ປີໃໝ່ແລ້ວ ແກ້ໄຂໃຫ້ເດັດຂາດການຈອດລົດກວມຊ່ອງທາງຈະລາຈອນ

ປັດຈຸບັນກໍຄືຜ່ານມາ, ມັກພົບເສັ້ນທາງໃນຕົວເມືອງໃຫຍ່ຕ່າງໆໂດຍສະເພາະຢູ່ນະຄອນຫລວງວຽງຈັນ ໄດ້ຖືກຫັນໄປສູ່ການບໍລິການແນວອື່ນທີ່ບໍ່ທັນຄຸ້ມຄອງຢ່າງຮັດກຸມ. ຂະນະທີ່ຜູ້ຂັບຂີ່ຍວດຍານພາຫະນະບາງທ່ານ ຂາດຈິດສຳນຶກຫລືບໍ່ ໝາຍວ່າ ຂໍພຽງແຕ່ມີບ່ອນໃດຫລົມ ບ່ອນໃດວ່າງ ພໍຈອດໄດ້ກໍຈອດ ອັນໄດ້ສ້າງຄວາມແອອັດໃຫ້ແກ່ການສັນຈອນໄປມາ ແລະ ກາຍເປັນສ່ວນໜຶ່ງກໍ່ໃຫ້ເກີດອຸບັດເຫດບົນທ້ອງຖະໜົນແລ້ວຈະແກ້ໄຂແນວໃດໃນປີ 2023?

ຄວາມຈິງແລ້ວ, ສະຖານທີ່ສາທາລະນະຕ່າງໆບໍ່ວ່າຈະເປັນຫ້າງການຄ້າ, ຕະຫລາດ…ສຳນັກງານຫ້ອງ ການທັງຂອງລັດ ແລະ ເອກະຊົນ ທີ່ມີບ່ອນຈອດລົດບໍ່ກວ້າງ, ມັກພົບເຫັນປາກົດການການຈອດລົດກິນຫລື ກວມ ຊ່ອງທາງຈະລາຈອນ, ຈອດເທິງທາງຍ່າງ… ຊຶ່ງກາຍເປັນບັນຫາແກ້ບໍ່ຕົກ ໝາຍວ່າເກີດການສັນຈອນແອອັດຂາດຄວາມເປັນລະບຽບຮຽບຮ້ອຍຂອງຕົວເມືອງ. ຂະນະທີ່ຫລາຍເສັ້ນທາງຍ່າງ ກໍມີຮ້ານຂາຍເຄື່ອງແລະ ຕັ້ງຜາມຕໍ່ເທີບອອກມາໂດຍບໍ່ສົນໃຈຫຍັງເລີຍກໍມີຖົມເຖໄປ. ຫລາຍທ່ານໃຫ້ທັດສະນະວ່າ: ການນຳໃຊ້ເສັ້ນທາງໄປເຮັດແນວອື່ນບໍ່ມີພາກສ່ວນໃດເຂົ້າໄປແກ້ໄຂເລີຍບໍ ຫລື ແກ້ໄຂແລ້ວ ແຕ່ຍັງບໍ່ສາມາດແກ້ໄຂໄດ້ ຍ້ອນຫຍັງ?

ບັນຫາເຫລົ່ານີ້ຈະເປັນແນວໃດ? ສິ່ງຫຍໍ້ທໍ້ເຫລົ່ານີ້ຈະໄດ້ຮັບການແກ້ໄຂຫລືບໍ່? ກໍຂໍໃຫ້ຂະແໜງການຮັບ ຜິດຊອບ ເຂົ້າໄປສອດສ່ອງດູແລ ເຫັນແລ້ວກໍຕ້ອງແກ້ໄຂໃຫ້ຂາດໂຕເພື່ອໃຫ້ເມືອງຫລວງເປັນລະບຽບຮຽບຮ້ອຍ, ສະອາດຈົບງາມ ແລະ ສ້າງໄດ້ຄວາມເອກອ້າງທະນົງໃຈຂອງຊາວນະຄອນຫລວງ ກໍຄືປະຊາຊົນລາວບັນດາເຜົ່າໃນທົ່ວປະເທດ ຊຶ່ງການພັດທະນາໃຫ້ເປັນເມືອງໜ້າຢູ່ບໍ່ແມ່ນການກໍ່ສ້າງຕຶກອາຄານຫລາຍຊັ້ນ, ແຕ່ແມ່ນການສ້າງຄົນໃນເມືອງໃຫ້ຮູ້ສ້າງຄວາມສະອາດຈົບງາມ ຄວາມເປັນລະບຽບຮຽບຮ້ອຍ…ນັ້ນເອງ.