ທ່ານ ຫງວຽນ ຊວນຟຸກ ປະທານປະເທດແຫ່ງ ສສ ຫວຽດນາມ ລາໜ້າທີ່ ພາຍຫລັງດຳລົງຕຳແໜ່ງໄດ້ 1 ປີ ກັບ 8 ເດືອນ

 ແຫຼ່ງຂ່າວຈາກ VNEXPRESS ໃຫ້ຮູ້ວ່າ: ວັນທີ 17 ມັງກອນ 2023, ສູນກາງພັກກອມມູນິດຫວຽດ ນາມ ເຫັນດີຕາມຈຸດປະສົງສະເໜີຂອງທ່ານ ຫງວຽນຊວນຟຸກ ເພື່ອຢຸດການດຳລົງຕຳແໜ່ງກຳມະການກົມການເມືອງສູນກາງພັກ, ຄະນະບໍລິຫານງານສູນກາງພັກສະໄໝທີ 13, ປະທານປະເທດ, ປະທານສະພາປ້ອງກັນຊາດ-ປ້ອງກັນຄວາມສະຫງົບໄລຍະ 2021-2026.

ພາຍຫຼັງກອງປະຊຸມ, ຄະນະບໍລິຫານງານສູນກາງພັກໄດ້ຕີລາຄາສູງວ່າ: ທ່ານ ຫງວຽນຊວນຟຸກ ແມ່ນພະນັກງານການນຳທີ່ເປັນຫຼັກແຫຼ່ງສຳຄັນຂອງພັກ ແລະ ລັດ ເຊິ່ງທ່ານເກີດໃນຄອບຄົວທີ່ມີມູນເຊື້ອປະຕິວັດ, ໄດ້ຮັບການກໍ່ສ້າງນັບແຕ່ຂັ້ນຮາກຖານ ແລະ ໄດ້ຮັບການມອບໝາຍຈາກຄະນະບໍລິຫານງານສູນກາງພັກ ແລະ ກົມການເມືອງໃຫ້ດຳລົງຕຳແໜ່ງການນຳທີ່ສຳຄັນຂອງພັກ ແລະ ລັດ.

ທ່ານ ຫງວຽນ ຊວນຟຸກ ອາຍຸ 69 ປີ ເກີດຢູ່ແຂວງກວາງນາມຈົບປະລິນຍາຕີດ້ານເສດຖະສາດ, ທ່ານເປັນສະມາຊິກກົມການເມືອງສູນກາງພັກ 3 ສະໄໝຕິດຕໍ່ກັນ ແຕ່ສະໄໝທີ 11 ຫາ 13; ກຳມະການສູນກາງພັກ 4 ສະໄໝຕິດ ຕໍ່ກັນ ແຕ່ 10-13, ຜູ້ແທນສະພາແຫ່ງຊາດ 4 ສະໄໝ ຊຸດທີ 11, 13, 14, ແລະ ຊຸດທີ 15.

ນັບແຕ່ປີ 1997-2006, ທ່ານດຳລົງຕຳແໜ່ງເປັນຮອງປະທານແຂວງທັງເປັນຫົວໜ້າຄະນະຄຸ້ມຄອງ ບັ ນດາເຂດອຸດສາຫະກຳຂອງແຂວງ, ເປັນຮອງເລຂາຄະນະພັກແຂວງ, ປະທານຄະນະກຳມະການປະຊາຊົນແຂວງ, ປະທານສະຫະພັນວິທະຍາສາດ ແລະ ເຕັກໂນໂລຊີແຂວງກວາງນາມ.

ເດືອນມີນາປີ 2006, ທ່ານໄດ້ດຳລົງຕຳແໜ່ງເປັນຮອງຜູ້ກວດກາລັດຖະບານ, ເປັນຮອງຫົວໜ້າຫ້ອງວ່າການລັດຖະບານ, ເປັນລັດຖະມົນຕີ ທັງເປັນຫົວໜ້າຫ້ອງວ່າການລັດຖະບານ.

ເດືອນສິງຫາ 2011, ໄດ້ຖືກແຕ່ງຕັ້ງເປັນຮອງນາຍົກລັດຖະມົນຕີ ແລະ 5 ປີຕໍ່ມາໄດ້ເລືອກຕັ້ງເປັນນາຍົກລັດຖະມົນໂດຍສະພາແຫ່ງຊາດ.

ໃນກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 13 ຕົ້ນປີ 2021 (ທ່ານ ຫງວຽນຊວນຟຸກ ແມ່ນໜຶ່ງໃນສອງກໍລະນີພິເສດຂອງກົມການເມືອງຊຸດທີ 12 ເພື່ອເລືອກຕັ້ງຄືນໃໝ່)

ວັນທີ 5 ເມສາ 2021 ທ່ານໄດ້ຮັບເລືອກຕັ້ງເປັນປະທານປະເທດ ໃນຕົ້ນສະໄໝທີ 13, ກຳມະການກົມການເມືອງສູນກາງພັກມີສະມາຊິກ 18 ທ່ານ.

ມາຮອດວັນທີ 17 ມັງກອນ 2023 ທ່ານໄດ້ລາອອກຈາກຕຳແໜ່ງປະທານປະເທດຢ່າງເປັນທາງການ ລວມໄລຍະເວລາການດຳລົງຕຳແໜ່ງໄດ້ 1 ປີ, 8 ເດືອນ ກັບ 12 ວັນ.

ສ່ວນປະທານປະເທດຄົນໃໝ່ແມ່ນຈະໄດ້ມີການເລືອກຕັ້ງໃໝ່ໃນໄວໆນີ້