ຢູກັນດາປະກາດ “ປອດອີໂບລາ” ຫລັງຢຸດການລະບາດໄດ້ໄວ

ຢູກັນດາປະກາດຈຸດສິ້ນສຸດຂອງການແພ່ລະບາດຂອງເຊື້ອໄວຣັສອີໂບລາ ເປັນເວລາເກືອບ 4 ເດືອນ ເຖິງວ່າຈະປະສົບຄວາມລຳບາກໃນໄລຍະສັ້ນໆ, ແຕ່ທາງການສາມາດຄວບຄຸມການລະບາດໄດ້ຢ່າງວ່ອງໄວ ທ່າມກາງຂໍ້ສົງໄສຕໍ່ກໍລະນີບໍ່ມີການສັກວັກຊີນປ້ອງກັນໄວຣັສສາຍພັນດັ່ງກ່າວ.

ວັນທີ 12 ມັງກອນ, ສໍານັກຂ່າວຕ່າງປະເທດລາຍງານວ່າ: ທ່ານ ນາງ ເຈນ ຣູ ອາເຊງ ລັດຖະມົນຕີກະຊວງສາທາລະນະສຸກຢູກັນດາ ກ່າວເຖິງຜົນສໍາເລັດໃນການຄວບຄຸມການແພ່ລະບາດຂອງອີໂບລາໃນປະເທດ ຫລັງຈາກຢູກັນດາບໍ່ພົບຜູ້ຕິດເຊື້ອຄົບ 42 ວັນ ເຊິ່ງສື່ເຖິງໄລຍະຟັກຕົວ 2 ໄລຍະຂອງເຊື້ອໄວຣັສ.

“ຢູກັນດາສະແດງໃຫ້ເຫັນວ່າ: ສາມາດເອົາຊະນະອີໂບລາໄດ້ ເມື່ອທຸກລະບົບເຮັດວຽກຮ່ວມກັນ ນັບແຕ່ການມີລະບົບແຈ້ງເຕືອນ ໄປຈົນຮອດການຄົ້ນຫາ ແລະ ເບິ່ງແຍງຜູ້ໄດ້ຮັບຜົນກະທົບ ລວມທັງຄົນທີ່ສໍາຜັດຜູ້ຕິດເຊື້ອ ຕະຫລອດຈົນການມີສ່ວນຮ່ວມຢ່າງເຕັມທີ່ຂອງທ້ອງຖິ່ນທີ່ໄດ້ຮັບຜົນກະທົບໃນການຮັບມື” ທ່ານ ເທດຣອສ ແອດຮານອມ ເກເບຣເຢຊຸສ ຜູ້ອຳນວຍການອົງການອະນາໄມໂລກ ກ່າວ ແລະ ຍ້ອງຍໍຢູກັນດາສໍາລັບການຕອບສະໜອງຕໍ່ເຊື້ອໄວຣັສ.

ເຖິງວ່າປະທານາທິບໍດີ ໂຢເວຣີ ມູເຊເວນີ ຜູ້ນໍາຢູກັນດາ ກ່າວວ່າ: ຄວາມຊັກຊ້າ 2 ອາທິດໃນການປະກາດການແພ່ລະບາດ ຫລັງພົບຜູ້ເສຍຊີວິດຄົນທໍາອິດຈາກອີໂບລາ ຄື “ການເສຍໂອກາດໃນການກັກກັນຜູ້ສໍາຜັດໃນທັນທີ” ແຕ່ເຈົ້າໜ້າທີ່ສາທາລະນະສຸກ ສາມາດປີ້ນສະຖານະການການລະບາດໄດ້ພາຍໃນເດືອນພະຈິກຜ່ານມາ ຫລັງຈາກປະກາດລັອກດາວໃນເຂດທີ່ໄດ້ຮັບຜົນກະທົບ.

ຜູ້ຊ່ຽວຊານຫລາຍຄົນລະບຸວ່າ: ປະສົບການຂອງຢູກັນດາໃນການຕໍ່ສູ້ກັບການລະບາດຄັ້ງກ່ອນຂອງອີໂບລາ ແລະ ໄວຣັສມາຣ໌ເບິກ ມີສ່ວນຊ່ວຍໃນການຮັບມືໃນປັດຈຸບັນ ແຕ່ໃນທາງກົງກັນຂ້າມ ຄວາມໄວໃນການຄວບຄຸມຜູ້ຕິດເຊື້ອ ພັດເຮັດໃຫ້ຢູກັນດາບໍ່ເຄີຍດໍາເນີນການທົດລອງສັກວັກຊີນຕາມວາງແຜນໄວ້.

ເຖິງຢ່າງໃດກໍຕາມ, ນາງ ເອມີ ຟິນັນ ຜູ້ບໍລິຫານສູງສຸດຂອງສະຖາບັນວັກຊີນຊາບິນ ກ່າວວ່າ: ການກຽມພ້ອມສຳລັບການທົດລອງໄດ້ສອນບົດຮຽນຕໍ່ເຈົ້າໜ້າທີ່ສາທາລະນະສຸກ ສໍາລັບການດໍາເນີນການທົດລອງໃນອະນາຄົດ ລວມທັງການມີສ່ວນຮ່ວມຕໍ່ທ້ອງຖິ່ນ ເພື່ອຮັບມືການລະບາດທີ່ອາດເກີດຂຶ້ນໄດ້ດີຍິ່ງກວ່າເກົ່າ.