ການສົ່ງເສີມປູກມັນຕົ້ນ ມີທັງໂອກາດ ແລະ ສິ່ງທ້າທາຍ ຕໍ່ເສດຖະກິດລາວ

ໂດຍ: ມຶກບໍ່ແຫ້ງ

ມັນຕົ້ນເປັນສິນຄ້າກະສິກຳ ອັນດັບຕົ້ນໆ ທີ່ສ້າງລາຍຮັບແກ່ປະເທດເຮົາໃນປັດຈຸບັນ, ສປປລາວ ມີໂອກາດຢ່າງຫຼວງຫຼາຍໃນການເພີ່ມກຳລັງຜະລິດມັນຕົ້ນ, ແຕ່ກໍມີບັນຫາທ້າທາຍຕ່າງໆທີ່ຕ້ອງແກ້ໄຂໃຫ້ໄດ້.

ໃນປີ 2022 ມູນຄ່າການສົ່ງອອກມັນຕົ້ນເຖິງ 301 ລ້ານໂດລາ ຮອງຈາກ ຢາງພາລາ ແລະ ເຍື້ອໄມ້ ແລະ ຫຼາຍກວ່າມູນຄ່າການສົ່ງອອກໝາກກ້ວຍທີ່ມີພຽງ 195 ລ້ານໂດລາ. ເພາະສະນັ້ນ ມັນຕົ້ນຈຶ່ງຖືໄດ້ວ່າເປັນພືດເສດຖະກິດທີ່ມີທ່າແຮງສູງ ທີ່ເພີ່ມການສ້າງລາຍຮັບແກ່ປະເທດໃຫ້ໄດ້ຫຼາຍກວ່ານີ້ທັງສ້າງວຽກເຮັດງານທຳ ແລະລາຍໄດ້ແກ່ປະຊາຊົນທ້ອງຖິ່ນເປັນຢ່າງດີ.

ຄວາມຕ້ອງການມັນຕົ້ນຂອງຕະຫຼາດໂລກນັບມື້ນັບເພີ່ມຫຼາຍຂຶ້ນ ໂດຍມັນຕົ້ນມີມູນຄ່າໃນຕະຫຼາດໂລກມະຫາສານ ຈາກ 164 ຕື້ໂດລາ ໃນປີ 2020 ຈະເປັນ 237 ຕື້ໂດລາໃນປີ 2030 ແລະໃນໂລກນີ້ ມີພຽງປະເທດທີ່ຢູ່ ໃນເຂດຮ້ອນເທົ່ານັ້ນ ສາມາດຜະລິດມັນຕົ້ນໄດ້ ແລະ ກຳລັງມີການ ຂະຫຍາຍຕົວສູງໃນການຜະລິດມັນຕົ້ນ ຢູ່ ສປປລາວ. ໃນປະເທດອ້ອມຂ້າງເຮົາ ເຊັ່ນ ໄທ ແມ່ນສົ່ງອອກມັນຕົ້ນອັນດັບໜຶ່ງ ຂອງໂລກ. ນອກນັ້ນ, ຫວຽດນາມ, ກຳປູເຈຍ ແລະ ມຽນມາ ກໍມີການຂະຫຍາຍຕົວຢ່າງໄວວາ.

ສປປ ລາວ ເຮົາມີໂອກາດຢ່າງຫຼວງຫຼາຍທີ່ຈະຂະຫຍາຍການຜະລິດມັນຕົ້ນ ເພາະວ່າ ສະພາບແວດລ້ອມເໝາະສົມຖືວ່າເປັນພືດທີ່ປູກ ແລະເບິ່ງແຍງອ່າວງ່າຍ, ເຕີບໂຕໄດ້ດີ ໃນເກືອບພື້ນທີ່ຂອງປະເທດ, ພ້ອມນັ້ນ ສຳຄັນທີ່ສຸດ ສປ ຈີນເປັນຕະຫຼາດຮອງຮັບໃຫຍ່ທີ່ສຸດ ແລະ ສປປລາວສາມາດສົ່ງອອກຜ່ານທາງລົດໄຟລາວ-ຈີນຢ່າງສະດວກສະບາຍ ເຊິ່ງພວກເຮົາມີທ່າໄດ້ປຽບຫຼາຍທີ່ສຸດ.

ໃນປັດຈຸບັນເນື້ອທີ່ການຜະລິດມັນຕົ້ນຂອງ ສປປລາວ ມີ 1 ແສນກວ່າ ເຮັກຕາ ດ້ວຍສະມັດຖະພາບໂດຍສະເລ່ຍ 30 ໂຕນຕໍ່ເຮັກຕາ ເຊິ່ງຖືວ່າຫຼາຍສົມຄວນຖ້າທຽບໃສ່ບັນດາປະເທດອ້ອມຂ້າງ ເຊັ່ນໄທ ໄດ້ 21 ໂຕນຕໍ່ເຮັກຕາ (ອີງຕາມຂໍ້ມູນ ກະຊວງກະສິກຳ ແລະປ່າໄມ້ ປີ 2019). ພ້ອມນັ້ນ ການຂະຫຍາຍຕົວຂອງການພັດທະນາໂຄງລ່າງພື້ນຖານ ໂດຍສະເພາະໂຮງງານແປຮູບມັນຕົ້ນໃນປະເທດກໍຂະຫຍາຍຕົວຢ່າງໄວວາ ເຊັ່ນ ເມື່ອວັນທີ 5 ມັງກອນ 2023 ຜ່ານມາ ຢູ່ແຂວງວຽງຈັນກໍໄດ້ເຊັນສັນຍາສ້າງໂຮງງານຜະລິດແປ້ງມັນຕົ້ນ ທີ່ມີກຳລັງຜະລິດເຖິງ 50.000 ໂຕນຕໍ່ປີ ແລະແຂວງອື່ນໆກໍກຳລັງຂະຫຍາຍຕົວຕໍ່ເນື່ອງ ເຊິ່ງເປັນການກະຕຸ້ນການຜະລິດມັນຕົ້ນພາຍໃນປະເທດ ເປັນຢ່າງດີ.

