ໄມໂຄຣຊັອບ ຢືນຢັນເລີກຈ້າງພະນັກງານ 10.000 ຄົນ ຍ້ອນເສດຖະກິດໂລກຂະຫຍາຍຕົວຊ້າ

ໄມໂຄຣຊັອບ ໜຶ່ງໃນບໍລິສັດເຕັກໂນໂລຊີຍັກໃຫຍ່ຂອງໂລກຈາກອາເມລິກາ ປະກາດແຜນປົດພະນັກງານ 10.000 ຄົນ ເປັນໄປຕາມລາຍງານທີ່ອອກມາກ່ອນໜ້ານີ້ ໂດຍໃຫ້ເຫດຜົນກ່ຽວກັບສະພາບເສດຖະກິດໂລກຂະຫຍາຍຕົວຊ້າ.

ວັນທີ 19 ມັງກອນ, ສໍານັກຂ່າວຕ່າງປະເທດລາຍງານວ່າ: ບໍລິສັດໄມໂຄຣຊັອບເຜີຍແພ່ຖະແຫລງການຂອງທ່ານ ສັດຢາ ນາເດລລາ ປະທານຄະນະເຈົ້າໜ້າທີ່ບໍລິຫານ (CEO) ກ່ຽວກັບການເລີກຈ້າງພະນັກງານປະມານ 10.000 ຄົນ ໂດຍການດໍາເນີນງານດັ່ງກ່າວຈະເລີ່ມໃນໄຕມາດສອງຂອງປີນີ້.

ທັງນີ້, ທ່ານ ນາເດລລາ ໃຫ້ເຫດຜົນກ່ຽວກັບສະຖານະການເສດຖະກິດໂລກທີ່ຈະຍັງຢູ່ໃນສະພາບອ່ອນແອ ແລະ ເປັນໄລຍະຂາລົງໄປອີກຫລາຍປີ ສຳລັບອຸດສາຫະກຳເຕັກໂນໂລຊີ ທີ່ສັງເກດໄດ້ຢ່າງຈະແຈ້ງຈາກລະດັບອຸປະສົງ ເຖິງວ່າຍັງບໍ່ມີການລະບຸຢ່າງເປັນທາງການ ວ່າພະນັກງານສາຍວຽກໃດແດ່ຈະໄດ້ຮັບຜົນກະທົບຈາກການປົດອອກຄັ້ງນີ້. ເຖິງຢ່າງໃດກໍຕາມ, CEO ຂອງໄມໂຄຣຊັອບຢືນຢັນວ່າ: ບໍລິສັດຈະຍັງຈ້າງບຸກຄະລາກອນ “ທີ່ຖືເປັນກໍາລັງຫລັກຂອງອົງກອນ” ເອົາໄວ້ຕໍ່ໄປ.

ການປະກາດດັ່ງກ່າວຂອງໄມໂຄຣຊັອບເປັນໄປໃນທາງດຽວກັບທີ່ມີລາຍງານອອກມາກ່ອນໜ້ານີ້. ສະນັ້ນ ການເລີກຈ້າງພະນັກງານຄັ້ງນີ້ຖືເປັນອັດຕາສ່ວນຍັງບໍ່ຮອດ 5% ຂອງຈໍານວນພະນັກງານໄມໂຄຣຊັອບທົ່ວໂລກ ເຊິ່ງມີຈໍານວນປະມານ 221.000 ຄົນ.