ອາເມລິກາປະກາດກຽມຍົກເລີກສະຖານະການສຸກເສີນ ເພື່ອຮັບມືໂຄວິດ 11 ພຶດສະພານີ້
ປະທານາທິບໍດີ ໂຈ ໄບເດນ ຂອງອາເມລິກາ ປະກາດກຽມຍົກເລີກສະຖານະການສຸກເສີນເພື່ອຮັບມືໂຄວິດໃນວັນທີ 1 ພຶດສະພານີ້ ຫລັງປະກາດໃຊ້ມາເກືອບ 3 ປີ ນັບແຕ່ສະໄໝອະດີດປະທານາທິບໍດີ ໂດນັລ ທຣໍາ.
ໂດຍການປະກາດໃຊ້ສະຖານະການສຸກເສີນດັ່ງກ່າວເປີດໂອກາດໃຫ້ທາງການອາເມລິກາຮັບມືພະຍາດໂຄວິດໄດ້ຢ່າງມີປະສິດທິພາບຍິ່ງຂຶ້ນ. ອີກທັງຍັງເປີດໂອກາດໃຫ້ພົນລະເມືອງອາເມລິກາຫລາຍລ້ານຄົນເຂົ້າຮັບການກວດຫາເຊື້ອ, ເຂົ້າຮັບວັກຊີນ ແລະ ການປິ່ນປົວໄດ້ຟຣີໂດຍບໍ່ມີຄ່າໃຊ້ຈ່າຍ.
ຜ່ານມາລັດຖະບານອາເມລິກາ ໄດ້ຈ່າຍເງິນຄ່າວັກຊີນປ້ອງກັນໂຄວິດ ລວມທັງສະໜັບສະໜູນການວິໄຈ ແລະ ທົດລອງປະສິດທິພາບຂອງວັກຊີນປ້ອງກັນໂຄວິດ ລວມທັງການປິ່ນປົວ ພາຍໃຕ້ການປະກາດໃຊ້ສະຖານະການສຸກເສີນດັ່ງກ່າວ ໂດຍພາຍຫລັງປະກາດນີ້ສິ້ນສຸດລົງ ຄ່າໃຊ້ຈ່າຍເຫລົ່ານີ້ຈະຖືກໂອນຍ້າຍຢູ່ພາຍໃຕ້ຄວາມຮັບຜິດຊອບຂອງປະກັນເອກະຊົນ ແລະ ແຜນສຸຂະພາບຂອງລັດຖະບານແທນ.
ໂດຍລັດຖະບານອາເມລິກາ ເປີດເຜີຍວ່າ: ຕົວເລກຜູ້ຕິດເຊື້ອໂຄວິດພາຍໃນປະເທດມີທ່າອ່ຽງຫລຸດລົງຫລາຍ ເຖິງວ່າຍັງມີຜູ້ເສຍຊີວິດຈາກໂຄວິດຫລາຍກວ່າ 500 ຄົນຕໍ່ວັນກໍຕາມ. ຂະນະທີ່ຈໍານວນຜູ້ເສຍຊີວິດສະສົມຈາກໂຄວິດໃນອາເມລິກາສູງກວ່າ 1,1 ລ້ານຄົນນັບແຕ່ການແພ່ລະບາດໃນປີ 2020 ເປັນຕົ້ນມາ.
ອ້າງອີງ:
https://www.reuters.com/…/us-end-covid-19-emergency…/
https://apnews.com/…/biden-united-states-government…
https://www.voanews.com/…/biden-to-end…/6940954.html