ໃນທ່າມກາງການຂະຫຍາຍຕົວດີຂອງອຸດສາຫະກຳ ການຜະລິດມັນຕົ້ນນີ້ ກໍຍັງມີສິ່ງທ້າທ້າຍ ທີ່ຈະຕ້ອງສືບຕໍ່ແກ້ໄຂ ໂດຍສະເພາະ ການສົ່ງເສີມການຜະລິດທີ່ຖືກຕາມຫຼັກວິຊາການ ເພື່ອຍົກສູງສະມັດຖະພາບການຜະລິດ ແກ່ປະຊາຊົນ ເຊິ່ງໃນປັດຈຸບັນສ່ວນຫຼາຍການປູກອີງໃສ່ເຕັກນິກຂັ້ນພື້ນຖານ ແຕ່ຍັງພໍໄດ້ຜົນຜະລິດດີເພາະ ດິນຍັງໃໝ່ ແຕ່ຖ້າດົນໄປ ດິນຈືດຈາງນັ້ນ ຈະຕ້ອງໄດ້ຊ່ວຍໃຫ້ປະຊາຊົນສາມາດຮັກສາຄຸນນະພາບດິນທີ່ດີ ສາມາດຜະລິດມັນຕົ້ນໄດ້ຢ່າງຍືນຍົງ.

ສິ່ງທີ່ກ່ຽວຂ້ອງກັບເລື່ອງຍືນຍົງນັ້ນ ພວກເຮົາໄດ້ຍິນມາຫຼາຍເທື່ອແລ້ວວ່າ ປະຊາຊົນບາງເຂດບຸກຖາງປ່າແກ່ ໃກ້ກັບ ຫຼື ໃນເຂດປ່າສະຫງວນ ເພື່ອເຮັດສວນມັນຕົ້ນ ເຊິ່ງເປັນໄພຂົ່ມຂູ່ຕໍ່ການຮັກສາຊີວະນານາພັນ, ຂັດຂວາງການ ເພີ່ມຂຶ້ນຂອງອັດຕາການປົກຄຸມຂອງປ່າໄມ້ທີ່ລັດຖະບານໄດ້ວາງໄວ້ 70%. ເພາະສະນັ້ນ, ພາກສ່ວນທີ່ກ່ຽວຂ້ອງຄວນ ຮີບຮ້ອນຈັດສັນທີ່ດິນ ເພື່ອການຜະລິດມັນຕົ້ນຢ່າງເໝາະສົມ.

ພ້ອມນັ້ນ, ຫຼາຍຄົນຍັງຄິດວ່າການປູກມັນຕົ້ນເຮັດໄດ້ງ່າຍ ຫາຍຫ່ວງ ແຕ່ຄວາມຈິງແລ້ວການປູກມັນຕົ້ນກໍຍັງມີຄວາມສ່ຽງຕໍ່ການລະບາດຂອງສັດຕູພືດ ເຊັ່ນ ເພ້ຍແປ້ງ, ໃບດ່າງ ເຊິ່ງຈະຕ້ອງມີຄັດເລືອກປູກແນວພັນທີ່ດີ ເຊິ່ງປະຊາຊົນ ຍັງຂາດຄວາມຮູ້ເລື່ອງພັນມັນຕົ້ນທີ່ສາມາດຕ້ານທານກັບ ການລະບາດຂອງເຊື້ອພະຍາດນີ້ຢູ່. ເພາະສະນັ້ນ, ການພັດທະນາພັນມັນຕົ້ນ ແລະ ເພີ່ມຄວາມຮູ້ແກ່ປະຊາຊົນ ເປັນສິ່ງຈຳເປັນທີ່ສຸດ.

ຄຽງຄູ່ກັບປັດໄຈອື່ນໆ ຖ້າຫາກພວກເຮົາສາມາດແກ້ໄຂບັນດາສິ່ງທ້າທາຍຂ້າງເທິງນັ້ນ ຈະສາມາດສົ່ງເສີມການຜະລິດມັນຕົ້ນ ທີ່ເປັນພືດເສດຖະກິດ ສາມາດເອີ້ນໄດ້ວ່າ ຄຳຂາວທີ່ມີຄ່າຂອງລາວ ໃຫ້ຂະຫຍາຍຕົວຢ່າງຍືນຍົງ, ສາມາດສ້າງລາຍຮັບຢ່າງຫຼວງຫຼາຍແກ່ ສປປລາວໃນອະນາຄົດ.