ບຸນມະໂຫລານກາເຟ-ຊາ ແລະ ຜົນຜະລິດກະສິກຳພູພຽງບໍລະເວນ ຈະຈັດຂຶ້ນຕົ້ນເດືອນໜ້າ

ແຫລ່ງຂ່າວຈາກແຂວງຈໍາປາສັກ ລາຍງານວ່າ: ບຸນມະໂຫລານກາເຟ-ຊາພູພຽງບໍລະເວນ ແລະ ຜົນຜະ ລິດກະສິກຳ ປະຈຳປີ 2023 ຈະຈັດຂຶ້ນຢ່າງຫຍິ່ງໃຫຍ່ຢູ່ເມືອງປາກຊ່ອງດິນແດນພູໄຟເກົ່າຖິ່ນກຳເນີດກາ ເຟລາວ ໃນວັນທີ 2-4 ກຸມພາ 2023. ຂະນະທີ່ຫົວໜ້າພະແນກອຸດສາຫະກໍາ ແລະ ການຄ້າແຂວງຈຳປາສັກ ເປີດເຜີຍວ່າ: ນີ້ຄືການຊຸກຍູ້ສົົ່ງເສີມການຜະລິດເປັນສິນຄ້າຢູ່ພາຍໃນໃຫ້ເຂັ້ມແຂງທັງເປັນການສືບຕໍ່ຜັນຂະຫຍາຍໂຄງການງານບຸນກາເຟ-ຊາພູພຽງບໍລະເວນແຕ່ລະປີຕິດພັນກັບການສົົ່ງເສີມການຕະຫລາດໃຫ້ເປັນລະບົບຕໍ່ເນື່ອງ ແລະ ກາຍເປັນບຸນປະເພນີຂອງ. ພ້ອມນີ້, ຍັງເປັນການໂຄສະນາເຄື່ອງໝາຍການຄ້າກາເຟແຂວງ, ພັດທະນາກາເຟຄຸນນະພາບສູງ, ປະກອບສ່ວນຍົກລະດັບຄຸນຄ່າ ແລະ ຢັັ້ງຢືນເຖິງຖານະບົດບາດກາເຟລາວກໍຄືຂອງແຂວງບົນເວທີຕະຫລາດໂລກ.

ທ່ານ ບຸນຍະເດດ ທອງສະຫວັນ ຫົວໜ້າພະແນກອຸດສາຫະກໍາ ແລະ ການຄ້າແຂວງຈຳປາສັກ ກ່າວອີກວ່າ: ມາຮອດປັດຈຸບັນມີຄວາມພ້ອມເປັນສ່ວນຫລາຍແລ້ວໂດຍການວາງສະແດງສິນຄ້າ ແລະ ພິທີເປີດ ບຸນມະໂຫລານກາເຟ-ຊາ ຈະຈັດຂຶ້ນທີ່ຕະຫລາດສະບາຍດີປາກຊ່ອງຫລັງໃໝ່ 3 ວັນ ເລີ່ມວັນທີ 2 ຫາວັນທີ 4 ກຸມພາ 2023 ແລະ ຄາດວ່າຈະມີ 30 ຫົວໜ່ວຍທຸລະກິດເຂົ້າຮ່ວມວາງສະແດງ ແລະ ຈໍາໜ່າຍສິນຄ້າໃນ 50 ຫ້ອງ ຄື ຫົວໜ່ວຍກຸ່ມຜູ່ຜະລິດ, ສະຫະກອນກາເຟ-ຊາ, ບໍລິສັດເກັບຊື້ ແລະ ສົົ່ງອອກກາ ເຟ,ສະມະຄົມກາເຟລາວ, ສະມາມະຄົມຫັດຖະກໍາ, ໂຮງງານອຸດສາຫະກໍາປຸງແຕ່ງ, ທະນາຄານທຸລະກິດ, ທຸລະກິດຈໍາໜ່າຍພະຫານະ, ກຸ່ມຜະລິດສິນຄ້າ ໂອດັອບ- ຫັດຖະກໍາ ແລະ ທຸລະກິດ ຊື້-ຂາຍຜະລິດຕະພັນກາເຟ ອື່ນໆອີກ.

ສໍາລັບການສໍາມະນາ ຈະຈັດຂຶ້ນໃນວັນທີ 3 ກຸມພາ 2023 ຢູ່ໂຮງແຮມປາກຊ່ອງແດນງາມ ໂດຍຈະມີຜູ້ແທນຈາກອົງການຈັດຕັ້ງສາກົນ, ຜູ້ຊ່ຽວຊານທີ່ມີປະສົບການດ້ານສົ່ງເສີມການຄ້າ ແລະ ການລົງທຶນ, ສະພາການຄ້າ ແລະ ອຸດສາຫະກໍາແຫ່ງຊາດ, ສາມະຄົມກາເຟລາວ, ສະຫະກອນຊາ, ນັກທຸລະກິດ ແລະ ພາກສ່ວນອື່ນໆ 30 ພາກສ່ວນເຂົ້າຮ່ວມໃນ 5 ຫົວຂໍ້ຄືການຊຸກຍູ້ ແລະ ສົ່ງເສີມການຜະລິດກະສິກໍາເປັນສິນຄ້າ; ການເຊື່ອມໂຍງດ້ານການຄ້າ, ການຕະຫລາດ, ແລະ ມາດຕະຖານສິນຄ້າ; ຂະບວນການຜະລິດ ແລະ ທິດທາງຕະຫລາດກາເຟສູ່ສາກົນ; ແຜນການຮັບມືກັບການປ່ຽນແປງສະພາບດິນຟ້າອາກາດເຂດເມືອງປາກຊ່ອງ; ຂະບວນການຜະລິດຊາ ແລະ ທິດທາງຈຳໜ່າຍສູ່ຕະຫລາດສາກົນ.