ໄວໜຸ່ມ 7 ຄົນ ສາຍປາຕີ້ມົວສຸ່ມສິ່ງເສບຕິດ ຖືກເຈົ້າໜ້າທີ່ ປກສ ເມືອງບໍລິຄັນ ກັກຕົວມາສຶກສາອົບຮົມ
ແຫລ່ງຂ່າວແຂວງບໍລິຄຳໄຊ ລາຍງານວ່າ: ວັນທີ 23 ມັງກອນ 2023 ເຈົ້າໜ້າທີ່ໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕໍາຫລວດ ປກສ ເມືອງບໍລິຄັນ ແຂວງບໍລິຄໍາໄຊ ໄດ້ສຶກສາອົບຮົມກ່າວເຕືອນໄວໜຸ່ມກຸ່ມມົ້ວສຸມເສບຢາເສບຕິດປະເພດ: ຢາເຄ (ຜົງຂາວ), ກາເຟ, ຢາສູບໄຟຟ້າບາລາກູ, ໄພລ໋ອດ ທັງໝົດ 7 ຄົນ, ຍິງ 3 ຄົນ.
ທ່ານ ພັຕ ສີສຸພັນ ລໍວັນໄຊ ຫົວໜ້າພະແນກຕໍາຫລວດ ປກສ ເມືອງ ບໍລິຄັນ ໃຫ້ຮູ້ວ່າ: ພາຍຫລັງທີ່ເຈົ້າໜ້າທີ່ວິຊາສະເພາະໜ່ວຍງານສະກັດກັ້ນ ແລະ ຕ້ານຢາເສບຕິດ ພະແນກຕໍາຫລວດ ປກສ ເມືອງບໍລິຄັນ ໄດ້ອອກລາດຕະເວນກວດກາຄວາມເປັນລະບຽບຮຽບຮ້ອຍຕາມຈຸດຕ່າງໆພາຍໃນເຂດຄວາມຮັບຜິດຊອບຕາມການມອບໝາຍໃນວັນທີ 19 ມັງກອນ 2023 ຈຶ່ງໄດ້ພົບເຫັນກຸ່ມໄວລຸ່ນຈໍານວນໜຶ່ງໄດ້ພາກັນມົ້ວສຸມເສບຢາເສບຕິດຢູ່ຮ້ານອາຫານ ຄາລາໂອເກະ ແຫ່ງໜຶ່ງ ບ້ານຫາດດອນຄູນ ເມືອງບໍລິຄັນ. ເຈົ້າໜ້າທີ່ຈຶ່ງໄດ້ລົງແກ້ໄຂມ້າງກຸ່ມເປົ້າຫນາຍທີ່ມົ້ວສຸມ. ຮອດເວລາ 23:30 ໂມງ ຂອງວັນດຽວກັນ ໄດ້ເຂົ້າທໍາການກວດຄົ້ນຫ້ອງຄາລາໂອເກະດັ່ງກ່າວພົບເຫັນກຸ່ມໄວໜຸ່ມ 7 ຄົນ, ຍິງ 3 ຄົນ, ກໍາລັງມົ້ວສຸມດື່ມເຫລົ້າ-ເບຍ ແລະ ເສບຢາເສບຕິດປະເພດຕ່າງໆທີ່ໄດ້ກວດພົບຢູ່ໃນສະຖານທີ່ພົບເຫັນຂອງກາງມີ: ຢາເຄ (ຜົງຂາວ) 3 ຫໍ່ນ້ອຍ, ກາເຟປະສົມສານເສບຕິດ 1 ຊອງ, ນໍ້າກາເຟທີ່ປະສົມແລ້ວເຄິ່ງແກ້ວນ້ອຍ, ຢາສູບໄຟຟ້າ ປະເພດ: ບາລາກູ 10 ລອດ, ໄພລ໋ອດ 6 ລອດ, ແລະ SNOWPLUS 1 ອັນ, ຈຶ່ງໄດ້ກັກຕົວພ້ອມກັບ ເຄື່ອງຂອງກາງຈໍານວນດັ່ງກ່າວມາກອງບັນຊາການ ປກສ ເມືອງເພື່ອດໍາເນີນການສືບສວນ-ສອບສວນຂະຫຍາຍຜົນ.
ພ້ອມນີ້, ທ່ານ ພັຕ ສີສຸພັນ ລໍວັນໄຊ ໄດ້ກ່າວເຕືອນພ້ອມທັງນໍາເອົາກົດໝາຍວ່າດ້ວຍຢາເສບຕິດມາເຜີຍແຜ່ໃຫ້ໄດ້ຮັບຮູ້ເຖິງຜົນຮ້າຍ ແລະ ໄພອັນຕະລາຍຂອງຢາເສບຕິດທຸກປະເພດ, ໂດຍສະເພາະການເສບຢາເຄ (ຜົງຂາວ), ກາເຟປະສົມສານເສບຕິດ, ຢາສູບໄຟຟ້າ ແລະ ໃຫ້ຢຸດເຊົາ ແລະ ຕໍ່ກັບຜູ້ໃດທີ່ບໍ່ສາມາດຢຸດເຊົາໄດ້, ກໍໄດ້ມອບໃຫ້ຜູ້ປົກຄອງນໍາໄປບໍາບັດຢູ່ສູນປິ່ນປົວ ແລະ ຟື້ນຟູສຸຂະພາບຜູ້ຕິດຢາເສບຕິດ. ສ່ວນບຸກຄົນທີ່ມີຢາເສບຕິດໄວ້ໃນຄອບຄອງເພື່ອຂາຍ ແລະ ເສບກໍໄດ້ດໍາເນີນຄະດີຕາມລະບຽບກົດໝາຍ. ສ່ວນເຈົ້າຂອງຮ້ານອາຫານ ຄາລາໂອເກະ, ເຈົ້າໜ້າທີ່ກໍໄດ້ສຶກສາອົບຮົມສ້າງບົດບັນທຶກກ່າວເຕືອນ ພ້ອມທັງໃຫ້ເອົາໃຈໃສ່ເປັນເຈົ້າການໃນການກວດກາຄຸ້ມຄອງຕິດຕາມສະກັດກັ້ນບໍ່ໃຫ້ມີເຫດການເກີດຂື້ນອີກ ແລະ ຊ່ວຍເປັນຫູເປັນຕາລາຍງານໃຫ້ເຈົ້າໜ້າທີ່ໄດ້ຮັບຮູ້ຫາກເກີດມີກໍລະນີດັ່ງກ່າວ ຫລືເຫັນວ່າຜູ້ມາບໍລິການຫາກເຄື່ອນໄຫວຜິດຕໍ່ລະບຽບກົດໝາຍ.
