ມອບ-ຮັບ ໂຄງການ ກໍ່ສ້າງສະຖາບັນເສດຖະກິດ-ການເງິນ ດົງຄຳຊ້າງ ໄລຍະ 3 ເພື່ອສ້າງແຫລ່ງຊັບພະຍາກອນມະນຸດໃນຂົງເຂດການເງິນ-ເງິນຕາ
ພິທີມອບ-ຮັບໂຄງການກໍ່ສ້າງສະຖາບັນເສດຖະກິດ-ການເງິນ ດົງຄຳຊ້າງ ໄລຍະ 3 ໄດ້ຈັດຂຶ້ນໃນວັນທີ 11 ມັງກອນ 2023 ໂດຍທ່ານ ບຸນໂຈມ ອຸບົນປະເສີດ ລັດຖະມົນຕີກະຊວງການເງິນ, ທ່ານ ໂຮ່ ດຶກ ເຟິກ ລັດຖະມົນຕີກະຊວງການເງິນ ແຫ່ງ ສສ ຫວຽດນາມ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ບຸນໂຈມ ອຸບົນປະເສີດ ກ່າວວ່າ: ໂຄງການກໍ່ສ້າງພື້ນຖານໂຄງລ່າງສະຖາບັນເສດຖະກິດ-ການເງິນ ດົງຄຳຊ້າງ ເປັນໂຄງການກໍ່ສ້າງທີ່ມີຄວາມໝາຍສຳຄັນຫລາຍຕໍ່ການສ້າງຊັບພະຍາກອນມະນຸດໂດຍສະ ເພາະການພັດທະນາບຸກຄະລາກອນການເງິນ-ການບັນຊີອອກສູ່ສັງຄົມ ແລະ ຂະແໜງການເງິນ, ເປັນສູນກາງຝຶກອົບຮົມພະນັກງານຂະແໜງການເງິນໃນທົ່ວປະເທດ, ປະກອບສ່ວນຢ່າງຕັ້ງໜ້າພັດທະນາເສດຖະກິດ-ສັງຄົມຂອງ ສປປ ລາວ. ໂຄງການດັ່ງກ່າວ ແມ່ນໂຄງການໜຶ່ງທີ່ນອນໃນສັນຍາການຮ່ວມມືສອງລັດຖະບານ ລາວ-ຫວຽດນາມ ໂດຍນຳໃຊ້ແຫລ່ງທຶນຊ່ວຍເຫລືອລ້າຂອງລັດຖະບານຫວຽດນາມ ແລະ ແຫລ່ງທຶນສົມທົບຂອງລັດຖະບານລາວ ແລະ ຜົນສຳເລັດດັ່ງກ່າວໄດ້ມາຈາກນ້ຳໃຈສາຍພົວພັນແບບພິເສດຂອງສອງພັກ, ສອງລັດຖະບານລາວ-ຫວຽດນາມ ໂດຍສະເພາະລະຫ່ວາງກະຊວງການເງິນລາວ-ຫວຽດນາມ ທີ່ປະສານສົມທົບ ແລະ ຮ່ວມມືຊ່ວຍເຫລືອຮອບດ້ານ ແລະ ຍ້ອນຄວາມພະຍາຍາມ, ຄວາມຮັບຜິດຊອບສູງຂອງຄະນະຄຸ້ມຄອງໂຄງການ.
ຂະນະທີ່ທ່ານ ໂຮ່ ດຶກ ເຟິກ ກໍກ່າວວ່າ: ລັດຖະບານສອງປະເທດ ອະນຸຍາດໃຫ້ນຳໃຊ້ແຫລ່ງທຶນການຊ່ວຍເຫລືອລ້າຈາກລັດຖະບານຫວຽດນາມໃຫ້ແກ່ລັດຖະບານລາວ ແລະ ທຶນສົມທົບໂຄງການຂອງລັດຖະບານລາວເພື່ອຈັດຕັ້ງປະຕິບັດໂຄງການ“ກໍ່ສ້າງສະຖາບັນເສດ ຖະກິດການເງິນດົງຄຳຊ້າງ ໄລຍະ 3” ຢູ່ນະຄອນຫລວງວຽງຈັນ. ນີ້ແມ່ນການເຄື່ອນໄຫວທີ່ສຳຄັນໃນໂຄງ ການຮ່ວມມືລະຫວ່າງພັກ, ລັດຖະບານ, ກະຊວງການເງິນ ແລະ ປະຊາຊົນສອງປະເທດຫວຽດນາມ-ລາວ ໂດຍມີເປົ້າໝາຍກໍ່ສ້າງພື້ນຖານວັດຖຸຮັບໃຊ້ຍຸດທະສາດບຳລຸງສ້າງແຫລ່ງຊັບພະຍາກອນມະນຸດໃນຂົງເຂດການເງິນ-ເງິນຕາ, ມີຄຸນນະພາບ ແລະ ລະດັບການສຶກສາສູງໃຫ້ແກ່ປະເທດຊາດ ແລະ ຂະແໜງການເງິນລາວ ແລະ ເປັນການເຄື່ອນໄຫວແທດຕົວຈິງ, ສະແດງໃຫ້ເຫັນສາຍພົວພັນມິດຕະພາບ ແລະ ການ ຮ່ວມມືແບບພິເສດລະຫວ່າງ ຫວຽດນາມ ແລະ ລາວ. ເຖິງວ່າການຈັດຕັ້ງປະຕິບັດພົບຄວາມຫຍຸ້ງຍາກຫລາຍຢ່າງ ຍ້ອນການລະບາດຂອງພະຍາດໂຄວິດ-19 ແລະ ສະພາບດິນຟ້າອາກາດບໍ່ສະດວກ, ແຕ່ດ້ວຍຄວາມເອົາໃຈໃສ່ ແລະ ຊີ້ນຳຢ່າງໃກ້ຊິດຂອງກະຊວງການເງິນສອງປະເທດ ຈຶ່ງສໍາເລັດ, ຕອບສະ ໜອງໄດ້ເປົ້າໝາຍການລົງທຶນໃຫ້ກາຍເປັນສູນກໍ່ສ້າງ ແລະ ຄົນຄວ້າດ້ານການເງິນຊັ້ນນໍາແຫ່ງຊາດລາວ, ພ້ອມໃຫ້ແກ່ວຽກງານບຳລຸງສ້າງແຫລ່ງຊັບພະຍາກອນມະນຸດທີ່ມີຄຸນນະພາບດ້ານເສດຖະກິດ, ການເງິນ, ຮັບໃຊ້ພາລະກິດພັດທະນາເສດຖະກິດຂອງປະເທດລາວ ໃນປັດຈຸບັນ ແລະ ອະນາຄົດ.
