ບັນຫາລັກຊັບພົນລະເມືອງ ຢູ່ເມືອງໄຊເສດຖາ ນວ ຍັງພົ້ນເດັ່ນ ແລະ ຕ້ອງໄດ້ຮີບຮ້ອນແກ້ໄຂ

ອີງຕາມຄວາມສະຫງົບລາຍງານວ່າ: ໃນປີ 2022, ເມືອງໄຊເສດຖາ ນະຄອນຫລວງວຽງຈັນ ມີປະກົດການຫຍໍ້ທໍ້ເກີດຂຶ້ນທັງໝົດ 445 ເລື່ອງ, ສາມາດແກ້ໄດ້ 308 ເລື່ອງ, ໃນນັ້ນພົ້ນເດັ່ນກວ່າໝູ່ແມ່ນບັນຫາລັກຊັບພົນລະເມືອງເກີດຂຶ້ນ 191 ເລື່ອງ.

ທ່ານ ພັທ ອຸໄທ ແກ້ວປະເສີດ ຮອງຫົວໜ້າກອງບັນຊາການເມືອງໄຊເສດຖາ ນະຄອນຫລວງວຽງຈັນ ລາຍງານໃນກອງປະຊຸມສະຫລຸບວຽກປ້ອງກັນຄວາມສະຫງົບ ປະຈຳປີ 2022 ແລະ ທິດທາງແຜນການປີ 2023 ຂອງກອງບັນຊາການ ປກສ ເມືອງໄຊເສດຖາ ທີ່ຈັດຂຶ້ນໃນວັນທີ 27 ມັງກອນ 2023 ວ່າ:

ໃນ 1 ປີຜ່ານມາ, ມີປະກົດການຫຍໍ້ທໍ້ເກີດຂຶ້ນທັງໝົດ 445 ເລື່ອງ (ທຽບໃສ່ປີຜ່ານມາເພີ່ມຂຶ້ນ 61 ເລື່ອງ ເທົ່າກັບ 16%); ພົ້ນເດັ່ນແມ່ນລັກຊັບ 191 ເລື່ອງ, ສໍ້ໂກງຊັບພົນລະເມືອງ 26 ເລື່ອງ, ຍົກຍອກຊັບ 7 ເລື່ອງ, ຄຳຮ້ອງຟ້ອງ 172 ເລື່ອງ ແລະ ອື່ນໆ; ຈາກປະກົດການຫຍໍ້ທໍ້ ແລະ ຜົນເສຍຫາຍທີ່ເກີດຂຶ້ນ ກອງບັນຊາການ ປກສ ເມືອງໄຊເສດຖາ ໄດ້ເອົາໃຈໃສ່ສະກັດກັ້ນ ແລະ ແກ້ໄຂຢ່າງຕໍ່ເນື່ອງ ໂດຍໄດ້ນຳໃຊ້ກໍາລັງວິຊາສະເພາະສືບສວນ-ສອບສວນ, ສົມທົບກັບກຳລັງຫລາຍພາກສ່ວນ ພ້ອມກັນຈັດຕັ້ງແກ້ໄຂໄດ້ 308 ເລື່ອງ ( ເທົ່າກັບ 70%), ສາມາດກັກຕົວຜູ້ຖືກຫາໄດ້ 400 ຄົນ ຍິງ 29 ຄົນ, ລັກຊັບ 69 ເລື່ອງ, ກັກຕົວ 79 ຄົນ ຍິງ 5 ຄົນ, ສໍ້ໂກງຊັບ 26 ເລື່ອງ, ກັກຕົວ 26 ຄົນ ຍິງ 8 ຄົນ, ຍົກຍອກຊັບ 7 ເລື່ອງ, ກັກຕົວ 8 ຄົນ ຍິງ 3 ຄົນ, ແກ້ໄຂຄຳຮ້ອງຟ້ອງ ແລະ ຄະດີອື່ນໆ 206 ເລື່ອງ ກັກຕົວ 287 ຄົນ ຍິງ 13 ຄົນ ແລະ ສາມາດເກັບກູ້ເຄື່ອງຂອງກາງໄດ້ ລົດໃຫຍ່ 3 ຄັນ, ລົດຈັກ 41 ຄັນ, ເງິນກີບ 326.196.000 ກີບ, ເງິນບາດ 1.405.000 ບາດ, ເງິນໂດລາ 3.000 ໂດລາ ແລະ ຊັບສິນອື່ນໆອີກຈຳນວນໜຶ່ງ.

ການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ ສາມາດແກ້ໄຂຄະດີຢາເສບຕິດ 97 ເລື່ອງ, ກັກຕົວຜູ້ຖືກຫາ 238 ຄົນ ຍິງ 35 ຄົນ, ຂອງກາງຢາບ້າ 44.814 ເມັດ, ຢາໄອ 1,912 ກຣາມ, ເຮໂລອິນ 1 ແທ່ງ, ປືນສັ້ນ 2 ກະບອກ, ປືນ M16 1 ກະບອກ, ລູກກະສູນ 17 ລຸກ, ລົດໂຕໂຍຕ້າປາລາໂດ້ 1 ຄັນ, ລົດຈັກ 5 ຄັນ ແລະ ເຄື່ອງອື່ນໆຈຳນວນໜຶ່ງ; ໃນນີ້ດຳເນີນຄະດີ 50 ເລື່ອງ ຜູ້ຕ້ອງຫາ 88 ຄົນ ຍິງ 16 ຄົນ ແລະ ແກ້ເປົ້າໝາຍມີຢາເສບຕິດໄວ້ໃນຄອບຄອງ 11 ເລື່ອງ, ກັກຕົວ 24 ຄົນ ຍິງ 7 ຄົນ, ແກ້ເປົ້າໝາຍຄ້າ-ຂາຍຢາເສບຕິດ 39 ເລື່ອງ ກັກຕົວ 64 ຄົນ ຍິງ 9 ຄົນ, ມົ້ວສຸມເສບຢາເສບຕິດ 46 ເລື່ອງ, ກັກຕົວ 148 ຄົນ ຍິງ 19 ຄົນ (ສົ່ງສູນບຳບັດ) ແລະ ສົ່ງໃຫ້ພະແນກ 303 ດຳເນີນ 1 ເລື່ອງ, ຜູ້ຖືກຫາ 2 ຄົນ.