“ກິນມໍ່າໆ ໂດຍບໍ່ຄຳເບິ່ງທ້ອງ” ສຳນວນພາສາ ທີ່ບອກພຶດຕິກຳການສໍ້ລາດບັງຫລວງ

ປີເກົ່າ 2022 ຜ່ານພົ້ນໄປ ຊຶ່ງມີຫລາຍອັນທີ່ພວກເຮົາເຮັດໄດ້, ສາມາດຮັບປະກັນໃຫ້ປະເທດມີສະຖຽນລະພາບດ້ານການເມືອງ, ເສດຖະກິດຂະຫຍາຍຕົວຕໍ່ເນື່ອງ ແລະ ສັງຄົມມີຄວາມສະຫງົບສຸກ, ປະຊາຊົນຍູທ່າງທຳມາຫາກິນ ແລະ ຊີວິດການເປັນຢູ່ໄດ້ຮັບການປັບປຸງດີຂຶ້ນເປັນລຳດັບ, ໄປໃສມາໃສກໍໄດ້ຮັບການຍົກຍ້ອງເຮັດໃຫ້ຊື່ສຽງ ຖານະບົດບາດຂອງລາວນັບມື້ພົ້ນເດັ່ນຂຶ້ນໃນພາກພື້ນ ແລະ ສາກົນ, ແຕ່ຄຽງຄູ່ກັບຜົນສຳເລັດຍັງມີຫາງສຽງວິພາກວິຈານກັນຫລາຍກາຍເປັນປາກົດການຫຍໍ້ທໍ້ໜັກໜ່ວງໜຶ່ງທີ່ພວກເຮົາຈະໄດ້ພ້ອມກັນແກ້ໄຂເພື່ອເຮັດແນວໃດປີໃໝ່ນີ້ຢ່າໃຫ້ມີສິ່ງທີ່ບໍ່ຂາວສະອາດ.

ຫລາຍທ່ານຄົງເຂົ້າໃຈສໍານວນຄໍາເວົ້າ ຫລື ຄວາມ ຫລື ວະລີກໍວ່າ ຊຶ່ງແຕ່ລະສຳນວນຄຳເວົ້າທີ່ກັ່ນກອງ ອອກມາລ້ວນມີຄວາມໝາຍທາງສັງຄົມຢ່າງຫລວງຫລາຍມີທັງເປັນການບອກສອນລູກຫລານກໍຄືຄົນໃນສັງ ຄົມ, ມີທັງລັກສະນະຕໍ່ແຍແກ້ຄວາມກັນລະຫວ່າງບ່າວ-ສາວ ມີທັງລັກສະນະສຽດສີຊົນຊັ້ນ ແລະ ອື່ນໆດັ່ງສໍານວນ “ກິນມໍ່າໆ ບໍ່ຄໍາເບິ່ງທ້ອງ”.

ຄໍາພ້ອງຄວາມໝາຍ ແລະ ສໍານວນພາສາລາວຕາມວັດຈະນານຸກົມໂດຍສະຖາບັນວິທະຍາສາດແຫ່ງຊາດທີ່ພິມເມື່ອປີ 2012 ຊຶ່ງ “ກິນມໍ່າໆບໍ່ຄໍາເບິ່ງທ້ອງ” ເປັນອີກສໍານວນທີ່ມີຄວາມໝາຍວ່າ ເອົາແຕ່ເລື່ອງກິນເປັນໃຫຍ່, ກິນຢ່າງບໍ່ຢຸດໂດຍບໍ່ຄໍານຶງເຖິງທ້ອງຕົນວ່າຈະຮັບໄດ້ ຫລື ບໍ່? ຂະນະດຽວກັນກໍມີຄວາມໝາຍແຝງວ່າ ເຫັນແຕ່ການກອບໂກຍ ໂດຍບໍ່ສໍານຶກວ່າ ຜົນຮ້າຍຈະຕາມມາແນວໃດ.

ໃນຄວາມເປັນຈິງ, ຄຳວ່າ: ການກິນມໍ່າໆ ສາມາດປຽບທຽບໃສ່ກັບການກອບໂກຍ, ສໍ້ລາດແບບວ່າບໍ່ມີຍາມພໍ ກໍບໍ່ຜິດ.

ຂະນະທີ່ຄໍາວ່າ “ບໍ່ຄໍາເບິ່ງທ້ອງ” ໝາຍເຖິງການບໍ່ຄິດເຖິງຜົນຮ້າຍທີ່ຈະເກີດຂຶ້ນຕໍ່ຕົນເອງ ຫລື ຕໍ່ສ່ວນລວມໃນພາຍພາກໜ້າ ແລະ ສໍານວນນີ້ອາດຈະມີຄວາມໝາຍພຽງເພື່ອສັ່ງສອນໃຫ້ລະມັດລະວັງການກິນບໍ່ໃຫ້ມີພິດໄພຕໍ່ຕົນເອງຄືກິນ ຕ້ອງຄໍານຶງເຖິງບ່ອນຮັບຄືທ້ອງ.