ສື່ເຜີຍ ເມສຊີ່ ປ່ຽນໃຈອຳລາ ເປແອສເຊ ຫລັງຄວ້າແຊ້ມໂລກ, ມີ 1 ທີມສະເໜີຄວ້າໂຕ

ການເຄື່ອນໄຫວຂອງ ລີໂອເນວ ເມສຊີ່ ທີ່ຫາກໍ່ຄວ້າແຊັມບານໂລກ 2022 ກັບທີມຊາດອາເຈນຕິນາ ຢ່າງຍິ່ງໃຫຍ່ ໄດ້ກັບເຂົ້າມາແຂ່ງຂັນກັບຕົ້ນສັງກັດ ປາຣີ ແຊັງ-ແຊັກແມັງ ຕໍ່ເນື່ອງໂດຍຫລ້າສຸດອຸ່ນເຄື່ອງຊະນະ ຣິຢາດ ອໍສະຕາ ທີ່ມີ ຄຣິສເຕຍໂນ ໂຣນັລໂດ້ ຮ່ວມແຂ່ງຂັນຢ່າງສຸດມັນ 5-4.

ເມສຊີ່ ບ້າຍມາຮ່ວມທີມ ປາຣີ ແຊັງ-ແຊັກແມັງ ຈາກ ບາເຊໂລນາ ໃນປີ 2021 ໂດຍສັນຍາຈະໝົດລົງໃນຊ່ວງກາງປີນີ້ ແຕ່ກ່ອນໜ້ານີ້ມີຂ່າວວ່າ ກັບຕັນທີມຊາດອາເຈນຕິນາ ຍອມຮັບການຂະຫຍາຍສັນຍາໄປອີກ 1 ປີ ແບບປາກເປົ່າ.

ແຕ່ເມື່ອບໍ່ດົນມານີ້ ເຄີຣາດ ໂມເຣໂນ ນັກວິເຄາະຄົນດັງຂອງ ບາເຊໂລນາ ກັບສວນກະແສບອກວ່າ ເມສຊີ ປ່ຽນໃຈຫລັງຄວ້າແຊັມບານໂລກ 2022 ແລະ ຢາກຈະອອກຈາກຕົ້ນສັງກັດປັດຈຸບັນ ຖ້າການເຈລະຈາສັນຍາສະບັບໃໝ່ບໍ່ລຸລ່ວງ ບາເຊໂລນາ ອະດີດຕົ້ນສັງກັດຂອງລາວພ້ອມທີ່ຈະເດີນໜ້າທັນທີ ເຊັ່ນດຽວກັບທີມຍັກໃຫຍ່ຂອງໃນເອີຣົບອີກຫລາຍໆທີມ.