ຄວາມດ້ອຍພັດທະນາເປັນໜຶ່ງໃນປັດໄຈທີ່ເຮັດໃຫ້ເງິນກີບອ່ອນຄ່າ

ໂດຍ: ທິດກໍ່າ
ຄວາມດ້ອຍພັດທະນາຂອງປະເທດຊາດບ້ານເມືອງເປັນສາເຫດໜຶ່ງທີ່ເຮັດໃຫ້ເສດຖະກິດ-ການເງິນຂອງປະເທດອ່ອນແອຊັກຊ້າລ້າຫລັງ. ອັນສາເຫດກໍຍ້ອນວ່າ ໃນເມື່ອເສດຖະກິດ-ການເງິນບໍ່ເຂັ້ມແຂງແລ້ວ ຫລາຍສິ່ງຫລາຍຢ່າງຍ່ອມຕາມມາກາຍເປັນອຸປະສັກກົດໜ່ວງຖ່ວງດຶງຄວາມຈະເລີນຂອງຊາດ ອັນໄດ້ແກ່ຄວາມຍາກຈົນ, ຄວາມຂາດເຂີນເງິນຄຳ, ຂາດສະບຽງອາຫານ, ບັນຫາເງິນເຟີ້, ຢາເສບຕິດ, ການສໍ້ລາດບັງຫລວງ, ການປຸ້ນຈີ້, ຂີ້ລັກ, ໂສເພນີ ແລະ ປາກົດການຫຍໍ້ທໍ້ອື່ນໆຢ່າງປະຕິເສດບໍ່ໄດ້.

ໃນຄວາມໝາຍຂອງຄຳວ່າ “ດ້ອຍພັດທະນານັ້ນ” ມັນກໍແມ່ນຄວາມຊັກຊ້າຫລ້າຫລັງທາງດ້ານເສດຖະກິດ-ການເງິນ ເຊິ່ງທັງໝົດນັ້ນມັນກໍມາຈາກເງື່ອນໄຂ ແລະ ປັດໄຈຕ່າງໆ ເຊິ່ງກ່ອນອື່ນໝົດກໍແມ່ນຄົນ ແລະ ສະພາບແວດລ້ອມທີ່ເປັນຕົ້ນເຫດ ເຮັດຫຍັງທຳຫຍັງກໍຊັກຊ້າບໍ່ທັນໝູ່, ເຮັດການຄ້າກໍມີແຕ່ລຸບທຶນ, ຜະລິດສິນຄ້າກໍດ້ອຍຄຸນນະພາບ. ເວົ້າໄດ້ແຕ່ເຮັດບໍ່ໄດ້ ສະຫລຸບແລ້ວໝູ່ໄປໄກໄດ້ສິບໂຄກຊາວໂຄກ, ຈະເລີນຮຸ່ງເຮືອງໄປໜ້າຕິກໆ ຕົນເອງພັດຍັງຢ້ຳເທົ້າຢູ່ບ່ອນເກົ່າ ຫລື ກ້າວໄປກໍບໍ່ທັນໝູ່. ນີ້ລະຄືຄວາມດ້ອຍພັດທະນາລ້າຫລັງຂອງປະເທດຊາດ.

ມາຮອດປັດຈຸບັນ ສປປ ລາວ ຂອງພວກເຮົາກໍມີອາຍຸໄດ້ 47 ປີເຕັມແລ້ວ ຕະຫລອດໄລຍະ 47 ປີເຕັມ ປະເທດຊາດບ້ານເມືອງໄດ້ຮັບການສ້າງສາພັດທະນາໃນທຸກດ້ານດັ່ງພວກເຮົາເຫັນໃນສະພາບປັດຈຸບັນ. ຖ້າຈະຍົກເອົາຜົນງານຊິ້ນໃຫຍ່ໆມາວັດກັນ ກໍຄືເຂື່ອນໄຟຟ້າມີເກືອບ 100 ກວ່າແຫ່ງແລ້ວ. ຖະໜົນຫົນທາງແຕ່ເໜືອຮອດໃຕ້ ນັບແຕ່ຕົວເມືອງເຖິງຊົນນະບົດເຂດຫ່າງໄກສອກຫລີກ. ອັນທີ່ພິເສດສຸດໆໃນປັດຈຸບັນ ປະເທດເຮົາໄດ້ມີເສັ້ນທາງດ່ວນ, ມີຮອດລົດໄຟຄວາມໄວສູງ ນັບທັງໂຮງຈັກໂຮງງານ, ສຳນັກງານອົງການ, ໂຄງການກໍ່ສ້າງ, ໂຄງການເສດຖະກິດພິເສດ ແລະ ເສດຖະກິດສະເພາະພວມມີການພັດທະນາໄປຢ່າງບໍ່ຢຸດຢັ້ງ ຖ້າສົມທຽບໃສ່ຍຸກກ່ອນແມ່ນຕ່າງກັນປານຟ້າກັບດິນ.

