ຂ່າວຫລ້າສຸດ! ສາມາດເຮັດສຳມະໂນຄົວ ແລະ ບັດປະຈຳຕົວໄດ້ແລ້ວ ທົ່ວປະເທດ

ວັນທີ 16 ມັງກອນ 2023 ນີ້ ກົມຄຸ້ມຄອງສໍາມະໂນຄົວ ແລະ ກໍສ້າງຮາກຖານ ອອກແຈ້ງການເຖິງ ຫົວຫນ້າກອງບັນຊາການ ປກສ ນະຄອນຫຼວງວຽງຈັນ, ບັນດາກອງບັນຊາການ ປກສ ແຂວງ ໃນຂອບເຂດທົ່ວປະເທດ ຮັບຊາບວ່າ: ປັດຈຸບັນ ການປັບປຸງ ສ້ອມແປງລະບົບ (PIM) ແລະ ລະບົບໄຟຟ້າສໍາຮອງ ຢູ່ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ແມ່ນໄດ້ທໍາການສ້ອມແປງລະບົບສໍາເລັດ ແລະ ດໍາເນີນການນໍາໃຊ້ງານໄດ້ເປັນປົກກະຕິແລ້ວ ລາຍລະອຽດດັ່ງນີ້:

1. ໃຫ້ກອງບັນຊາການ ປກສ ນະຄອນຫຼວງວຽງຈັນ, ບັນດາກອງບັນຊາການ ປກສ ແຂວງ ໃນຂອບເຂດທົ່ວ ປະເທດ ຊີ້ນໍາຫ້ອງຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ, ກອງບັນຊາການ ປກສ ເມືອງ ທີ່ຂຶ້ນກັບຄວາມ ຮັບຜິດຊອບຂອງຕົນ ເປີດໃຫ້ບໍລິການຟິມປື້ມສໍາມະໂນຄົວ ແລະ ອອກບັດປະຈໍາຕົວ, ໃຫ້ພໍ່ແມ່ປະຊາຊົນລາວບັນດາເຜົ່າ, ພະນັກງານ, ທະຫານ, ຕໍາຫຼວດ ຢູ່ໃນຂອບເທດທົ່ວປະເທດ, ເລີ່ມແຕ່ວັນທີ 18 ມັງກອນ 2023 ເປັນຕົ້ນໄປ.
2. ໃຫ້ເລີ່ມປ້ອນຂໍ້ມູນປະຊາຊົນລາວຜູ້ທີ່ມີອາຍຸ 15 ປີຂຶ້ນໄປ ເຂົ້າສູ່ລະບົບ (PIM) ເພື່ອອອກບັດປະຈໍາຕົວປະຊາຊົນ.
3. ແຈ້ງການສະບັບນີ້ແມ່ນໃຊ້ແທນແຈ້ງການ ສະບັບເລກທີ 5297/ຄກ, ລົງວັນທີ 13 ກັນຍາ 2022 ຫາກແຈ້ງການສະບັບໃດທີ່ຂັດກັບສະບັບນີ້ລ້ວນແລ້ວແມ່ນຖືກລົບລ້າງ.

ດັ່ງນັ້ນ, ກົມຄຸ້ມຄອງສໍາມະໂນຄົວ ແລະ ກໍ່ສ້າງຮາກຖານ ຈຶ່ງແຈ້ງມາຍັງທ່ານ ຫົວຫນ້າກອງບັນຊາການ ປກສ ນະຄອນຫຼວງວຽງຈັນ, ກອງບັນຊາການ ປກສ ແຂວງ ໃນຂອບເຂດທົ່ວປະເທດ ເພື່ອຮັບຊາບ ແລະ ຈັດຕັ້ງປະຕິບັດ ຕາມແຈ້ງການສະບັບນີ້ດ້ວຍ.