ຄ້າຍຄຸມຂັງຕານປ່ຽວປະກາດອະໄພຍະໂທດ ແລະ ຫລຸດຜ່ອນໂທດ 1.562 ຄົນ ທີ່ສ້າງຜົນງານປະຕິບັດຕົນດີ
ວາລະສານ ປ້ອງກັນຄວາມສະຫງົບ ລາຍງານວ່າ: ຄ້າຍຄຸມຂັງຕານປ່ຽວ ຈັດພິທີປະກາດອະໄພຍະໂທດ, ຫລຸດຜ່ອນໂທດ ແລະ ປ່ອຍຕົວນັກໂທດ ປະຈຳປີ 2023 ໃນວັນທີ 2 ກຸມພາ 2023 ນີ້, ໂດຍການເປັນປະທານຂອງ ພົຈວ ສົມລິດ ດາວຮຸ່ງສຸລິ ຫົວໜ້າກົມຕຳຫລວດຄຸມຂັງ-ດັດສ້າງ.
ໂດຍອີງຕາມລັດຖະດຳລັດສະບັບເລກທີ 206/ປປທ, ລົງວັນທີ 30 ພະຈິກ 2022 ວ່າດ້ວຍການໃຫ້ອະໄພຍະໂທດແກ່ນັກໂທດທີ່ມີຄວາມກ້າວໜ້າໃນຂອບເຂດທົ່ວປະເທດເນື່ອງໃນໂອກາດວັນຊາດທີ 2 ທັນວາ 2022 ຄົບຮອບ 47 ປີ. ມີນັກໂທດທີ່ໄດ້ຮັບອະໄພຍະໂທດຫລຸດຜ່ອນໂທດທັງໝົດ 1.562 ຄົນ, ຍິງ 226 ຄົນ, ຄົນຕ່າງປະເທດ 21 ຄົນ, ຍິງ 5 ຄົນ; ໃນນີ້ລວມມີການຫລຸດຜ່ອນໂທດໃຫ້ແກ່ນັກໂທດຕະຫລອດຊີວິດ ມາເປັນໂທດມີກຳນົດ 20 ປີ 39 ຄົນ, ຍິງ 10 ຄົນ, ຕ່າງປະເທດ 1 ຄົນ, ນັກໂທດທີ່ໄດ້ຮັບອະໄພຍະໂທດປ່ອຍຕົວ ທັງໝົດ 319 ຄົນ, ຍິງ 38 ຄົນ, ຕ່າງປະເທດ 2 ຄົນ, ຍິງ 1 ຄົນ. ສະເພາະນະຄອນຫລວງວຽງຈັນ ໄດ້ຮັບການອະໄພຍະໂທດປ່ອຍຕົວໃນຄັ້ງນີ້ 76 ຄົນ, ຍິງ 12 ຄົນ, ຕ່າງປະເທດ 1 ຄົນ, ຄ້າຍຄຸມຂັງຕານປ່ຽວ 53 ຄົນ, ຍິງ 10 ຄົນ, ຄ້າຍຄຸມຂັງໂພນຕ້ອງ 23 ຄົນ, ຍິງ 2 ຄົນ, ຕ່າງປະເທດ ຍິງ 1 ຄົນ.
ທ່ານ ຫົວໜ້າກົມຕຳຫລວດຄຸມຂັງ-ດັດສ້າງ ກ່າວວ່າ: ການໃຫ້ອະໄພຍະໂທດແກ່ນັກໂທດແມ່ນການປະຕິບັດນະໂນບາຍມະນຸດສະທໍາ ດ້ວຍການຫລຸດຜ່ອນໂທດ ແລະ ປ່ອຍຕົວນັກໂທດ ທີ່ໄດ້ກຳນົດໄວ້ໃນໝວດທີ VI ມາດຕາ 67 ຂໍ້ 12 ຂອງລັດຖະທຳມະນູນ ແຫ່ງ ສປປ ລາວ ສະບັບເລກທີ 63/ສພຊ, ລົງວັນທີ 08 ທັນວາ 2015 ກ່ຽວກັບການຕົກລົງໃຫ້ອະໄພຍະໂທດ ຕາມການສະເໜີຂອງລັດຖະບານ ເພື່ອສຶກສາອົບຮົມໃຫ້ນັກໂທດເຫັນໄດ້ແນວທາງນະໂຍບາຍອັນຖືກຕ້ອງເປັນທຳຂອງພັກ-ລັດ, ຕັ້ງໜ້າຝຶກຝົນຫລໍ່ຫລອມຕົນເອງ, ປະຕິບັດລະບຽບຂອງຄ້າຍຄຸມຂັງ-ດັດສ້າງ ແລະ ອອກແຮງງານດີມີການປ່ຽນແປງທາງດ້ານທັດສະນະແນວຄິດ, ມີຄວາມຮູ້ສຶກກິນແໜງຕໍ່ການກະທຳຜິດຂອງຕົນ, ກໍ່ສ້າງຕົນເອງກາຍເປັນຜົນລະເມືອງດີຂອງຊາດ, ປະກອບສ່ວນເຂົ້າໃນພາລະກິດປົກປັກຮັກສາ, ພັດທະນາປະເທດຊາດ ແລະ ເປັນການໂຄສະນາເຮັດໃຫ້ປະຊາຊົນລາວບັນດາເຜົ່າ ແລະ ສາກົນໄດ້ຮັບຮູ້-ເຂົ້າໃຈ ຕໍ່ນະໂຍບາຍອັນຖືກຕ້ອງເປັນທຳຂອງລັດຖະບານ ແຫ່ງ ສປປລາວ ດ້ານມະນຸດສະທຳ.
