ອົງການພາສີໂລກຍ້ອງຍໍ ໃຫ້ແກ່ເຈົ້າໜ້າທີ່ພາສີລາວ 20 ທ່ານ ທີ່ປະຕິບັດວຽກງານທີ່ພົ້ນເດັ່ນຕາມຄຳຂວັນປະຈຳປີ
ຂ່າວກະຊວງການເງິນ ລາຍງານໃຫ້ຮູ້ວ່າ: ວັນທີ 30 ມັງກອນ 2023 ຜ່ານມາ, ກົມພາສີ ກະຊວງການເງິນ ຈັດພິທີສະເຫຼີມສະຫຼອງວັນພາສີສາກົນ ປະຈໍາປີ 2023 ແລະ ມອບໃບຍ້ອງຍໍຈາກອົງການພາສີໂລກ (world Customs Organization certificate of Merits), ໂດຍການເປັນປະທານຂອງ ທ່ານ ພູເຂົາຄຳ ວັນນະວົງໄຊ, ຫົວໜ້າກົມພາສີ ກະຊວງການເງິນ, ພ້ອມດ້ວຍເຈົ້າໜ້າທີ່ພາສີ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຫົວໜ້າກົມພາສີ ໃຫ້ຮູ້ວ່າ: ການສະເຫຼີມສະຫຼອງວັນພາສີສາກົນຂອງກົມພາສີ ກໍເພື່ອສະແດງເຖິງການປະກອບສ່ວນຢ່າງຕັ້ງໜ້າຂອງກົມພາສີລາວ ຕໍ່ບັນດາວຽກງານອົງການພາສີໂລກ ໃນນາມເປັນສະມາຊິກຂອງອົງການພາສີໂລກ ແລະ ປີນີ້ຍິ່ງພິເສດ ເພາະເປັນການສະຫຼອງຄົບຮອບ 70 ປີ ຂອງອົງການພາສີໂລກ (WCO) ອົງການຈັດຕັ້ງທີ່ມີເອກະລັກສະເພາະ ເພື່ອການຮ່ວມມືສາກົນ ແລະ ແລກປ່ຽນຄວາມຮູ້ດ້ານວຽກງານພາສີ.
ໃນໂອກາດດັ່ງກ່າວ, ກໍໄດ້ມີພິທີມອບໃບຍ້ອງຍໍຈາກອົງການພາສີໂລກ ເນື່ອງໃນໂອກາດສະເຫຼີມສະຫຼອງວັນພາສີສາກົນ ປະຈຳປີ 2023 ໃຫ້ແກ່ເຈົ້າໜ້າທີ່ພາສີລາ ຈຳນວນ 20 ທ່ານ ທີ່ໄດ້ປະຕິບັດວຽກງານທີ່ພົ້ນເດັ່ນດ້ວຍຄຳຂວັນປະຈຳປີ ທີ່ອົງການພາສີໂລກໄດ້ກຳນົດຂຶ້ນ “ບຳລຸງສ້າງຄົນຮຸ່ນຕໍ່ໄປ, ຊຸກຍູ້ການແລກປ່ຽນຄວາມຮູ້ ແລະ ຄວາມພາກພູມໃຈໃນອາຊີບພາສີ” ເພື່ອເນັ້ນໜັກເຖິງການສ້າງຄວາມສະດວກໃຫ້ແກ່ການແລກປ່ຽນຄວາມຮູ້ ແລະ ເພີ່ມທະວີຄວາມພາກພູມໃຈໃນການເປັນສ່ວນໜຶ່ງຂອງລັດຖະການພາສີ ແລະ ຂອງປະຊາຄົມພາສີທົ່ວໂລກ.
