ເພື່ອນຮັກ ຫັກລ່ຽມໂຫດ ລົງມືຄາຕະກຳຫວັງຊີງເອົາເງິນ 70 ລ້ານໄປແຕ່ງເມຍ
ເຈົ້າໜ້າທີ່ ປກສ ແຂວງຄໍາມ່ວນ ຈັບຊາຍ ອາຍຸ 24 ປີ ທີ່ກໍ່ເຫດຄາດຕະກໍາ ເພື່ອປຸ້ນຊັບ ທ້າວ ຖາວອນ ຫຼື ເຢັ້ນລີ້ ໄດ້ເງິນຈໍານວນ 70 ກວ່າລ້ານກີບ. ຈາກນັ້ນ, ໄດ້ເອົາຕົວຫຼົບໜີ ແລະ ຖືກເຈົ້າໜ້າ ທີ່ຕິດຕາມຈັບຕົວໄດ້.
ເຈົ້າໜ້າທີ່ ປກສ ແຂວງຄຳມ່ວນ ໃຫ້ຮູ້ວ່າ: ໃນເວລາ 10:30 ໂມງ ຂອງວັນທີ 31 ມັງກອນ 2023, ເຈົ້າໜ້າທີ່ ໄດ້ຮັບລາຍງານຈາກ ປກສ ເມືອງມະຫາໄຊ ວ່າ: ເກີດເຫດການຄາດຕະກໍາ ແລະ ປຸ້ນຊັບ ທ້າວ ຖາວອນ ຫຼື ເຢັນລີ້ ອາຍຸ 38 ປີ ຄ້າຂາຍຢູ່ບ້ານໂພນສະອາດ ເມືອງ ມະຫາໄຊ ເຈົ້າໜ້າທີ່ລົງຊັນນະສູດຊາກສົບ ແລະ ເປີດເບິ່ງກ້ອງວົງຈອນປິດ ຈຶ່ງຮູ້ວ່າຜູ້ລົງມືກໍ່ເຫດຊື່ ທ້າວ ອຸດອນ ອາຍຸ 24 ປີຢູ່ບ້ານໜອງໂນ ເມືອງບົວລະພາ ເຈົ້າໜ້າທີ່ຈຶ່ງນໍາຈັບຕົວໄດ້ໃນເວລາປະມານ 17:00 ໂມງວັນດຽວກັນ.
ຜູ້ກໍ່ເຫດສາລະພາບວ່າ: ໄດ້ຮູ້ຈັກກັບ ທ້າວ ຖາວອນ ຫຼື ເຢັ້ນລີ້ (ຜູ້ເສຍຊີວິດ) ມາແຕ່ປີ 2020 ແລະ ພວກກ່ຽວກໍໄດ້ຕິດຕໍ່ພົວພັນ ມາຮອດໄລຍະໜຶ່ງທັງສອງຢຸດເຊົາຕິດຕໍ່ຫາກັນ; ຈົນມາຮອດເດືອນມັງກອນ 2023, ພວກກ່ຽວໄດ້ຕິດຕໍ່ພົວພັນກັນອີກ;ໃນວັນທີ 30 ມັງກອນ 2023, ທ້າວ ເຢັ້ນລີ້ ໄດ້ສົ່ງຂໍ້ຄວາມມາຖາມວ່າ ບໍ່ລົງມາຫຼິ້ນບຸນທາດເມືອງເກົ່າບໍ ແລະ ຜູ້ກ່ຽວ ຕອບວ່າ: ໄປເພາະຊິໄປຮັບເອົາແຟນມາແຕ່ປະເທດໄທ; ທ້າວ ເຢັ້ນລີ້ ບອກວ່າ ຖ້າລົງມາແລ້ວມາແວ່ຫຼິ້ນນໍາກ່ອນເດີ. ຕໍ່ມາເວລາ 13:00 ໂມງ ຂອງວັນດຽວກັນ, ທ້າວ ອຸດອນ ໄດ້ຂັບຂີ່ລົດຈັກ ເພື່ອໄປຮັບເອົາຜູ້ສາວມາແຕ່ປະທດໄທ; ພໍມາຮອດເມືອງມະຫາໄຊ ເວລາປະມານ 15:00 ໂມງຂອງວັນດຽວກັນ ໄດ້ແວ່ພັກຢູ່ຮ້ານ ຂອງ ທ້າວ ເຢັ້ນລີ້; ຕໍ່ມາເວລາ 18:00 ໂມງ ກໍພາກັນຍ່າງໄປກິນຊີ້ນດາດຢູ່ຮ້ານໃກ້ຄຽງ; ໃນຂະນະນັ້ນເຫັນມີຄົນມາໂອນເງິນນໍາ ທ້າວ ເຢັ້ນລີ້; ຈາກນັ້ນ, ຜູ້ກ່ຽວ ໄດ້ຖາມຢືມເງິນ ຈໍານວນ 70.000.000 ລ້ານ ຊິເອົາໄປແຕ່ງເມຍ ແລະ ທ້າວ ເຢັ້ນລີ້ ກໍຕອບວ່າ ເຈົ້າມີເງິນສົດບໍ່ສິໂອນໃຫ້ໂດຍບໍ່ຄິດໄລ່ເປີເຊັນ ແລະ ຜູ້ກ່ຽວກໍຕອບວ່າ ມີຢູ່ໃນກະເປົາ ແລະ ໃນເວລານັ່ງກິນຊີ້ນດາດຢູ່ນັ້ນ ກໍຫາວິທີວາງແຜນເອົາເງິນຈາກ ທ້າວ ເຢັ້ນລີ້ ຕະຫຼອດເວລາ.
