ບັນຫາການຖິ້ມຂີ້ເຫຍື້ອຊະຊາຍຕາມເສັ້ນທາງນະຄອນຫລວງວຽງຈັນ ຍັງແກ້ໄຂບໍ່ຂາດຕົວ
ຈາກການທີ່ປັດຈຸບັນປະເທດເຮົາ ໄດ້ພັດທະນາ ແລະ ຂະຫຍາຍຕົວຢ່າງຕໍ່ເນື່ອງ ຊຶ່ງໄປພ້ອມກັບການພັດທະນາໃນທາງທີ່ດີຂຶ້ນນັ້ນ ຍັງມີບາງບັນຫາການພັດທະນາທີ່ຕ້ອງແກ້ໄຂໃຫ້ໄດ້ຢ່າງເດັດຂາດໂດຍສະ ເພາະການພັດທະນາຈິດໃຈຂອງຄົນມັກງ່າຍ ແລະ ບໍ່ສົນໃຈຕໍ່ກົດລະບຽບ ກົດໝາຍບ້ານເມືອງລວມທັງຈິດ ໃຈຂອງເຈົ້າໜ້າທີ່ຫ້ອງການຄຸ້ມຄອງ ແລະ ບໍລິການຕົວເມືອງ ນະຄອນຫລວງວຽງຈັນ.
ຍົກປະເດັນນີ້ຂຶ້ນມາເພື່ອຢາກໃຫ້ພາກສ່ວນກ່ຽວຂ້ອງເຮັດແທ້ ເຮັດຢ່າງເອົາການເອົາງານຕໍ່ບັນຫາຂີ້ເຫຍື້ອ ທີ່ມີຄົນເອົາໄປຖິ້ມຊະຊາຍຕາມສະຖານທີ່ສາທາລະນະທີ່ອາດຈະນັບມື້ເພີ່ມຫລາຍຂຶ້ນ. ສຳລັບຢູ່ນະຄອນ ຫລວງວຽງຈັນ ຕາມສະຖິຕິກໍມີຢ່າງໜ້ອຍ 600-700 ໂຕນຕໍ່ມື້ ຊຶ່ງບັນຫານີ້ພາກສ່ວນກ່ຽວຂ້ອງໄດ້ສຸມໃສ່ແກ້ໄຂ ຕາມມາດຕະການທີ່ວາງອອກຢ່າງເຂັ້ມງວດ ໝາຍວ່າ ເມື່ອພົບເຫັນຜູ້ລະເມີດຖິ້ມຂີ້ເຫຍື້ອຊະຊາຍກໍໄດ້ປັບໃໝເຖິງ 100 ເທົ່າຂອງມູນຄ່າຂີ້ເຫຍື້ອດັ່ງຜ່ານມາໄດ້ປັບໃໝຜູ້ລັກເອົາຂີ້ເຫຍືອໄປຖິ້ມຢູ່ເສັ້ນທາງໜອງບົວທອງ, ປັບໃໝຜູ້ເອົາສິນຄ້າໝົດອາຍຸໄປຖິ້ມຢູ່ເສັ້ນທາງ ເຕ 4 ແລະ ອື່ນໆອີກຫລາຍກໍລະນີ.
ແຕ່ເຖິງປານນັ້ນບັນຫາການລັກຖິ້ມຂີ້ເຫຍື້ອຊະຊາຍຍັງມີໃຫ້ເຫັນເປັນປະຈຳທັງຢູ່ສອງຟາກເສັ້ນທາງ 450 ປີ ແລະ ສະຖານທີ່ສາທາລະນະອື່ນໆທັງທີ່ມີລະບຽບການຮັກສາຄວາມສະອາດໂດຍໃນມາດຕະການນັ້ນໄດ້ລະບຸແຈ້ງວ່າ:ຖ້າຜູ້ໃດຍັງລະເມີດ ຫລື ຝ່າຝືນຈະຖືກປັບໃໝຕາມມະຕິ 3 ຂອງອົງການປົກຄອງນະຄອນ ຫລວງຄືຈະຖືກປັບໃໝ 100 ເທົ່າຂອງຈໍານວນຂີ້ເຫຍື້ອ (ຖ້າສະເລ່ຍຂີ້ເຫຍື້ອກິໂລ 400 ກີບ ແລະ ເມື່ອມາຄູນ 100 ເທົ່າຂອງອັດຕາການປັບໃໝ ຖືວ່າເປັນຈຳນວນບໍ່ໜ້ອຍ).
ຄວາມຈິງແລ້ວ, ຖ້າພາກສ່ວນກ່ຽວຂ້ອງເຄື່ອນໄຫວສອດສ່ອງດູແລເປັນປະຈຳຍ່ອມແກ້ໄຂໄດບວກໃສ່ສັງ ຄົມເປັນຫູເປັນຕາຊ່ວຍເມື່ອພົບເຫັນຄົນເອົາຂີ້ເຫຍື້ອໄປຖິ້ມຊະຊາຍແລ້ວຖ່າຍຮູບ ຫລື ບອກຂໍ້ມູນອື່ນໆທີ່ສາມາດເປັນຫລັກຖານເອົາຜິດຜູ້ລະເມີດສົ່ງໃຫ້ຫ້ອງການຄຸ້ມຄອງ ແລະ ບໍລິການຕົວເມືອງໂທລະສັບ 020 56621164 ຍິ່ງເປັນການດີເພື່ອເຮັດໃຫ້ບ້ານເມືອງສະອາດຈົບງາມ ເຮັດໃຫ້ກົດລະບຽບກົດໝາຍທີ່ວາງອອກມີຜົນສັກສິດແທ້ ຊຶ່ງຢູ່ນະຄອນຫລວງວຽງຈັນມີສະຖານທີ່ຖິ້ມຂີ້ເຫຍື້ອຢ່າງຄັກແນ່ ຄື ສະໜາມຂີ້ເຫຍື້ອຫລັກ 32 ນັ້ນເອງ.
