ເປີດໃຫ້ມວນຊົນໄປຊົມຊີມແລ້ວ!! ເທສະການອາຫານລາວ ກ້າວສູ່ສາກົນ ປະຈຳປີ 2023 ເລີ່ມວັນທີ 24-28 ມັງກອນ

ງານເທສະການອາຫານລາວ ປະຈຳປີ 2023 ພາຍໃຕ້ຄໍາຂວັນ: “ເທສະການອາຫານລາວ ກ້າວສູ່ສາກົນ (Promoting Lao Food to International recognition)” ໄດ້ເປີດຂຶ້ນຢ່າງເປັນທາງການແລ້ວ ໃນວັນທີ 24-28 ມັງກອນ 2023 ທີ່ສວນເຈົ້າອານຸວົງ ແຄມຂອງ ນະຄອນຫລວງວຽງຈັນ, ໂດຍການເຂົ້າຮ່ວມຂອງ ທ່ານ ນາງ ນາລີ ສີສຸລິດ ພັນລະຍາທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ, ທ່ານ ອິນລາວັນ ແກ້ວບຸນພັນ ປະທານສູນກາງສະຫະພັນແມ່ຍິງລາວ ແລະ ມີບັນດາທ່ານລັດຖະມົນຕີ, ຮອງລັດຖະມົນຕີເພດຍິງ ພ້ອມພາກສ່ວນກ່ຽວຂ້ອງເຂົ້າຮ່ວມ.

ທ່ານ ນາງ ຈັນທະຈອນ ວົງໄຊ ປະທານສະມາຄົມນັກທຸລະກິດແມ່ຍິງ, ປະທານຄະນະກໍາມະການຈັດງານເທສະການອາຫານລາວ ກ່າວວ່າ: ໃນທ່າມກາງທີ່ພັກລັດຖະບານພວມສະເຫລີມສະຫລອງຜົນສໍາເລັດໃນຫລາຍໆດ້ານ, ສັງຄົມມີການປ່ຽນແປງໄປໃນທາອ່ຽງຫັນໄປສູ່ການທ່ອງທ່ຽວ ເພື່ອກ້າວໄປສູ່ສາກົນ, ໃນນັ້ນກໍມີການອະນຸຮັກ ແລະ ສົ່ງເສີມວັດທະນະທໍາ, ຮີດຄອງການກິນຢູ່ແບບລາວໆ ແລະ ທຸກຂະແໜງການທີ່ປິ່ນອ້ອມໃຫ້ມີການເຊື່ອມໂຍງກັບການທ່ອງທ່ຽວເຊັ່ນດຽວກັນ, ເຊິ່ງມື້ນີ້ສູນກາງສະຫະພັນແມ່ຍິງລາວ ຮ່ວມກັບສະມາຄົມນັກທຸລະກິດແມ່ຍິງ ໄດ້ເປີດງານເທສະການອາຫານລາວປະຈໍາປີ 2023 ພາຍໃຕ້ຄໍາຂວັນ: “ເທສະການ ອາຫານລາວ ກ້າວສູ່ສາກົນ (Promoting Lao Food to International recognition)” ຂຶ້ນຢ່າງເປັນທາງການ ແລະ ຈະໄດ້ດໍາເນີນໄປເປັນເວລາ 5 ວັນເລີ່ມແຕ່ວັນທີ 24-28 ມັງກອນ 2023, ເວລາ 9:00-22:00 ໂມງຂອງທຸກວັນ. ໂດຍມີຈໍານວນຮ້ານຂາຍ 180 ຮ້ານ, ໃນນັ້ນມີຮ້ານອາຫານລາວ, ອາຫານປະຍຸກ, ອາຫານ ສາກົນ ແລະ ສິນຄ້າກະສິກໍາລວມ 162 ຮ້ານ, ເຄື່ອງຫັດຖະກໍາ 18 ຮ້ານ. ພ້ອມທັງຄາດວ່າຈະມີເງິນໝູນວຽນປະມານ 3-4 ຕື້ກີບ.

