ແຂວງຈຳປາສັກ-ກວາງຈິ ລົງນາມບົດບັນທຶກການສ້າງຕັ້ງສາຍພົວພັນການຮ່ວມມືມິດຕະພາບ

ໃນໂອກາດທີ່ ສະຫາຍ ຟ້າມ ມິງຈິງນາຍົກລັດຖະມົນຕີ ແຫ່ງ ສສ ຫວຽດນາມພ້ອມຄະນະເດີນທາງມາຢ້ຽມຢາມລາວຢ່າງເປັນທາງການໃນລະຫວ່າງທີ11-12ມັງກອນນີ້ ທີ່ນະຄອນຫຼວງວຽງຈັນ ໄດ້ມີການຮ່ວມລົງນາມເອກະສານການຮ່ວມມື ສອງຝ່າຍຈຳນວນ 10 ສະບັບ. ໃນນັ້ນ ກໍມີິ ການເຊັນ ບົດບັນທຶກ ການສ້າງຕັ້ງສາຍພົວພັນການຮວ່ມມືມິດຕະພາບ ລະຫວ່າງ ຄະນະພັກແຂວງຈໍາປາສັກສາທາລະນະລັດ ປະຊາທິປະໄຕ ປະຊາຊົນລາວ ແລະ ຄະນະພັກແຂວງກວາງຈິສາທາລະນະລັດ ສັງຄົມນິຍົມ ຫວຽດນາມ. ໂດຍການຮ່ວມລົງນາມ ຂອງ ສະຫາຍ ວິໄລວົງ ບຸດດາຄໍາ ເລຂາຄະນະພັກແຂວງ ເຈົ້າແຂວງຈຳປາສັກ ແລະ ສະຫາຍ ເລ ກວາງ ຕຸ່ງ ເລຂາຄະນະພັກແຂວງ ຫົວໜ້າຄະນະຜູ້ແທນສະພາແຫ່ງຊາດແຂວງກວາງຈິ,ໂດຍການ ເປັນສັກຂີພິຍານ ຂອງ ສະຫາຍ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ແລະ ສະຫາຍ ຟ້າມ ມິງ ຈິງນາຍົກລັດຖະມົນຕີ ແຫ່ງ ສສ ຫວຽດນາມ, ພ້ອມດ້ວຍ ຄະນະຜູ້ແທນຂັ້ນສູງ ຂອງ ສອງ ປະເທດ ລາວ-ຫວຽດນາມ ເຂົ້າຮ່ວມ.

ແຂວງຈໍາປາສັກ ຂອງ ສປປ ລາວ ກັບ ແຂວງກວາງຈິ ຂອງ ສສ ຫວຽດນາມ ຜ່ານມາ ແມ່ນມີການພົວພັນ ຮ່ວມມືກັນ ແຕ່ຍັງທັນໄດ້ມີບົດບັນທຶກ ການຮວ່ມມືມິດຕະພາບ ຂອງສອງຝ່າຍ ແລະ ການສ້າງບົດບັນທຶກສະບັບນີ້ແມ່ນອີງຕາມຄວາມຕ້ອງການເພີ່ມທະວີ, ພັດທະນາສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮວ່ມມືຮອບດ້ານ ລະຫວ່າງ ສອງຊາດ ລາວ ແລະ ຫວຽດນາມ ເວົ້າລວມ ແລະ ລະຫວ່າງ ແຂວງຈໍາປາສັກ ແລະ ແຂວງກວາງຈິ ບົນພື້ນຖານຄວາມສາມາດບົ່ມຊ້ອນ ແລະ ທ່າແຮງ ທີ່ມີຂອງສອງຝ່າຍ ໃນຂົງເຂດຕ່າງໆ ເພື່ອຮ່ວມມືກັນຊຸກຍູ້ການພັດທະນາ ບໍ່ວ່າຈະເປັນ ດ້ານການເມືອງ, ການຕ່າງປະເທດ ແລະ ການແລກປ່ຽນຄະນະຜູ້ແທນສອງຝ່າຍ ເພີ່ມທະວີສາຍພົວພັນທາງດ້ານການເມືອງ ແລະ ແລກປ່ຽນຄະນະຜູ້ແທນຂັ້ນສູງ, ສ້າງເງື່ອນໄຂໃຫ້ບັນດາອົງການຂອງພັກ, ອົງການປົກຄອງ, ບັນດາຂະແໜງການ ແລະ ອົງການຈັດຕັ້ງມະຫາຊົນ ຂອງສອງຝ່າຍ ສ້າງສາຍພົວພັນການຮວ່ມມື, ແລກປ່ຽນບົດຮຽນປະສົບການ, ຊ່ວຍເຫຼືອຊຶ່ງກັນ ແລະ ກັນ,ດ້ານການຄ້າ ແລະ ການລົງທຶນ ແມ່ນສ້າງເງື່ອນໄຂອໍານວຍຄວາມສະດວກໃຫ້ບັນດາວິສາຫະກິດຂອງແຕ່ລະຝ່າຍ ສາມາດເຂົ້າເຖິງການຄົ້ນຄວ້າ, ຜັນຂະຫຍາຍບັນດາກິດຈະກໍາການຮ່ວມມືດ້ານການຄ້າ, ການລົງທຶນ ເພື່ອແນໃສ່ຍົກສູງປະສິດທິພາບການຮ່ວມມື ດ້ານການລົງທຶນ ແລະ ການຄ້າ ລະຫວ່າງສອງຝ່າຍ. ດ້ານການທ່ອງທ່ຽວ, ຄົມມະນາຄົມ ຂົນສົ່ງ ສອງຝ່າຍ ຈະຊ່ວຍເຫຼືອ ແລະ ສ້າງເງື່ອນໄຂ ໃນການໂຄສະນາເຜີຍແຜ່, ສົ່ງເສີມການຮວ່ມມືດ້ານການທ່ອງທ່ຽວ,ສ້າງແຜນການ, ມາດຕະການ ເພື່ອຍົກສູງປະສິດທິພາບການຮ່ວມມື,ປະສານສົມທົບກັນຈັດບັນດາກິດຈະກໍາພົບປະແລກປ່ຽນໃນຂົງເຂດວັດທະນະທໍາ, ສີລະປະ, ກາຍຍະກໍາ -ກິລາ ໂຄສະນາ ເຜີຍແຜ່ວັດທະນະທໍາ ແລະ ການທ່ອງທ່ຽວ ແລະ ສຳລັບດ້ານການ ພັດທະນາຊັບພະຍາກອນມະນຸດ ສອງຝ່າຍ ແມ່ນເປັນເອກະພາບກັນຊ່ວຍເຫຼືອ ແລະ ສົ່ງເສີມບັນດາມະຫາວິທະຍາໄລ, ວິທະຍາໄລກໍ່ສ້າງວິຊາຊີບ (ຊັ້ນສູງ) ຂອງສອງແຂວງ ໃນການແລກປ່ຽນນັກສຶກສາ ແລະ ມອບທຶນການສຶກສາ. ຈະສ້າງເງື່ອນໄຂໃຫ້ບັນດາສະຖາບັນການກໍ່ສ້າງຂອງແຕ່ລະຝ່າຍ ເອກະພາບກັນເປັນເຈົ້າການຜັນຂະຫຍາຍບັນດາເນື້ອໃນການຮ່ວມມື ເພື່ອແນໃສ່ຊ່ວຍພັດທະນາຊັບພະຍາກອນມະນຸດ