ເສັ້ນທາງເບຕົງຫລາຍເສັ້ນມີການແຕກແຫງຢູ່ຈຸດເຊື່ອມຕໍ່ ຖ້າສ້ອມແປງແຕ່ຫົວທີອາດປະຢັດງົບປະມານ
ເສັ້ນທາງຄົມມະນາຄົມຢູ່ນະຄອນຫລວງວຽງຈັນ ໄດ້ຮັບການພັດທະນາຍົກລະດັບໃຫ້ໄດ້ມາດຕະຖານ ໂດຍທົ່ວໄປເຮົາຈະເຫັນມີທາງປູຢາງ (ອັດສະຟານ) ແລະ ທາງທີ່ປູດ້ວຍເບຕົງ ນັບວ່າເປັນເລື່ອງທີ່ດີພາກລັດເຮົາໄດ້ເອົາໃຈໃສ່ພັດທະນາພື້ນຖານໂຄງລ່າງ ແລະ ອັນເປັນການສ້າງຄວາມສະດວກສະບາຍແກ່ການສັນຈອນໄປ-ມາ.
ເຖິງຢ່າງໃດກໍຕາມ ບໍ່ວ່າຈະເປັນທາງທີ່ປູດ້ວຍຢາງໝາກຕອຍ ຫລື ຢາງອັດສະຟານ ແລະ ທາງເບຕົງ ເມື່ອເປັນເວລາຫລາຍປີໄປມັກເກີດມີສະພາບຜຸພັງ, ເປັນຮອຍແຕກ ແລະ ເປ່ເພ ຢັງຢາຍຢູ່ຫລາຍຈຸດ ອາດເກີດມາຈາກອາຍຸການໃຊ້ການ, ການບັນທຸກນໍ້າໜັກເກີນຂະໜາດ ແລະ ການຮຸກຖູອື່ນໆ ຈາກຮອຍນ້ອຍໆກໍກາຍເປັນຮ່ອງຮອຍໃຫຍ່ ແຕກແຫງສ້າງຄວາມຫຍຸ້ງຍາກແກ່ການສັນຈອນ, ດີບໍ່ດີອາດສ່ຽງຕໍ່ການເກີດອຸບັດເຫດ ສ້າງຄວາມເສຍຫາຍແກ່ຊັບສິນ ແລະ ຊີວິດຜູ້ສັນຈອນຕື່ມກໍເປັນໄດ້.
ໃນໄລຍະຜ່ານມໍ່ໆມານີ້ ປະຊາຊົນຜູ້ສັນຈອນໄປມາໄດ້ສ່ອງແສງ ວ່າ ພົບຫລາຍເສັ້ນທາງໃນຕົວເມືອງນະຄອນຫລວງວຽງຈັນ ເລີ່ມມີຮອຍແຕກຈຸດເຊື່ອມຕໍ່ກັນຂອງທາງເບຕົງ ມີທັງເລີ່ມແຕກແຫງ ແລະ ແຕກແຫງມາກ່ອນແລ້ວ ເລີ່ມຂະຫຍາຍໃຫຍ່ຂຶ້ນກໍມີຫລາຍຈຸດ ເຊັ່ນ: ເສັ້ນທາງເບຕົງແຕ່ສີ່ແຍກຫໍປະຊຸມແຫ່ງຊາດມາຫາທາງໂຮງໝໍມິດຕະພາບ 150 ຕຽງ, ເສັ້ນທາງ ສີວິໄລ ຫາ ຄຳຮຸ່ງ-ດົງໂດກ, ຕານມີໄຊ-ດອນແດງ, ເສັ້ນທາງ 450 ປີ, ເສັ້ນທາງໂຮງໝໍ 103 ແລະ ເສັ້ນທາງອື່ນໆ…
ໃນທັດສະນະຂອງປະຊາຊົນທີ່ສ່ອງແສງ ແມ່ນຮຽກຮ້ອງໃຫ້ພາກສ່ວນກ່ຽວຂ້ອງລົງຕິດຕາມກວດກາສະພາບຕົວຈິງ ເພື່ອຫາວິທີທາງ ແກ້ໄຂສ້ອມແປງບັນຫາຈຸດແຕກແຫງເລັກໆນ້ອຍໆທີ່ພົບເຫັນນັ້ນຕັ້ງແຕ່ເລີ່ມຕົ້ນ ອາດຈະດີກວ່າປ່ອຍປະໄວ້ໃຫ້ເປ່ເພເປັນວົງກວ້າງ.
ທັງນີ້ທັງນັ້ນກໍເພື່ອເຮັດໃຫ້ໃຊ້ຈ່າຍງົບປະມານເຂົ້າໃນການສ້ອມແປງໜ້ອຍລົງ, ປະຢັດກວ່າ, ຜູ້ສັນຈອນໄປມາມີຄວາມປອດໄພ ແລະ ມີຄວາມເປັນລະບຽບຈົບງາມໃຫ້ແກ່ນະຄອນຫລວງວຽງຈັນ.
