ສະໂມສອນ ດັບເບິນຢູໄອຈີ ນາຄາ ຫລື W.I.G NAGA ທີມນ້ອງໃໝ່ ຈາກ ສປປ ລາວ ເປີດຕົວການປະເດີມສະໜາມປີ 2023 ໄດ້ຢ່າງສວຍງາມ ດ້ວຍການຄວ້າແຊ໋ມ ເຕະບານເຍົາວະຊົນ 6 ຄົນ ຮຸ່ນອາຍຸບໍ່ເກີນ 9 ປີ ຫລື ຢູ-9 ຊີງແຊ໋ມພາກອີສານ ປະຈຳປີ 2023 ທີ່ແຂວງໜອງຄາຍ ປະເທດໄທ. ຂະນະທີ່ ອັນດັບທີ 2 ຕົກເປັນຂອງສະໂມສອນ ມາສດ້າ ຈີບີ ເອັບຊີ (Mazda GB FC) ຈາກສປປ ລາວ ເຊັ່ນກັນ.
ການແຂ່ງຂັນເຕະບານເຍົາວະຊົນ 6 ຄົນ ຢູ-9, ຢູ-11, ຢູ-13 ແລະ ຢູ-16 ຊີງແຊ໋ມພາກອີສານ ປະຈຳປີ 2023 ຈັດຂຶ້ນ 4 ອາທິດ ທີ່ແຂວງໜອງຄາຍ ປະເທດໄທ ຊຶ່ງອາທິດທຳອິດເລີ່ມແຂ່ງຂັນໃນວັນທີ 21 ມັງກອນ ຜ່ານມາ ມີບັນດາທີມທົ່ວພາກອີສານ ແລະ ບັນດາສະໂມສອນ ຈາກສປປ ລາວ ກໍຄື ນະຄອນຫລວງວຽງຈັນ ສົ່ງເຂົ້າຮ່ວມຊີງໄຊຫລາຍກວ່າ 94 ທີມ, ໃນນັ້ນ ຢູ-9 ມີ 16 ທີມ ແລະ ມີພຽງ 2 ສະໂມສອນ ຕາງໜ້າ ຈາກສປປ ລາວ ສົ່ງເຂົ້າຮ່ວມແຂ່ງຂັນ ປະກອບມີ ທີມ W.I.G NAGA ສົ່ງ 1 ທີມ ແລະ Mazda GB FC ສົ່ງ 2 ທີມ ກໍ່ຄື ທີມ ເອ ແລະ ທີມ ບີ. ນອກນັ້ນ, ກໍ່ຍັງມີ ສະໂມສອນ ໄຊເສດຖາ ອະຄາເດມີ ຈາກສປປ ລາວ ສົ່ງເຂົ້າຮ່ວມໃນຮຸ່ນອາຍຸ 11 ປີ.
ການແຂ່ງຂັນໃນຮຸ່ນອາຍຸ 9 ປີ ເປັນຮຸ່ນທຳອິດ ໃນການເປີດແຂ່ງຂັນລາຍການດັ່ງກ່າວ ໂດຍສະໂມສອນ W.I.G NAGA ແລະ Mazda GB FC ຈາກ ສປປ ລາວ ສົ່ງເຂົ້າຮ່ວມແຂ່ງຂັນ ແມ່ນສ້າງຜົນງານໄດ້ຢ່າງໂດດເດັ່ນ ສາມາດໄລ່ຖະຫລົ່ມຄູ່ແຂ່ງ ທີ່ເດີນທາງມາຈາກທົ່ວພາກອີສານຂອງໄທ ໄປແບບຂາດຮອຍ ກ່ອນທັງສອງທີມໄດ້ໂຄຈອນມາພົບກັນເອງໃນຮອບຊີງຊະນະເລີດ ແລະ ເປັນນັດທຳອິດ ທີ່ທັງສອງທີມໄດ້ມາພົບກັນອີກດ້ວຍ ຜ່ານການແຂ່ງຂັນຜົນປະກົດວ່າ ໃນເຄິ່ງເວລາທຳອິດ ເປັນ Mazda GB FC ແຊ໋ມລາຍການ ລາລີກາ ຈາກປະເທດມາເລເຊຍ ແລະ ແຊ໋ມຊົນແຊ໋ມຈາກແຂວງຊຽງຣາຍ ປະເທດໄທ 2022 ໄດ້ປະຕູອອກນຳໄປກ່ອນເຖິງ 2-0 ແຕ່ຫລັງຈາກນັ້ນ W.I.G NAGA ກໍຄອງບານ ແລະ ບຸກໜັກເຂົ້າໃສ່ ຈົນສາມາດຍິງແຊງ 3 ປະຕູລວດ ຊະນະ Mazda GB FC 3-2 ປະຕູ ຄອງແຊ໋ມລາຍການດັ່ງກ່າວໄປຄອງ ພ້ອມກັບລາງວັນດາວຊັນໂວອີກ 1 ລາງວັນຈາກທ້າວ ສຸພະໄຊ ຕາວັນ ທີ່ສາມາດເໝົາຍິງຄົນດຽວ 5 ປະຕູ ຈາກ 2 ນັດ ໃນຮອບ 4 ທີມ ແລະ ນັດຊີງຊະນະເລີດ ສ່ວນ Mazda GB FC ໄດ້ອັນດັບທີ 2.
ສ່ວນຜົນງານຂອງ ຢູ-11 ແຂ່ງຂັນໃນວັນທີ 22 ມັງກອນ 2022 ມີ 3 ສະໂມສອນສົ່ງເຂົ້າຮ່ວມ ກໍຄື W.I.G NAGA, Mazda GB FC ແລະ ໄຊເສດຖາ ອະຄາເດມີ ຈອດພຽງຮອບ 8 ທີມສຸດທ້າຍ ໂດຍ W.I.G NAGA ເສຍໃຫ້ທີມໄກ່ຈິວ A (ອະຄາເດມີຂອງ ໜອງບົວພິໄຊຢະ ທີມໃນໄທລີກ) ຂະນະທີ່ Mazda GB FC ເສຍໃຫ້ກັບ ທີມໄກຈິວ B ແລະ ໄຊເສດຖາ ແມ່ນຈົບທີ່ຮອບ 16 ທີມສຸດທ້າຍ. ແນວໃດກໍຕາມ, ໃນອາທິດຕໍ່ໄປ ກໍຍັງຈະສືບຕໍ່ແຂ່ງຂັນໃນຮຸ່ນອາຍຸ 13 ປີ ຊຶ່ງຈະມີບັນດາສະໂມສອນອ້ອມຂ້າງ ນະຄອນຫລວງ ສົ່ງເຂົ້າຮ່ວມຕື່ມອີກ.