ທ່ານປະທານ ໃຫ້ຮູ້ຕື່ມວ່າ: ເພື່ອເປັນການສົ່ງເສີມວັດທະນະທໍາ, ຮີດຄອງປະເພນີກ່ຽວກັບອາຫານການກິນ, ການດໍາລົງຊີວິດແບບລາວໆໃຫ້ເຊື່ອມໂຢງກັບຍຸກສະໄໝກ້າວສູ່ສາກົນໄດ້ຢ່າງລົງຕົວ; ສືບຕໍ່ຊຸກຍູ້, ສົ່ງເສີມແມ່ຍິງຜູ້ຜະລິດ, ຜູ້ປູກຝັງ, ລ້ຽງສັດຜູ້ມີພອນສະຫວັນປຸງແຕ່ງອາຫານ, ຮ້ານຂາຍຍ່ອຍຈາກຕ່າງແຂວງ, ນະຄອນຫລວງວຽງຈັນມາວາງສະແດງ, ຂາຍ ແລະ ພັດທະນາຄຸນະພາບອາຫານໃຫ້ໄດ້ມາດຕະຖານ, ສາມາດຂະຫຍາຍການ ຄ້າຂາຍກ້າວໄປສູ່ການສັ່ງຈອງ, ການຈັດສົ່ງສິນຄ້າໃຫ້ທົ່ວເຖິງສັງຄົມອັນກວ້າງໄດ້ຢ່າງຄ່ອງຕົວ; ປຸກລະດົມຜູ້ປະກອບການແມ່ຍິງ ໃນການຜະລິດເປັນສິນຄ້າທີ່ມີຄຸນນະພາບໃຫ້ສາມາດສ້າງເຄືອຂ່າຍການຄ້າຢ່າງ ກວ້າງຂວາງໃນຂອບເຂດທົ່ວປະເທດ, ແລະອອກສູ່ສາກົນເທື່ອລະກ້າວ ໂດຍສະເພາະງານ Word Expo Tokyo 2025 ທີ່ຈະມາເຖິງນີ້ ແລະ ພິເສດປີນີ້ຈະໄດ້ຈັດໃຫ້ມີການແຂ່ງຂັນເຂົ້າສັງຂະຫຍາເຂົ້າເພື່ອຕຽມຜະລິດໃຫ້ເປັນສິນຄ້າ ຫລືຂອງຝາກທີ່ສາມາດສົ່ງໄປຈໍາໜ່າຍໃນຮ້ານຄ້າທັງພາຍໃນແລະ ຕ່າງປະເທດ.

ນອກນີ້, ພາຍໃນງານຍັງມີກິດຈະກຳໂຄສະນາສິນຄ້າຂອງບໍລິສັດ, ທະນາຄານ ທີ່ສະໜັບສະໜູນງານເທສະການ, ໂດຍຈັດຕັ້ງໝູນວຽນກັນຂຶ້ນເວທີກາງ ເພື່ອໂຄສະນາເລີ່ມຈາກຫລັງທ່ຽງຫາຕອນບ່າຍ ຂອງທຸກໆວັນ; ຈັດໃຫ້ມີຮ້ານອາຫານລາວເອກະລັກຈາກ 18 ແຂວງ ໄວ້ຄອຍບໍລິການແຂກທີ່ມາທ່ຽວງານສາມາດຊີມ, ຊື້ ແລະ ສັ່ງຈອງຊື້ໄດ້ທາງອິນເຕີເນັດ; ມີການຈັດຕັ້ງແຂ່ງຂັນປຸງແຕ່ງເຂົ້າສັງຂະຫຍາ (ປະເພດຂອງຫວານທີ່ເປັນເອກະລັກ ພື້ນເມືອງຂອງລາວ); ມີນັກຮ້ອງຮັບເຊີນບັນເລງເພງກ່ອມອາຫານແລງເປັນປະຈໍາທຸກແລງ.