ປະຊາກອນຈີນຫລຸດລົງຄັ້ງທຳອິດໃນຮອບ 60 ປີ ອິນເດຍກຽມຂຶ້ນເປັນປະເທດທີ່ມີປະຊາກອນຫລາຍສຸດໃນໂລກປີນີ້
ຈຳນວນປະຊາກອນຂອງຈີນຫລຸດລົງໃນຮອບ 60 ປີ ເນັ້ນເຖິງການຄາດຄະເນວ່າອິນເດຍຈະແຊງຂຶ້ນເປັນປະເທດມີປະຊາກອນຫລາຍທີ່ສຸດໃນໂລກປີນີ້.
ສຳນັກງານສະຖິຕິແຫ່ງຊາດຈີນເປີດເຜີຍຂໍ້ມູນປະຊາກອນທົ່ວປະເທດ ພົບວ່າ: ໃນປີ 2022 ຈີນມີປະຊາກອນຫລຸດລົງປະມານ 850.000 ຄົນ ເຫລືອປະມານ 1,41175 ພັນລ້ານຄົນ ຖືເປັນການຫລຸດລົງຫລາຍສຸດນັບແຕ່ປີ 1961 ເຊິ່ງຢູ່ໃນໄລຍະທີ່ຈີນຜະເຊີນສະພາບອຶດຫິວຄັ້ງໃຫຍ່ໃນປີ 1959-1961 ຈົນເຮັດໃຫ້ມີຜູ້ເສຍຊີວິດຫລາຍກວ່າ 55 ລ້ານຄົນໃນເວລານັ້ນ.
ໂດຍອັດຕາການເກີດຂອງປະຊາກອນຈີນໃນປີ 2022 ມີພຽງ 6,77 ຕໍ່ປະຊາກອນ 1.000 ຄົນ ຫລຸດລົງຈາກປີ 2021 ເຊິ່ງມີອັດຕາເກີດ 7,52 ຕໍ່ປະຊາກອນ 1.000 ຄົນ ອີກທັງຍັງເປັນອັດຕາການເກີດຕໍ່າສຸດເປັນປະຫວັດສາດ, ສ່ວນອັດຕາການເສຍຊີວິດຂອງປະຊາກອນຈີນໃນປີຜ່ານມາມີ 7,37 ຕໍ່ປະຊາກອນ 1.000 ພັນ ຖືເປັນອັດຕາສ່ວນສູງສຸດນັບແຕ່ປີ 1974 ເຊິ່ງຈີນຢູ່ໃນໄລຍະການປະຕິວັດວັດທະນະທຳ ແລະ ເພີ່ມຂຶ້ນຈາກປີ 2021 ເຊິ່ງຈີນມີອັດຕາການເສຍຊີວິດຂອງປະຊາກອນ 7,18 ຕໍ່ 1.000 ຄົນ.
ຂໍ້ມູນດັ່ງກ່າວໄດ້ສ້າງຄວາມກັງວົນວ່າ: ອາດເປັນຈຸດປ່ຽນສຳຄັນທາງປະຫວັດສາດ ແລະ ເປັນຈຸດເລີ່ມຕົ້ນຂອງການຫລຸດລົງຢ່າງຕໍ່ເນື່ອງ ເຊິ່ງຈະສົ່ງຜົນກະທົບຕໍ່ເສດຖະກິດຂອງຈີນ ແລະ ທົ່ວໂລກຢ່າງຫລີກລ່ຽງບໍ່ໄດ້.
ຂໍ້ມູນທີ່ທາງການຈີນເປີດເຜີຍອອກມາຫລ້າສຸດນີ້ ຍັງເປັນການເນັ້ນເຖິງການຄາດຄະເນທີ່ມີມາກ່ອນໜ້ານີ້ວ່າ: ອິນເດຍຈະແຊງຈີນ ກ້າວຂຶ້ນເປັນປະເທດທີ່ມີປະຊາກອນຫລາຍທີ່ສຸດໃນໂລກໃນປີ 2023. ຂະນະທີ່ເວັບໄຊ World Population Review ເຊິ່ງເປັນເວັບໄຊລວບລວມຂໍ້ມູນປະຊາກອນທົ່ວໂລກ ໄດ້ຢືນຢັນຄວາມເປັນໄປໄດ້ດັ່ງກ່າວວ່າອາດຈະເກີດຂຶ້ນໃນມໍ່ໆນີ້.
World Population Review ໄດ້ຈັດອັນດັບ 10 ປະເທດທີ່ມີປະຊາກອນຫລາຍທີ່ສຸດໃນໂລກ (ຂໍ້ມູນວັນທີ 17 ມັງກອນ) ພົບວ່າ: ຈີນຍັງເປັນປະເທດທີ່ມີປະຊາກອນຫລາຍທີ່ສຸດໃນໂລກ ໂດຍມີປະຊາກອນທົ່ວປະເທດຈຳນວນ 1.425.833.091 ຄົນ, ອັນດັບ 2 ອິນເດຍ ມີປະຊາກອນ 1.422.627.451 ຄົນ, ອັນດັບ 3 ອາເມລິກາ ມີປະຊາກອນ 339.163.650 ຄົນ, ອັນດັບ 4 ອິນໂດເນເຊຍ ມີປະຊາກອນ 276.490.868 ຄົນ, ອັນດັບ 5 ປາກິດສະຖານ ມີປະຊາກອນ 238.340.913 ຄົນ, ອັນດັບ 6 ໄນຈີເຣຍ ມີປະຊາກອນ 221.395.290 ຄົນ, ອັນດັບ 7 ເບຣຊິນ ມີປະຊາກອນ 215.858.688 ຄົນ, ອັນດັບ 8 ບັງກະລາເດດ ມີປະຊາກອນ 172.155.188 ຄົນ, ອັນດັບ 9 ຣັດເຊຍ ມີປະຊາກອນ 144.671.379 ຄົນ, ອັນດັບ 10 ແມັກຊິກ ມີປະຊາກອນ 128.027.032 ຄົນ. ສ່ວນປະເທດລາວຢູ່ອັນດັບທີ 103 ມີປະຊາກອນ 7.586.914 ຄົນ.
ຂະນະດຽວກັນ, World Population Review ຍັງຄາດຄະເນວ່າ: ອິນເດຍຈະມີປະຊາກອນແຊງຈີນໃນປີນີ້ ໂດຍປະຊາກອນຂອງອິນເດຍມີທ່າອ່ຽງເພີ່ມຂຶ້ນຕໍ່ເນື່ອງ, ຂະນະທີ່ປະຊາກອນຈີນມີທ່າອ່ຽງຫລຸດລົງຢ່າງຕໍ່ເນື່ອງເຊັ່ນດຽວກັນ.