ແຕ່ແນວໃດກໍຕາມ, ເມື່ອມາປຽບທຽບໃສ່ປະເທດອື່ນໆ ໂດຍສະເພາະໃນບັນດາປະເທດອາຊຽນແມ່ນເຮົາຍັງພັດທະນາບໍ່ທັນເຂົາ ປຽບເໝືອນເຮົາໄປໄດ້ຄ່າສອກແຕ່ໝູ່ພັດອອກຄ່າວາ. ຫາກຕັ້ງໂຈດກັນວ່າ ດ້ວຍສາເຫດໃດຈຶ່ງເປັນແນວນັ້ນ ຄຳຕອບກໍຄືມັນມີຫລາຍປັດໄຈ ເປັນຕົ້ນບັນຫາການຄຸ້ມຄອງລັດ, ຄຸ້ມຄອງສັງຄົມບໍ່ທັນເຂັ້ມງວດເດັດຂາດ, ມີກົດໝາຍແຕ່ປະຕິບັດກົດໝາຍບໍ່ສັກສິດ, ການສົ່ງເສີມການຜະລິດເປັນສິນຄ້າບໍ່ທັນແຂງແຮງ, ການຄຸ້ມຄອງເງິນຕາບໍ່ໄປຕາມກົນໄກຂອງກົດໝາຍ, ເສດຖະກິດຂອງລັດຍັງບໍ່ເປັນຕົວແບບ ແລະ ບໍ່ເປັນທີ່ເພິ່ງຂອງຊາດ ແລະ ປະຊາຊົນ. ນອກຈາກນັ້ນ ຍັງມີການສໍ້ລາດບັງຫລວງຢ່າງແຜ່ລາມໜັກໜ່ວງໃນຖັນແຖວພະນັກງານຂອງລັດ ແລະ ອື່ນໆ.

ເຖິງຢ່າງໃດກໍດີ, ເພື່ອແກ້ໄຂບັນຫາຕ່າງໆທີ່ກ່າວມາຂ້າງເທິງນັ້ນ ຕ້ອງໄດ້ກິນຢາປິ່ນປົວພະຍາດຫລາຍຂະໜານ ເປັນຕົ້ນຕ້ອງເລັ່ງລັດພັດທະນາໃຫ້ທັນຄືໝູ່, ແທ້ຈິງແນວທາງນະໂຍບາຍຂອງພັກ ແລະ ລັດຖະບານນັ້ນແມ່ນຖືກຕ້ອງສອດຄ່ອງແລ້ວ ແຕ່ຄານຳຄົນຜູ້ເຮັດ. ສະນັ້ນ ຕ້ອງໄດ້ເລັ່ງສ້າງຄົນໃຫ້ມີຄວາມຮູ້ຄວາມສາມາດ, ມີຄຸນສົມບັດສັດຊື່, ມີສິນທຳ, ມີວິໄສທັດກວ້າງໄກ ອັນສຳຄັນແມ່ນບໍ່ສໍ້ລາດບັງຫລວງ ການນຳທຸກຂັ້ນຕ້ອງເຫັນຜົນປະໂຫຍດຂອງຊາດເໜືອກວ່າຜົນປະໂຫຍດຂອງຕົນເອງ ແລະ ພວກພ້ອງ, ຕ້ອງເຮັດແທ້ທຳຈິງ, ເວົ້າໜ້ອຍເຮັດຫລາຍ, ເວົ້າແລ້ວຕ້ອງເຮັດຢ່າງມີປະສິດທິພາບ ແລະ ປະສິດທິຜົນ, ເລັ່ງສົ່ງເສີມການຜະລິດ, ເພິ່ງຕົນເອງກຸ້ມຕົນເອງທາງດ້ານເສດຖະກິດ, ພັດທະນາການສົ່ງອອກໃຫ້ຫລາກຫລາຍ ຄວາມດ້ອຍພັດທະນາຕ້ອງເຫີນຫ່າງຈາກເຮົາຢ່າງແນ່ນອນ.