ເວລາຕໍ່ມາປະມານ 20:00 ໂມງ ຂອງວັນທີ 30 ມັງກອນ 2023, ທ້າວ ເຢັ້ນລີ້ ກໍປິດຮ້ານ ແລະ ນັບເງິນຈໍານວນຫຼາຍໃສ່ຖົງສີດໍາ ເພື່ອ ນໍາໄປໄວ້ໃນຕູ້ເຊັບ ຈຶ່ງໄດ້ຄິດຫາວິທີຜິດຖຽງກັນ ເພື່ອເຮັດໃຫ້ ທ້າວ ເຢັ້ນລີ້ ລໍາຄານ ໂດຍການນໍາເອົາຢາສູບມາສູບ ແລະ ທ້າວ ເຢັ້ນລີ້ ໄດ້ບອກໃຫ້ຜູ້ກ່ຽວໄປນອນຢູ່ນອກ. ໃນເວລານັ້ນຜູ້ກ່ຽວກໍຄິດວ່າ ຖ້າຢາກໄດ້ເງິນ ແມ່ນຕ້ອງລົງມືຄາດຕະກໍາເທົ່ານັ້ນ ຈຶ່ງໄດ້ຍ່າງໄປຈັບເອົາສາກເຂົ້າເບືອຍາວປະມານ 30 ຊັງຕີແມັດ ມາເຊື່ອງໄວ້ຢູ່ຂ້າງໂຕະຄອມ; ໃນເວລາດຽວກັນ, ທ້າວ ເຢັ້ນລີ້ ຈັບມີດຄັດເຕີຊີ້ໜ້າ ພ້ອມທັງໂທລະສັບບອກຄົນໃຫ້ມາຫາຢູ່ຮ້ານ; ເມື່ອໄດ້ຍິນແນວນັ້ນຈຶ່ງໂດດໄປກັດຄໍ ທ້າວ ເຢັ້ນລີ້ ແລະ ປໍ້າລົງພື້ນພ້ອມທັງເອົາສາກເຂົ້າ ເບືອຕີຫົວບໍລິເວນຫົວ ທັງໝົດ 9 ບາດ ແຕ່ຍັງເຫັນວ່າ ທ້າວ ເຢັ້ນລີ້ ຍັງມີການເໜັງຕີງ ຈຶ່ງໄດ້ແກ້ເອົາເສື້ອແຂນສັ້ນຂອງຕົນ ມາມັດຄໍແລ້ວໃຊ້ເຂົ່າເບື້ອງຊ້າຍເຕັງໃສ່ ກ້ານຄໍ, ຕີນເບື້ອງຂວາຢຽບສົ້ນເສື້ອ ສ່ວນມືທັງສອງຂ້າງແມ່ນດຶງສົ້ນເສື້ອຢ່າງແຮງ ເພື່ອເຮັດໃຫ້ ທ້າວ ເຢັ້ນລີ້ ຂາດໃຈຕາຍພາຍໃນ 20 ນາທີ ແຕ່ບໍ່ຕາຍ ຈຶ່ງໄດ້ຍ່າງໄປຈັບເອົາມີດຢູ່ເຮືອນຄົວຍາວປະ ມານ 20 ຊັງຕີແມັດ ແລະ ກວ້າງປະມານ 4-5 ຊັງຕີແມັດ ມາປາດຄໍ 2 ບາດ ເຮັດ ໃຫ້ຫຼອດລົມຂາດ ແລະ ເສຍຊີວິດທັນທີ.
ຈາກນັ້ນ, ຜູ້ກ່ຽວກໍໄດ້ໄປອາບນໍ້າລ້າງຕົນຕົວ ພ້ອມທັງນໍາຜ້າແພມາເຊັດເລືອດ ແລະ ໄປຈັບເອົາເງິນຢູ່ຕູ້ເຊັບ, ລີ້ນຊັກຕູ້ ແລະ ມ້າງກ້ອງວົງຈອນປິດມາໄວ້ ເມື່ອໄດ້ ເຄື່ອງແລ້ວກໍຂັບຂີ່ລົດຈັກມຸ່ງໜ້າໄປທາງຫົວພູ. ພໍໄປຮອດຂົວນໍ້າຍົມ ກໍໄດ້ນໍາ ກ້ອງວົງ ຈອນປິດຖິ້ມລົງນໍ້າ ແລ້ວຂີ່ລົດ ກັບໄປບ້ານໜອງໂນ.
ຕໍ່ມາ, ເວລາ 10:00 ໂມງ ຈຶ່ງໄດ້ນໍາ ເງິນຈໍານວນດັ່ງກ່າວມານັບໄດ້ເງິນ 75.00.000 ກີບ, ເງິນບາດ 1.280 ບາດ, ໂທລະສັບ 2 ເຄື່ອງ ແລະ ແທັບເລັດ 1 ໜ່ວຍ. ຈາກນັ້ນ, ກໍຖືກເຈົ້າໜ້າທີ່ເຂົ້າຈັບຕົວໄປດຳເນີນຄະດີຕາມກົດໝາຍ.
