ໄລຍະ 1 ປີ ມີຜູ້ລັກໃຊ້ໄຟຟ້າຫລາຍກວ່າ 100 ຄະດີ ຖືກປັບໃໝ່ຫລາຍສິບຕື້ກີບ
ທ່ານ ຈັນທະບູນ ສຸກອາລຸນ, ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ລາຍງານໃນໂອກາດລາຍງານຢູ່ກອງປະຊຸມກ່ຽວກັບການດຳເນີນທຸລະກິດຂອງລັດວິສາຫະກິດໄຟຟ້າລາວ ຈັດຂຶ້ນໃນວັນທີ 16 ມັງກອນ 2023 ນີ້ວ່າ: ການລັກໃຊ້ໄຟຟ້າ ແມ່ນບັນຫາທີ່ບໍ່ໄດ້ເກີດຂຶ້ນສະ ເພາະຢູ່ແຕ່ປະເທດເຮົາ ແຕ່ຢູ່ຕ່າງປະເທດກໍເກີດຂຶ້ນຫລາຍສົມຄວນ !
ສະເພາະຢູ່ລາວເຮົາ ໄລຍະຜ່ານມາພະລັງ ງານໄຟຟ້າຕົກເຮ່ຍນອກລະບົບ ແມ່ນບັນຫາໜຶ່ງທີ່ສ້າງຄວາມເສຍຫາຍໃຫ້ແກ່ລັດວິສາຫະກິດໄຟຟ້າລາວ, ໜຶ່ງໃນນັ້ນແມ່ນບັນຫາການລັກໃຊ້ໄຟຟ້າໂດຍບໍ່ຈ່າຍເງິນ ໄດ້ສ້າງຄວາມເສຍຫາຍຈໍານວນບໍ່ໜ້ອຍ ເຮັດໃຫ້ມາຮອດປັດຈຸບັນ ສາມາດຈັບຜູ້ລັກລອບໃຊ້ໄຟຟ້າໄດ້ຫລາຍກວ່າ 100 ຄະດີ, ສັ່ງຟ້ອງສານຕັດສິນໄປແລ້ວ 2 ຄະດີ ໃນຖານຄວາມຜິດໂທດອາຍາຖືກຕັດອິດສະພາບ 6 ເດືອນ, ແຕ່ສານໄດ້ພິຈາລະນາແລ້ວໃຫ້ລໍລົງອາຍາ ຫລື ພາກໂທດໄວ້ ຖ້າເຮັດຜິດຄັ້ງທີສອງຈິ່ງເຂົ້າຄຸກ.
ລັດວິສາຫະກິດໄຟຟ້າລາວ ໄດ້ພະຍາຍາມຢ່າງສຸດຄວາມສາມາດເພື່ອແກ້ໄຂບັນຫາການລັກໃຊ້ໄຟຟ້າໂດຍບໍ່ຈ່າຍເງິນ, ໃນນີ້ ລວມເຖິງການໃຫ້ລາງວັນແກ່ຜູ້ທີ່ໃຫ້ຂໍ້ມູນ ຫລື ເບາະແສກ່ຽວກັບການລັກໃຊ້ໄຟຟ້າ ໂດຍໄດ້ກໍານົດວ່າ: ເມື່ອຈັບຜູ້ລັກໃຊ້ໄຟຟ້າໄດ້ແລະມີການປັບໃໝໃນວົງເງິນບໍ່ເກີນ 1 ລ້ານກີບ, ເງິນດັ່ງກ່າວແມ່ນມອບໃຫ້ຜູ້ແຈ້ງຂໍ້ມູນໝົດເລີຍ ຫລື ໃຫ້ 100%, ຖ້າວົງເງິນປັບໃໝບໍ່ເກີນ 10 ລ້ານກີບ ແມ່ນມອບໃຫ້ຜູ້ໃຫ້ຂໍ້ມູນປະມານ 75% ຫລື ຖ້າວົງເງິນປັບໃໝຫລາຍກວ່າ 10 ລ້ານກີບ ແມ່ນຈະມອບໃຫ້ຜູ້ໃຫ້ຂໍ້ມູນ 50%. ໃນໄລຍະຜ່ານມາ ລັດວິສາຫະກິດໄຟຟ້າລາວ ໄດ້ປັບໃໝຜູ້ລັກໃຊ້ໄຟຟ້າໂດຍບໍ່ຈ່າຍເງິນໄດ້ຫລາຍສິບຕື້ກີບ ເພາະນີ້ຖືເປັນມາດຕະການສໍາຄັນໜຶ່ງເພື່ອແກ້ບັນຫາການລັກໃຊ້ໄຟຟ້າທີ່ເກີດຂຶ້ນໃນປະເທດເຮົາໃຫ້ນັບມື້ຫລຸດລົງ.
