IMF ປັບຫຼຸດທ່າອ່ຽງການຂະຫຍາຍຕົວເສດຖະກິດອາຊຽນ ເຫຼືອ 4,7%.
February 2, 2023 - 5:23 PM
ຂ່າວຕ່າງປະເທດລາຍງານວ່າ: ວັນທີ 30 ມັງກອນ 2023 ຜ່ານມານີ ກອງທຶນເງິນຕາສາກົນ (IMF) ໄດ້ຄາດຄະເນການຂະຫຍາຍຕົວທາງດ້ານເສດຖະກິດຂອງ ກຸ່ມອາຊຽນ 5 ທີ່ປະກອບດ້ວຍ ສິງກະໂປ, ມາເລ ເຊຍ, ຫວຽດນາມ, ອິນໂດເນເຊຍ ແລະ ຟີລິບປິນ ຈະຂະຫຍາຍຕົວໃນລະດັບ 4,3% ໃນປີນີ້ ຫຼຸດລົງຈາກ 4,5% ຕາມການຄາດຄະເນເມື່ອເດືອນຕຸລາ ປີ 2022 ສ່ວນການຄາດຄະເນຂອງປີ 2024 ຫຼຸດລົງ 0,2% ເຫຼືອ 4,7%.
ຂະນະທີ່ການຄາດຄະເນການຂະຫຍາຍຕົວທາງດ້ານເສດຖະກິດໂດຍລວມສຳລັບ 10 ປະເທດສະມາຊິກອາຊຽນໃນປີນີ້ຢູ່ທີ່ 5,2% ສ່ວນເສດຖະກິດຂອງສິງກະໂປມີທ່າອ່ຽງຂະຫຍາຍຕົວ 1,5% ໃນປີນີ້ ຫຼຸດລົງຈາກ 2,3% ຕາມການຄາດຄະເນເມື່ອເດືອນຕຸລາ ປີ 2022.
ເຖິງຢ່າງໃດກໍຕາມ, IMF ຍັງໄດ້ກ່າວວ່າ ການແຕກກະຈາຍທາງດ້ານພູມສາດການເມືອງ, ທາງດ້ານເສດຖະກິດໂລກ ທີ່ຈະຂະຫຍາຍຕົວພຽງ 2,9% ໃນປີນີ້ ກ່ອນທີ່ຈະຂະຫຍາຍຕົວເປັນ 3,1% ໃນປີ 2024 ຖືວ່າເປັນທ່າອ່ຽງທາງລົບສຳລັບທຸກພາກສ່ວນ ແລະ ຈີນທີ່ຫາກໍເປີດປະເທດຢ່າງເປັນທາງການເມື່ອວັນທີ 8 ມັງກອນ ຜ່ານມາ ເຖິງແມ່ນວ່າ ເສດຖະກິດຂອງຫວຽດນາມໄດ້ຮັບຜົນປະໂຫຍດຈາກການເຄື່ອນຍ້າຍການສະໜອງຈາກຈີນ ສົ່ງຜົນໃຫ້ເສດຖະກິດຫວຽດນາມຂະຫຍາຍຕົວສູງເຖິງ 8% ເມື່ອປີທີ່ີຜ່ານມາ ອີກຢ່າງໜຶ່ງ, IMF ໄດ້ຄາດຄະເນທ່່າອ່ຽງຂອງເສດຖະກິດຫວຽດນາມໃນປີນີ້ໄວ້ທີ່ 5,8% ເນື່ອງຈາກພາວະເງິນເຟີ້.
