ເກີດເຫດລູກຊາຍຍິງພໍ່ຈົນເສຍຊີວິດ ຍ້ອນບໍ່ພໍໃຈພໍ່ໄປພົວພັນຊູ້ສາວກັບຍິງອື່ນແລ້ວໄລ່ແມ່ໜີອອກຈາກເຮືອນ

ວາລະສານປ້ອງກັນຄວາມສະຫງົບລາຍງານວ່າ: ເກີດເຫດລູກຊາຍຍິງພໍ່ ຈົນເສຍຊີວິດ ທີ່ບ້ານ ຢາງຫລວງ ເມືອງສິງ ແຂວງຫລວງນ້ຳທາ ຍ້ອນບໍ່ພໍໃຈພໍ່ພົວພັນຊູ້ສາວກັບຄົນອື່ນແລ້ວໄລ່ແມ່ໜີອອກຈາກເຮືອນ.

ທ່ານ ພັຕ ອານຸສອນ ໄຊດວງຕາ ຮອງຫົວໜ້າພະແນກຕໍາຫລວດ ປກສ ເມືອງສິງ ແຂວງຫລວງນໍ້າທາ ໃຫ້ຮູ້ວ່າ: ເຫດເກີດຂຶ້ນໃນວັນທີ 19 ພະຈິກ 2022  ທີ່ຜ່ານມາ ຢູ່ບ້ານຢາງຫຼວງ ເມືອງສິງ ແຂວງຫຼວງນໍ້າທາ. ພາຍຫລັງໄດ້ຮັບແຈ້ງຄວາມຈາກອໍານາດການປົກຄອງບ້ານ ເຈົ້າໜ້າທີ່ຕຳຫລວດຈຶ່ງໄດ້ແຕ່ງຕັ້ງພະນັກງານວິຊາສະເພາະລົງກວດກາພົບເຫັນຜູ້ເສຍຊີວິດ ຊື່ ທ້າວ ມືແຊະ ອາຍຸ 41 ປີ ປະຊາຊົນ ບ້ານຢາງຫລວງ ເມືອງສິງ ພົບເຫັນຮ່ອງຮອຍລູກປືນຍິງເຂົ້າບໍລິເວນຮ່າງກ່າຍ 3 ຈຸດ ກົກແຂນເບື້ອງຊ້າຍ 1 ລູກ, ກ້ອງຂີ້ແຮ້ເບື້ອງຊ້າຍ ແລະ ເບື້ອງຂວາ 1 ລູກ.

ຜ່ານການສືບສວນສອບສວນ ຜູ້ຖືກຫາຍອມຮັບສາລະພາບວ່າ ໄລຍະຜ່ານມາພາຍໃນຄອບຄົວ ມີຄວາມສະຫງົບດີ, ມາໄລຍະປີ 2018-2019 ທ້າວ ມືແຊະ ຜູ້ເປັນພໍ່ ມີການພົວພັນຊູ້ສາວ ກັບ ນາງ ທາເຍາະ ອາຍຸ 40 ປີ ຄົນບ້ານດຽວກັນ; ຫຼັງຈາກນັ້ນ, ຜູ້ເປັນພໍ່ໄດ້ເອົາມາຢູ່ເຮືອນນຳແລ້ວໄດ້ໃຫ້ ນາງ ອາຊື ຜູ້ເປັນເມຍຫຼວງ ພ້ອມກັບລູກ ອອກໄປອາໄສຢູ່ນຳລູກເຂີຍ, ເລີ່ມແຕ່ນັ້ນມາຄອບຄົວບໍ່ມີຄວາມສະຫງົບ ເກີດມີການຜີດຖຽງກັນເປັນປະຈໍາ ທັງເລື່ອງການແບ່ງປັນດິນມູນ, ການຢູ່ກິນ ເຄື່ອງໃຊ້ສອຍ ແລະ ອື່ນໆ; ມື້ເກີດເຫດ ຜູ້ເສຍຊີວິດໄດ້ຜິດກັນກັບທ້າວ ອາເອີ ຜູ້ເປັນລູກຊາຍຢ່າງຮຸນແຮງ, ຈາກນັ້ນ, ລູກຊາຍໄດ້ຈັບເອົາປືນຢູ່ຂ້າງຝາເຮືອນ ຍິງໃສ່ ທ້າວ ມືແຊະ ຜູ້ເປັນພໍ່ບາດໜຶ່ງເຮັດໃຫ້ຜູ້ກ່ຽວໄດ້ຮັບບາດເຈັບສາຫັດແລ້ວເສຍຊິວີດໃນເວລາຕໍ່ມາ. ດັ່ງນັ້ນເຈົ້າໜ້າທີ່ ປກສ ເມືອງສິງຈຶ່ງໄດ້ຈັບຕົວຜູ້ກໍ່ເຫດມາດຳເນີນຄະດີຕາມລະບຽບກົດໝາຍ