ສ ເກົາຫລີ ມອບເຂົ້າສານຈ້າວ 1.300 ກວ່າໂຕນ ໃຫ້ແກ່ ສປປ ລາວ ເພື່ອນຳໄປຊ່ວຍເຫລືອປະຊາຊົນຫລາຍກວ່າ 100.000 ຄົນ
ພິທີມອບ-ຮັບ ເຂົ້າສານຈ້າວ 1.314 ໂຕນມູນຄ່າ 1,26 ລ້ານໂດລາທີ່ລັດຖະບານ ສ ເກົາຫລີ ໄດ້ມອບ ໃຫ້ແກ່ລັດຖະບານລາວ ເພື່ອນຳໄປຊ່ວຍປະຊາຊົນຜູ້ທຸກຍາກ ແລະ ຜູ້ທີ່ໄດ້ຮັບຜົນກະທົບຈາກໄພພິບັດທາງທຳມະຊາດໃນຂອບເຂດທົ່ວປະເທດ ໄດ້ຈັດຂຶ້ນໃນວັນທີ 13 ມັງກອນ 2023 ທີ່ນະຄອນຫລວງວຽງຈັນ ໂດຍທ່ານ ຢຸງ ຊູຈຸງ ເອກອັກຄະລັດຖະທູດ ສ ເກົາຫລີ ປະຈຳລາວ ມອບໃຫ້ແກ່ທ່ານນາງ ໃບຄໍາ ຂັດທິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມໂດຍມີພາກສ່ວນກ່ຽວຂ້ອງເຂົ້າຮ່ວມ.
ການມອບເຂົ້າຊ່ວຍເຫລືອດັ່ງກ່າວເພື່ອສະໜັບສະໜູນປະຊາຊົນ ສປປ ລາວ ແກ້ໄຂຜົນກະທົບດ້ານເສດ ຖະກິດຈາກການແພ່ລະບາດຂອງພະຍາດໂຄວິດ-19 ແລະ ຄວາມທ້າທາຍດ້ານງົບປະມານທີ່ເກີດຈາກວິກິດການສະບຽງອາຫານ ແລະ ນ້ຳມັນເຊື້ອໄຟໂລກ. ສາທາລະນະລັດ ເກົາຫລີ ໄດ້ສືບຕໍ່ບໍລິຈາກເຂົ້າສານເພື່ອແຈກຢາຍໃຫ້ປະຊາຊົນທີ່ດ້ອຍໂອກາດ ແລະ ຜູ້ທີ່ໄດ້ຮັບຜົນກະທົບໜັກຈາກວິກິດການດັ່ງກ່າວ ເຊິ່ງຄັ້ງນີ້ເປັນປີທີສອງຕິດຕໍ່ກັນທີ່ມອບໃຫ້ ແລະ ມາຮອດສາງນະຄອນຫລວງວຽງຈັນ ເພື່ອນຳໄປຊ່ວຍເຫລືອໃຫ້ແກ່ປະຊາຊົນຫລາຍກວ່າ 100.000 ຄົນ ໃນຂອບເຂດທົ່ວປະເທດໃນໄວໆນີ້.
ທ່ານນາງ ໃບຄຳ ຂັດຕິຍະ ກ່າວວ່າ: “ເຂົ້າສານຈາກ ສ ເກົາຫລີ ຈະສ້າງຜົນປະໂຫຍດໃຫ້ແກ່ປະຊາຊົນຢູ່ເຂດຫ່າງໄກສອກຫລີກທີ່ໄດ້ຮັບຜົນກະທົບຈາກໄພພິບັດທາງທຳມະຊາດ ເປັນຕົ້ນປະຊາຊົນຢູ່ໃນເຂດທີ່ມີຄວາມສ່ຽງສູງ ແລະ ຂໍສະແດງຄວາມຂອບໃຈສໍາລັບການສະໜັບສະໜູນຈາກສ ເກົາຫລີ ໂດຍສະເພາະໃນສະພາບແບບນີ້ທີ່ຊຸມຊົນພວມພົບກັບຄວາມຫຍຸ້ງຍາກລຳບາກ ເນື່ອງຈາກເຄື່ອງອຸປະໂພກບໍລິໂພກທີ່ມີລາຄານັບມື້ແພງຂຶ້ນເປັນຕົ້ນອາຫານ, ນໍ້າມັນເຊື້ອໄຟ ແລະ ຝຸ່ນຊີວະພາບ”.
ທູດ ສ ເກົາຫລີ ກ່າວວ່າ: ກະຊວງກະສິກຳ, ອາຫານ ແລະ ຊົນນະບົດສ ເກົາຫລີ ໄດ້ສະໜອງເຂົ້າສຸກເສີນໃຫ້ແກ່ປະເທດຕ່າງໆໂດຍຜ່ານອົງການອາຫານໂລກແຕ່ປີ 2018 ເປັນຕົ້ນມາ. ສປປ ລາວ ເປັນປະ ເທດໜຶ່ງທີ່ໄດ້ຮັບຜົນປະໂຫຍດຈາກການສະໜັບສະໜູນດັ່ງກ່າວນີ້ແຕ່ປີ 2021 ແລະ ພວກເຮົາສົນໃຈຫລາຍທີ່ຈະຊ່ວຍຮັກສາຄວາມໝັ້ນຄົງດ້ານສະບຽງອາຫານໃຫ້ແກ່ປະເທດທີ່ໄດ້ຮັບການຊ່ວຍເຫລືອ. ການສະໜັບສະໜູນດັ່ງກ່າວສອດຄ່ອງກັບນະໂຍບາຍຂອງພວກເຮົາທີ່ສືບຕໍ່ເອົາໃຈໃສ່ຮ່ວມມື ແລະ ຊ່ວຍເຫລືອບັນດາປະເທດອາຊຽນ.
