ທ່ານ ຄຣິສ ຮິບກິນ ຮັບຕຳແໜ່ງນາຍົກລັດຖະມົນຕີນິວຊີແລນຄົນທີ 41 ກຽມເຂົ້າພິທີສາບານຕົນວັນທີ 25 ມັງກອນນີ້
ວັນທີ 22 ມັງກອນ, ພັກເລເບີ ເຊິ່ງເປັນພັກລັດຖະບານຂອງນິວຊີແລນ ລົງມະຕິເລືອກທ່ານ ຄຣິສ ຮິບກິນ ອະດີດລັດຖະມົນຕີຜູ້ຮັບຜິດຊອບດ້ານການຮັບມືໂຄວິດ ຂຶ້ນເປັນຫົວໜ້າພັກຄົນໃໝ່ ແລະ ເປັນນາຍົກລັດຖະມົນຕີຄົນທີ 41 ຂອງປະເທດ ຮັບໜ້າທີ່ຕໍ່ຈາກທ່ານ ນາງ ຈາຊິນດາ ອາຣ໌ເດິນ ທີ່ປະກາດລາອອກຈາກຕຳແໜ່ງໃນອາທິດຜ່ານມາ.
ທັງນີ້, ທ່ານ ຮິບກິນ ອາຍຸ 44 ປີ ເປັນຄົນດຽວທີ່ຖືກສະເໜີຊື່ເຂົ້າຊີງຕໍາແໜ່ງຫົວໜ້າພັກເລເບີ ໂດຍປັດຈຸບັນທ່ານດໍາລົງຕໍາແໜ່ງລັດຖະມົນຕີກະຊວງການສຶກສາ, ຕໍາຫລວດ ແລະ ບໍລິການສາທາລະນະ.
ພ້ອມກັນນີ້, ທ່ານ ຮິບກິນ ຍັງກ່າວວ່າ: “ນາງ ອາຣ໌ເດິນ ເປັນໜຶ່ງໃນນາຍົກລັດຖະມົນຕີດີທີ່ສຸດເທົ່າທີ່ນິວຊີແລນເຄີຍມີມາ ລວມທັງເປັນບຸກຄົນທີ່ໄດ້ສ້າງແຮງບັນດານໃຈໃຫ້ຜູ້ຍິງ ແລະ ເດັກຍິງອີກຈໍານວນຫລາຍ.
ຂະນະດຽວກັນ, ທ່ານຍັງໄດ້ກ່າວເຖິງແຮງກົດດັນດ້ານເພດທີ່ນາງ ອາຣ໌ເດິນ ຜະເຊີນລະຫວ່າງດໍາລົງຕໍາແໜ່ງວ່າ: “ເຮົາມີວິທີຈະສ້າງຫລັກປະກັນວ່າ ຜູ້ຍິງທີ່ເປັນຜູ້ນໍາຈະໄດ້ຮັບຄວາມເຄົາລົບນັບຖື ບໍ່ແຕກຕ່າງຈາກເພດຊາຍ”.
ທ່ານ ຮິບກິນ ມີກໍານົດເຂົ້າພິທີສາບານຕົນຮັບຕໍາແໜ່ງນາຍົກລັດຖະມົນຕີໃນວັນທີ 25 ມັງກອນ ໂດຍວັນທີ 23 ມັງກອນ, ທ່ານໄດ້ໃຫ້ສໍາພາດຕໍ່ສື່ມວນຊົນວ່າ: ລັດຖະບານພາຍໃຕ້ການບໍລິຫານຂອງທ່ານຈະເນັ້ນແກ້ໄຂບັນຫາຫລັກໆຂອງນິວຊີແລນ ລວມທັງບັນຫາເງິນເຟີ້ ແລະ ວາງແຜນຈະຄວບຄຸມນະໂຍບາຍອື່ນໆ ແຕ່ຍັງບໍ່ໄດ້ມີການລົງລາຍລະອຽດທີ່ແນ່ນອນ.
ອ້າງອີງ:
https://www.reuters.com/…/nz-labour-lawmakers-meet…/
https://www.reuters.com/…/new-zealands-incoming-pm…/
https://www.aljazeera.com/…/chris-hipkins-confirmed-as…
