ທາງການຈີນກ່າວວ່າ ໂຄວິດລະບາດພົ້ນຈຸດສູງສຸດແລ້ວ ແຕ່ຕ້ອງຕິດຕາມການເດີນທາງໄລຍະກຸດຈີນນີ້

ວັນທີ 19 ມັງກອນ, ທາງການຈີນເປີດເຜີຍວ່າ: ຈີນໄດ້ຜ່ານພົ້ນຈຸດສູງສຸດຂອງການແພ່ລະບາດຂອງໂຄວິດແລ້ວ ໂດຍປັດຈຸບັນອັດຕາການຕິດເຊື້ອຢູ່ໃນລະດັບຕໍ່າ. ເຖິງຢ່າງໃດກໍຕາມ, ການທີ່ປະຊາຊົນຈຳນວນຫລາຍເດີນທາງກັບບ້ານເກີດເມືອງນອນໃນໄລຍະເທດສະການກຸດຈີນຖືເປັນສະຖານະການທີ່ຫລາຍຝ່າຍກຳລັງຕິດຕາມ ເນື່ອງຈາກກັງວົນວ່າຈະເຮັດໃຫ້ຈຳນວນການຕິດເຊື້ອກັບມາເພີ່ມສູງຂຶ້ນອີກທົ່ວປະເທດ.

ທ່ານ ຊຸນຊຸນຫລານ (Sun Chunlan) ຮອງນາຍົກລັດຖະມົນຕີ ແລະ ຜູ້ເບິ່ງແຍງດ້ານການຮັບມືໂຄວິດຂອງຈີນ ກ່າວວ່າ: ປັດຈຸບັນການລະບາດຢູ່ໃນລະດັບຂ້ອນຂ້າງຕໍ່າ ເຊິ່ງສອດຄ່ອງກັບຂໍ້ມູນຈາກເຈົ້າໜ້າທີ່ສາທາລະນະສຸກທີ່ເປີດເຜີຍກ່ອນໜ້ານີ້ວ່າ: ຈຳນວນຜູ້ຕິດເຊື້ອໂຄວິດໃນຄລີນິກ, ຫ້ອງສຸກເສີນ ແລະ ຫໍພັກຜູ້ຕິດເຊື້ອວິກິດ ໄດ້ຜ່ານພົ້ນຈຸດສູງສຸດແລ້ວ.

ເຖິງຢ່າງໃດກໍຕາມ, ການປະກາດດັ່ງກ່າວມີຂຶ້ນກ່ອນຈະເຂົ້າສູ່ເທດສະການກຸດຈີນໃນທ້າຍອາທິດນີ້ ເຊິ່ງມີຄວາມເປັນໄປໄດ້ວ່າການທີ່ປະຊາຊົນຈຳນວນມະຫາສານຈະເດີນທາງກັບບ້ານເກີດຂອງຕົນເອງນັ້ນອາດເຮັດໃຫ້ຈຳນວນການຕິດເຊື້ອກັບມາເພີ່ມສູງຂຶ້ນໄດ້ອີກຮອບ ໂດຍກະຊວງການຄົມມະນາຄົມຄາດຄະເນວ່າ: ໃນລະຫວ່າງວັນທີ 7 ມັງກອນ ຈົນຮອດວັນທີ 15 ກຸມພາ ຈະມີການເດີນທາງສັນຈອນໃນຈີນສູງເຖິງ 2,1 ພັນລ້ານຄັ້ງ.

ສ່ວນໜ່ວຍງານເບິ່ງແຍງອິນເຕີເນັດຂອງຈີນ ກ່າວໃນອາທິດນີ້ວ່າ: ທາງການຈະເຊັນເຊີ “ຂໍ້ມູນປອມ” ກ່ຽວກັບການແພ່ລະບາດຂອງໄວຣັສ ເຊິ່ງຈະສ້າງບັນຍາກາດທີ່ບໍດີໃນໄລຍະເທດສະການກຸດຈີນນີ້.

ກ່ອນໜ້ານີ້, ປະທານປະເທດ ສີຈິ້ນຜິງ ໄດ້ອອກມາສະແດງຄວາມກັງວົນກ່ຽວກັບກໍລະນີປະຊາຊົນ ແລະ ນັກທ່ອງທ່ຽວເດີນທາງໄປພື້ນທີ່ຊົນນະບົດ ເຊິ່ງມີລະບົບສາທາລະນະສຸກອ່ອນແອ. ພ້ອມເນັ້ນວ່າ: ຕ້ອງປົກປ້ອງເບິ່ງແຍງຜູ້ສູງອາຍຸໃຫ້ດີ ເນື່ອງຈາກຍັງມີກຸ່ມຄົນສູງອາຍຸຈຳນວນຫລາຍຍັງສັກວັກຊີນບໍ່ຄົບໂດສ ອີກທັງຍັງເນັ້ນໜັກໃຫ້ເຈົ້າໜ້າທີ່ທ້ອງຖິ່ນເບິ່ງແຍງປ້ອງກັນການແພ່ລະບາດຢ່າງເຕັມທີ່.

ອ້າງອີງ:

https://www.reuters.com/…/china-says-covid-outbreak…/