ປະທານສະຫະພັນຟຸດຊໍ ນວ ຄົນໃໝ່ ພ້ອມຈະພັດທະນາວົງການກິລາຟຸດຊໍໃຫ້ເຕີບໃຫຍ່ເຂັ້ມແຂງ

ທ່ານ ເສກສັນ ໄຊສະນັ່ນ ຫລື ຟຸກ ອະດີດຜູ້ຮັກສາປະຕູຟຸດຊໍ ທີມຊາດລາວ ທີ່ໄດ້ຮັບການແຕ່ງຕັ້ງໃຫ້ເປັນປະທານສະຫະພັນກິລາຟຸດຊໍ ນະຄອນຫລວງວຽງຈັນ ເມື່ອບໍ່ດົນມານີ້ ຢືນຢັນຈະສືບຕໍ່ພັດທະນາວົງການກິລາຟຸດຊໍ ນະຄອນຫລວງວຽງຈັນ ໃຫ້ເຕີບໃຫຍ່ເຂັ້ມແຂວງຂຶ້ນກວ່າເກົ່າ ພ້ອມທັງເລືອກເຟັ້ນນັກກິລາຜູ້ທີ່ມີຄວາມສາມາດ ກຽມຕາງໜ້າ ນວ ຮ່ວມແຂ່ງຂັນທັງພາຍໃນ ແລະ ຕ່າງປະເທດ ໃນອະນາຄົດ.

ຕາມການໃຫ້ສຳພາດຂອງທ່ານ ເສກສັນ ໄຊສະນັ່ນ ໃຫ້ຮູ້ວ່າ: ອີງຕາມຂໍ້ຕົກລົງຂອງທ່ານເຈົ້າຄອງນະຄອນຫລວງວຽງຈັນ, ສະບັບເລກທີ 732, ລົງວັນທີ 5 ກັນຍາ 2022 ວ່າດ້ວຍການແຕ່ງຕັ້ງຄະນະບໍລິຫານງານ ສະຫະພັນກິລາຟຸດຊໍ ນະຄອນຫລວງວຽງຈັນ ເພື່ອຈັດຕັ້ງປະຕິບັດວຽກງານ, ເສີມສ້າງບຸກຄະລາກອນ ແນໃສ່ພັດທະນາທັກສະຂອງນັກກິລາຟຸດຊໍ ໃນທົ່ວນະຄອນຫລວງວຽງຈັນ ເພື່ອກະກຽມເຂົ້າຮ່ວມການແຂ່ງຂັນ ທັງພາຍໃນ ແລະ ຕ່າງປະເທດ ສະນັ້ນ, ທ່ານເຈົ້າຄອງ ນວ ຈຶ່ງອອກຂໍ້ຕົກລົງສະບັບເລກທີ່ດັ່ງກ່າວ ເພື່ອແຕ່ງຕັ້ງຄະນະບໍລິຫານງານສະຫະພັນກິລາຟຸດຊໍ ນວ ຈຳນວນ 9 ທ່ານ ຄື: ແຕ່ງຕັ້ງ ທ່ານ ບຸນສົງ ນົນແກ້ວອິນທິຈັກ ຮອງຫົວໜ້າຂະແໜງກິລາລະດັບສູງ ເປັນທີ່ປຶກສາ ແລະ ແຕ່ງຕັ້ງ ທ່ານ ເສກສັນ ໄຊສະນັ່ນ ຜູ້ອຳນວຍການບໍລິສັດ ເສກສັນ ອໍກາໄນ & ບໍລິສັດຊາວະ ສະປອດ ເປັນປະທານສະຫະພັນກິລາຟຸດຊໍ ນວ. ນອກນັ້ນ ກໍຍັງມີ ທ່ານ ມິນຊອງ ໂຈ ຈາກສະຖາບັນການເງິນຈຸລະພາກອາຊຽນ ເປັນຮອງປະທານ ພ້ອມດ້ວຍຄະນະ ແລະ ເລຂາບໍລິຫານງານສະຫະພັນອີກ ຈຳນວນ 6 ທ່ານ.

ຢ່າງໃດກໍຕາມ, ສ່ວນຕົວແລ້ວ ກໍມີຄວາມຮູ້ສຶກພາກພູມໃຈ, ດີໃຈຫລາຍ ແລະ ເປັນກຽດຢ່າງສູງ ທີ່ໄດ້ຮັບພາລະບົດບາດໜ້າທີ່ ທີ່ສຳຄັນນີ້ ເຖິງຈະເປັນວຽກທີ່ໜັກໜ່ວງກໍຕາມ ແຕ່ເປັນໜ້າທີ່ ແລະ ຄວາມມັກຮັກໃນການຫລິ້ນກິລາຂອງ ຂ້າພະເຈົ້າ ຂໍໃຫ້ເຊື່ອໝັ້ນວ່າ ຈະພະຍາຍາມຢ່າງສຸດຄວາມສາມາດ ເພື່ອນຳພາກິລານີ້ ໃຫ້ມີການເຄື່ອນໄຫວຢ່າງເຕີບໃຫຍ່ເຂັ້ມແຂງຢ່າງບໍ່ຢຸດຢັ້ງ.