ພະແນກ ຍທຂ ແຂວງອຸດົມໄຊ ສະເໜີໃຫ້ສະຖານີລົດໄຟເມືອງໄຊ ໂຈະການເກັບເງິນຄ່າຜ່ານທາງເຂົ້າສະຖານີ

ເດືອນທັນວາ 2022 ຜ່ານມາ ສະຖານີລົດໄຟລາວ-ຈີນ ເມືອງໄຊ ແຂວງອຸດົມໄຊ ໄດ້ເກັບເງິນລົດເຂົ້າ-ອອກ ແລະ ຮັບ-ສົ່ງຜູ້ໂດຍສານ, ຍາດຕິພີ່ນ້ອງຢູ່ສະຖານີດັ່ງກ່າວແມ່ນໄດ້ເສຍຄ່າບໍລິການຜ່ານສະຖານີ ເລີ່ມຕົ້ນລົດຈັກ 3000 ກີບ/ຄັນ/ຄັ້ງ ເຮັດໃຫ້ເກີດຫາງສຽງສັງຄົມຈຳນວນບໍ່ໜ້ອຍ ແລະ ມີຄວາມຂັດແຍ່ງຕໍ່ຜູ້ມາໃຊ້ບໍລິການ.

ສະນັ້ນ, ມາຮອດວັນທີ 10 ມັງກອນ 2023 ນີ້ ພະແນກໂຍທາທິການ ແລະ ຂົນສົ່ງ ແຂວງອຸດົມໄຊ ຈຶ່ງໄດ້ອອກໃບສະເໜີເຖິງຜູ້ອຳນວຍການບໍລິສັດ ລົດໄຟລາວ-ຈີນ ເພື່ອຊ່ວຍຄົ້ນຄ້ວາພິຈາລະນາຄືນກ່ຽວກັບການເກັບເງິນຄ່າຜ່ານທາງເຂົ້າສະຖານີຜູ້ໂດຍສານ ຈຸດເມືອງໄຊ ແຂວງອຸດົມໄຊ ເນື່ອງຈາກເຫັນວ່າວິທີຈັດເກັບ ຕ່າງຈາກສະຖານີອື່ນໆ ເຊັ່ນ: ບໍ່ທັນມີຈຸດເກັບເງິນ ທີ່ຖາວອນ (ນໍາໃຊ້ເຕັ້ນຕັ້ງຈຸດເກັບເງິນ), ເວລາ ລົດຜ່ານເຂົ້າສະຖານີເກັບທຸກຄັນ ບໍ່ຍົກເວັ້ນລົດເຂົ້າສົ່ງຜູ້ໂດຍສານທີ່ນໍາໃຊ້ເວລາບໍ່ເກີນ 10 ນາທີ, ອັນໄດ້ກໍ່ໃຫ້ເກີດມີຫາງສຽງສັງຄົມຈໍານວນບໍ່ໜ້ອຍຕໍ່ການຄຸ້ມຄອງຂອງຂະແໜງການໂຍທາທິການ ແລະ ຂົນສົ່ງ ແລະ ບໍລິສັດລົດໄຟ ລາວ-ຈີນ ເອງ, ເພື່ອເປັນການແກ້ໄຂບັນຫາດັ່ງກ່າວ ສະເໜີມາຍັງທ່ານຊ່ວຍຄົ້ນຄ້ວາພິຈາລະນາດັ່ງລຸ່ມນີ້:

1. ໃຫ້ບໍລິສັດລົດໄຟລາວ-ຈີນ ແຈ້ງໂຈະການເກັບເງິນຊົ່ວຄາວ ຈົນກ່ວາບໍລິສັດລົດໄຟລາວ-ຈີນ ອອກຂໍ້ຕົກລົງການຈັດເກັບຄ່າຜ່ານທາງເຂົ້າສະຖານີ ແລະ ແຈ້ງໃຫ້ອົງການປົກຄອງແຂວງ ໂດຍສະເພາະແມ່ນພະແນກ ຍທຂ ແຂວງ ເພື່ອຈະໄດ້ສຶບຕໍ່ແຈ້ງໃຫ້ສັງຄົມຮັບຮູ້ ແລະ ເຂົ້າໃຈຢ່າງທົ່ວເຖິງ, ຈຶ່ງດໍາເນີນດໍາເນີນການຈັດເກັບ;
2. ປະຕິບັດອັດຕາການເກັບ ແລະ ຮູບແບບການເກັບຄືກັບສະຖານີອື່ນ ເປັນຕົ້ນລົດທີ່ເຂົ້າໄປໃນສະຖານີ ບໍ່ເກີນ 10 ນາທີ ແມ່ນບໍ່ໃຫ້ເກັບ.

ສະນັ້ນ, ຈຶ່ງໄດ້ສະເຫນີມາຍັງທ່ານ ຄົ້ນຄ້ວາ ພິຈາລະນາ ຕາມການສະເໜີນີ້ດ້ວຍ.