ເຈົ້າໜ້າທີ່ຕຳຫລວດໄທ ຈັບກຸມຄລີນິກເສີມຄວາມງາມ ທີ່ໃຊ້ຊິລິໂຄນບໍ່ໄດ້ມາດຕະຖານໃຫ້ແກ່ລູກຄ້າ

ເຈົ້າໜ້າທີ່ຕຳຫລວດກາງ ຂອງໄທລາຍງານວ່າ: ວັນທີ 16 ມັງກອນ 2023 ນີ້ ໄດ້ຂະຫຍາຍຜົນຈັບກຸມຄລີນິກເສີມຄວາມງາມທີ່ໃຊ້ຊິລິໂຄນບໍ່ໄດ້ມາດຕະຖານໃຫ້ແກ່ລູກຄ້າ ແລະ ສາມາດຢຶດຊິລິໂຄນ ໄດ້ 16.164 ອັນ.
ການຈັບກຸມໃນຄັ້ງນີ້ ສືບເນື່ອງມາຈາກວັນທີ 20 ທັນວາ 2022 ທີ່ຜ່ານມາ ຕຳຫລວດໄດ້ນຳໝາຍຄົ້ນຂອງສານ ຈັງຫວັດສຸພັນບູລີ ເຂົ້າຄົ້ນໂຮງສີໃນພື້ນທີ່ ຕຳບົນ ວັງຫວ້າ, ອຳເພີ ສີປະຈັນ, ຈັງຫວັດສຸພັນບູລີ ມີການລັກລອບຜະລິດຊິ້ນສ່ວນຊິລິໂຄນສັນຍະກຳເສີມດັງ ແລະ ໜ້າຜາກ ເພື່ອກະຈາຍໄປຍັງຄລີນິກ 7 ຈຸດ ທົ່ວປະເທດ.
ຫລັງເຂົ້າກວດສອບໄດ້ຢຶດເຄື່ອງຈັກສຳລັບຜະລິດຊິລິໂຄນດັງ ແລະ ໜ້າຜາກ, ແມ່ພິມຊິລິໂຄນຊົງຕ່າງໆ ຈຳນວນ 68 ແບບ, ຊິລິໂຄນເສີມດັງ 12.282 ອັນ, ຊິລິໂຄນໜ້າຜາກ 2.775 ອັນ, ຊິລິໂຄນໜ້າຜາກ 1.107 ອັນ ແລະ ອຸປະກອນໃນການຜະລິດຊິລິໂຄນ ກວ່າ 16 ລາຍການ ໂດຍຜູ້ຜະລິດມີຄວາມຜິດໃນຂໍ້ຫາ ຜະລິດເຄື່ອງມືການແພດໂດຍບໍ່ໄດ້ຮັບອະນຸຍາດ ແລະ ຜະລິດເຄື່ອງມືແພດໂດຍບໍ່ໄດ້ຮັບໃບແຈ້ງລາຍການລະອຽດ, ເຊິ່ງຜູ້ຖືກຫາຍອມຮັບສາລະພາບທຸກຂໍ້ກ່າວຫາ ແລະ ຍອມຮັບວ່າເຮັດມາດົນກວ່າ 2 ປີ.