕຳເອົາລົດຈັກ ແລະ ລົດໃຫຍ່ ແລ້ວເຮັດໃຫ້ເສຍຫລັກມາຕຳເອົາລົດຂົນສົ່ງນັກຮຽນ ແລະ ຕຳລົດຈັກອີກຄັນໜຶ່ງ ເຮັດໃຫ້ລົດເປ່ເພຫລາຍສົມຄວນທັງໝົດ 5 ຄັນ ແລະ ບາດເຈັບ 8 ຄົນ.
ໃນເບື້ອງຕົ້ນຜູ້ເປັນຕົ້ນເຫດໃນຄັ້ງນີ້ ຍອມຮັບຜິດ ແລະ ເປັນຄົນຮັບຜິດຊອບ ຕໍ່ຄວາມເສຍຫາຍທີ່ເກີດຂຶ້ນທັງໝົດ.