ບໍ່ຍອມແພ້! ເຊວຊີ ສະເໜີ 120 ລ້ານຢູໂຣ ຫວັງປິດ ເອນໂຊ ເຟີນັລເດສ ໂຄ້ງສຸດທ້າຍ

ເຊວຊີ ທີມດັງແຫ່ງ ພຣີເມຍລີກ ອັງກິດ ກຽມຍື່ນຂໍ້ສະເໜີ 120 ລ້ານເອີໂຣ ເພື່ອຫວັງໃຫ້ ເບນຟີກາ ປ່ອຍຕົວ ເອນໂຊ ເຟີນັລເດສ ກອງກາງແຊ້ມໂລກ ໃນຊ່ວງໂຄ້ງສຸດທ້າຍຂອງຕະຫລາດນັກເຕະເດືອນມັງກອນ.

ສິງໂຕນ້ຳເງິນຄາມ ໄດ້ສະແດງຄວາມສົນໃຈໃນກອງກາງຊາວອາເຈນຕິນາ ຢ່າງເປີດເຜີຍນັບຕັ້ງແຕ່ຈົບ ບານໂລກ 2022 ແລະ ເຄີຍໄດ້ຍື່ນຂໍ້ສະເຫນີໃຫ້ ລິສບອນ ແຕ່ຖືກປະຕິເສດ.

ຫລ້າສຸດ ຟາບຣິຊິໂອ ໂຣມາໂນ ນັກຂ່າວສື່ດັງຈາກຕ່າງປະເທດເປີດເຜີຍວ່າ ສະໂມສອນດັງໃນລອນດອນ ກຽມຍື່ນຂໍ້ສະເໜີຂະໜາດໃຫຍ່ເຖິງ 120 ລ້ານເອີໂຣ ເພື່ອຫວັງໂນ້ມນ້າວໃຈໃຫ້ທີມດັງຈາກລີກໂປຕຸເກດຍອມໃຈອ່ອນ.

ໂດຍປະທານ ຣຸຍ ຄອສຕ້າ ປະທານເບນຟິກາ ເຄີຍໃຫ້ສຳພາດວ່າລາວບໍ່ຕ້ອງການຂາຍ ເອນໂຊ ໃນລະດູການນີ້, ແຕ່ທາງ ເຊວຊີ ຫມັ້ນໃຈວ່າຈະປິດຂໍ້ຕົກລົງນີ້ໄດ້.