ຮອງນາຍົກລັດຖະມົນຕີ ຢ້ຽມຢາມວິທະຍາຄານນາຍທະຫານບົກກົມມະດຳ

ວັນທີ 16 ມັງກອນ 2023, ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ພ້ອມຄະນະ ໄດ້ຢ້ຽມຢາມວິທະຍາຄານນາຍທະຫານບົກກົມມະດຳ ໃນໂອກາດວັນສ້າງກອງທັບປະຊາຊົນລາວ ຄົບຮອບ 74 ປີ ( 20 ມັງກອນ 1949-20 ມັງກອນ 2023) ໂດຍໄດ້ຮັບການຕ້ອນຮັບຈາກພົນຈັດຕະວາ ຖາວອນ ແກ້ວອິນທະວົງ ຫົວໜ້າການເມືອງວິທະຍາຄານນາຍທະຫານບົກກົມມະດຳພ້ອມຄະນະ.

ທ່ານ ກິແກ້ວ ໄຂຄຳພິທູນ ໄດ້ເນັ້ນໃຫ້ຄະນະພັກ-ຄະນະອຳນວຍການ, ພະນັກງານ-ນັກຮົບວິທະຍາຄານ ກົມມະດຳ ຈົ່ງເຊີດຊູສະຕິລະວັງຕົວ, ມີສະຕິປົກປັກຮັກສາແນວທາງນະໂຍບາຍຂອງພັກ-ລັດ, ປົກປັກຮັກ ສາໝາກຜົນຂອງການປະຕິວັດ, ສົມທົບແໜ້ນກັບວຽກງານການປ້ອງກັນຊາດ-ປ້ອງກັນຄວາມສະຫງົບແລະ ການສ້າງສາພັດທະນາເສດຖະກິດ-ສັງຄົມ ເພື່ອສືບຕໍ່ກໍ່ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຢູ່ຮາກຖານໃຫ້ທົ່ວເຖິງ, ຍົກສູງສະຕິເປັນເຈົ້າປົກປັກຮັກສາທ້ອງຖິ່ນ, ຕ້ານທຸກການເຄື່ອນໄຫວມ້າງເພທຳລາຍໃນຫລາຍດ້ານຂອງບັນດາອິດທິກຳລັງປໍລະປັກ ແລະ ກຸ່ມຄົນບໍ່ດີຢ່າງທັນການໄປພ້ອມກັບເພີ່ມທະວີການກໍ່ສ້າງຮາກຖານການເມືອງຕິດພັນກັບການພັດທະນາຊົນນະບົດຮອບດ້ານຕາມທິດ 3 ສ້າງ, ກົມກອງຕັ້ງທັບຢູ່ບ່ອນໃດຕ້ອງເຮັດວຽກງານກໍ່ສ້າງຮາກຖານຢູ່ບ່ອນນັ້ນໃຫ້ດີ, ປະກອບສ່ວນຢ່າງຕັ້ງໜ້າປັບປຸງລະບົບອຳນາດປະຊາທິປະໄຕປະຊາຊົນ, ປົກປັກຮັກສາສິດເປັນເຈົ້າຂອງປະຊາຊົນ, ປຸກລະດົມຂົນຂວາຍປະຊາຊົນໃຫ້ສາມັກຄີປຸ້ມລຸມກັນສ້າງສາພັດທະນາບ້ານຊ່ອງ ແລະ ປະຕິບັດໜ້າທີ່ປ້ອງກັນຊາດ-ປ້ອງກັນຄວາມສະຫງົບຢູ່ຮາກຖານ, ປັບປຸງແບບແຜນວິທີເຮັດວຽກໃຫ້ມີວິທະຍາສາດສອດຄ່ອງກັບໜ້າທີ່ການເມືອງຂອງຕົນ, ເຮັດວຽກເປັນໝູ່ຄະນະແບ່ງໃຫ້ບຸກຄົນຮັບຜິດຊອບຢ່າງຂາດຕົວ, ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອອັນດີງາມຂອງຕົນ, ຕ້ອງຕັ້ງໜ້າປັບປຸງກຳລັງທຸກດ້ານໃຫ້ໜັກແໜ້ນ ເຂັ້ມແຂງ, ເອົາໃຈໃສ່ຕໍ່ການປັບປຸງລະບອບຄຸ້ມຄອງ-ບັນຊາ, ປັບປຸງກຳລັງປະເພດຕ່າງໆໂດຍຖືເອົາຄຸນນະພາບດ້ານການເມືອງ-ແນວຄິດເປັນກົກ, ເອົາຄວາມສາມາດດ້ານວິຊາສະເພາະມີຫົວຄິດປະດິດສ້າງ ແລະ ການຈັດຕັ້ງບັນຊາຕ້ອງມີແບບແຜນ ແລະ ປະຕິບັດລະບອບຫັດແອບເພື່ອຍົກສູງຄວາມສາມາດດ້ານສິນລະປະຍຸດ-ຍຸດທະວິທີ, ຍົກສູງສະຕິການຈັດຕັ້ງລະບຽບວິໄນໃຫ້ເຂັ້ມງວດ ເພື່ອກ້າວໄປເຖິງການກຸ້ມຕົນເອງຢ່າງຮອບດ້ານ, ຖືເອົາການຄຸ້ມຄອງ, ລ້ຽງດູທັບໂດຍການສ້າງພະລາທິການ ກັບທີ່ເປັນວຽກງານຕົ້ນຕໍ ເພື່ອແກ້ໄຂຊີວິດການເປັນຢູ່ໃຫ້ດີຂຶ້ນ ໂດຍສຸມໃສ່ດ້ານກະສິກຳທີ່ເປັນທ່າແຮງ (ການປູກຝັງ, ລ້ຽງສັດ) ໃຫ້ເປັນຂະບວນກວ້າງຂວາງ, ປະຕິບັດຫລັກການພົວພັນຮ່ວມມືກັບປະເທດເພື່ອນມິດຍຸດທະສາດ ເພີ່ມທະວີການຮ່ວມມືຮອບດ້ານກັບກອງທັບປະເທດໃກ້ຄຽງ ແລະ ການຮ່ວມມືກັບບັນດາປະເທດສັງຄົມນິຍົມອ້າຍນ້ອງ, ຍາດແຍ່ງການຊ່ວຍເຫລືອຈາກສາກົນເພື່ອປັບປຸງກໍ່ສ້າງກອງທັບ ໃຫ້ກ້າວໜ້າສູ່ຄຸນນະພາບໃໝ່.