ເຈົ້າໜ້າທີ່ຕຳຫລວດຈະລາຈອນແຂວງວຽງຈັນ ສຶກສາອົບຮົມໄວໜຸ່ມນັກຂັບຂີ່ດັດແປງສະພາບເຕັກນິກລົດ ຂັບຂີ່ລົດເປັນພຶງເປັນແພ ກີດຂວາງການສັນຈອນ
ວັນທີ 18 ມັງກອນ 2023 ນີ້ ຢູ່ທີ່ຫ້ອງປະຊຸມພະແນກຈະລາຈອນ ໄດ້ ສຶກສາອົບຮົມນັກຂັບຂີ່ທີ່ດັດແປງສະພາບເຕັກນິກລົດ, ໂດຍການເຂົ້າຮ່ວມຂອງ ທ່ານ ພັທ ກົງຈັນ ສີວິໄລວົງ ຮອງຫົວໜ້າພະແນກຕໍາຫລວດຈະລາຈອນ ຫ້ອງຕໍາຫລວດ ປກສ ແຂວງວຽງຈັນ ມີພະນັກງານ, ນາຍບ້ານ, ຜູ້ປົກຄອງ ກ່ຽວຂ້ອງ ແລະ ນັກຂັບຂີ່ທີ່ດັດແປງສະພາບສະພາບເຕັກນິກ ເຂົ້າຮ່ວມ.
ທ່ານ ພັຕ ທອງວັນ ປັນຍາດີ ຫົວໜ້າກອງໂຄສະນາ ພະແນກຕຳຫລວດຈະລາຈອນ ຫ້ອງຕຳຫລວດ ປກສ ແຂວງວຽງຈັນ ກ່າວວ່າ: ເພື່ອເປັນການປ້ອງກັນ ແລະ ສະກັດກັ້ນປະກົດການຫຍໍ້ທໍ້ໃນດ້ານຕ່າງໆ ໃຫ້ຫລຸດໜ້ອຍຖອຍລົງເທື່ອລະກ້າວ ໃຫ້ມີຄວາມເປັນລະບຽບຮຽບຮ້ອຍດີ. ສະນັ້ນ, ຕໍາຫລວດຈະລາຈອນ ແຂວງວຽງຈັນ ໄດ້ລົງເຄື່ອນໄຫວກວດກາພາຫະນະຕາມເສັ້ນທາງຢູ່ປ້ອມບ້ານໂພນໄຊ ເມືອງໂພນໂຮງ ແຂວງວຽງຈັນ ຜ່ານການລົງກວດກາຕົວຈິງຈຶ່ງພົບເຫັນນັກຂັບຂີ່ດັດແປງສະພາບເຕັກນິກຂອງລົດຈັກຈຳນວນ 4 ຄັນ ມາຮັກສາໄວ້ຢູ່ພເແນກຕໍາຫລວດຈະລາຈອນແຂວງ ເພື່ອທຳລາຍຢາງຕີນລົດ ແລະ ທໍ່ໄອເສຍ ທີ່ບໍ່ຖືກຕ້ອງຕາມມາດຕະຖານຂອງໂຮງງານຜະລິດອອກ ແລ້ວປ່ຽນຖ່າຍໃໝ່. ພ້ອມທັງຍົກໃຫ້ເຫັນສະພາບການສັນຈອນໃນປັກຈຸບັນ ແລະ ຜົນໄດ້ຜົນເສຍຂອງການດັດແປງສະພາບເຕັກນິກຂອງລົດ ອັນໄດ້ສ້າງຄວາມບໍ່ສະຫງົບ ແລະ ຄວາມບໍ່ເປັນລະບຽບຮຽບຮ້ອຍໃຫ້ແກ່ສັງຄົມ, ເສຍເງິນຄຳພໍ່ແມ່ ແລະ ຕໍ່ກັບສະພາບການສັນຈອນຕາມທ້ອງຖະໜົນຫລວງກໍແມ່ນບັນຫາໜຶ່ງ ເຊິ່ງນັກຂັບຂີ່ແຕ່ລະຄົນຕ້ອງໄດ້ເປັນເຈົ້າການປະຕິບັດກົດລະບຽບຈະລາຈອນທີ່ໄດ້ກຳນົດໄວ້, ສະພາບເຕັກນິກຂອງລົດຕ້ອງຢູ່ໃນສະພາບເດີມທີ່ໂຮງງານຜະລິດອອກມາເທົ່ານັ້ນ ແຕ່ຍ້ອນຄວາມຮູ້ເທົ່າບໍ່ເຖິງການ ພັດມີນັກຂັບຂີ່ຈຳນວນໜຶ່ງມີການຝ່າຝືນບໍ່ເຄົາລົບກົດລະບຽບຈະລາຈອນ ເປັນຕົ້ນແມ່ນການຂັບຂີ່ລົດຈັກເປັນພຶງເປັນແພ ກີດຂວາງການສັນຈອນ, ດັດແປງທໍ່ໄອເສຍເຮັດໃຫ້ມີສຽງລົບກວນຄົນອື່ນໃນເວລາກາງຄືນ, ໃສ່ຕີນນ້ອຍບໍ່ຖືກຕາມຂະໜາດມາດຕະຖານຂອງໂຮງານຜະລິດ ແລະ ອື່ນໆ ນີ້ກໍແມ່ນສາເຫດໜຶ່ງ ທີ່ພາໃຫ້ຕົວເລກອຸບັດຕິເຫດເພີ່ມຂຶ້ນຢ່າງຫລວງຫລາຍ ທັງສູນເສຍວັດຖຸເງິນຄຳ ຮ້າຍແຮງໄປກວ່ານັ້ນກໍ່ກ້າວໄປເຖິງຂັ້ນເສຍຊີວິດ, ຈາກສະພາບດັ່ງກ່າວຈຶ່ງຮຽກຮ້ອງໃຫ້ນັກຂັບຂີ່ຈົ່ງຢຸດເຊົາການປະພຶດຕົວໄປໃນທາງທີ່ບໍ່ຖືກຕ້ອງ ແລ້ວປ່ຽນແນວຄິດຂອງຕົນເອງໄປໃນທາງທີດີ, ເປັນລູກທີ່ດີຂອງພໍ່ແມ່ ແລະ ເປັນເຈົ້າການໃນການປະຕິບັດກົດລະບຽບຈະລາຈອນຢ່າງເຂັ້ມງວດ.
ພ້ອມນີ້ໄດ້ມີການປ່ຽນຖ່າຍທໍ່ໄອເສຍ ແລະ ຕີນລົດທີ່ນ້ອຍກວ່າມາດຕະຖານອອກແລ້ວເອົາໃສ່ໃໝ່ ເພື່ອໃຫ້ຖືກຕ້ອງຕາມຂະໜາດ ແລະ ມາດຕະຖານຂອງໂຮງງານຜະລິດ ຫລັງຈາກປ່ຽນສຳເລັດແລ້ວຈຶ່ງສົ່ງຄືນໃຫ້ເຈົ້າຂອງເດີມໄປນຳໃຊ້ຕາມປົກກະຕິ, ເຈົ້າໜ້າທີ່ພະແນກຈະລາຈອນແຂວງ ຈຶ່ງໄດ້ເອົາຢາງຕີນລົດ ແລະ ທໍ່ໄອເສຍທີ່ດັດແປງໄປທຳລາຍຖິ້ມ.
