ເກີດເຫດເຮືອບິນຕົກໃນເນປານ ມີຜູ້ເສຍຊີວິດ 16 ຄົນ

ເຈົ້າໜ້າທີ່ເນປານເປີດເຜີຍວ່າ: ເຮືອບິນຂອງສາຍການບິນເຢຕິແອລາຍ ພ້ອມຜູ້ໂດຍສານ ແລະ ຈຸບິນ 72 ຄົນ ປະສົບອຸບັດເຫດຕົກຢູ່ສະໜາມບິນໂປຂາຣາ (Pokhara) ທາງພາກກາງຂອງປະເທດເນປານໃນວັນທີ 15 ມັງກອນນີ້ ໂດຍປັດຈຸບັນພົບຜູ້ເສຍຊີວິດແລ້ວ 16 ຄົນ ແລະ ຄາດວ່າຈະພົບຜູ້ເສຍຊີວິດເພີ່ມອີກ.

ທັງນີ້, ສຳນັກຂ່າວບີບີຊີລາຍງານວ່າ: ເຮືອບິນລຳດັ່ງກ່າວມີກຳນົດການເດີນທາງຈາກນະຄອນຫລວງກາມານທຸໄປເມືອງໂປຂະຣາ ກ່ອນປະສົບອຸບັດເຫດຕົກຂະນະທີ່ເຮືອບິນກຳລັງລົງຈອດຢູ່ສະໜາມບິນໂປຂາຣາ ຈົນເຮືອບິນເກີດໄຟໄໝ້ ແຕ່ຍັງບໍ່ມີລາຍງານສາເຫດຂອງເລື່ອງທີ່ເກີດຂຶ້ນ.

ໂຄສົກສາຍການບິນເຢຕິແອລາຍລະບຸວ່າ: ເຮືອບິນລຳດັ່ງກ່າວບັນທຸກຜູ້ໂດຍສານ 68 ຄົນ ແລະ ຈຸບິນອີກ 4 ຄົນ. ປັດຈຸບັນທະຫານເນປານໄດ້ລະດົມກຳລັງເຂົ້າກູ້ໄພໃນຈຸດເກີດເຫດໃກ້ສະໜາມບິນໂປຂາຣາແລ້ວ.