ປະທານາທິບໍດີຟີລິບປິນຍອມ ສະຫລະຊີວິດຕົວປະກັນຢູ່ມາລາວີ ໃຫ້ກອງທັບລະເບີດຖານທີ່ໝັ້ນກຸ່ມກໍ່ການຮ້າຍ
ປະທານາທິບໍດີ ໂຣດຣິໂກ ດູເຕີເຕ ຂອງຟີລິບປິນ ເປີດເຜີຍວ່າ: ທ່ານມອບອຳນາດໃຫ້ກອງທັບເປັນຝ່າຍຕັດສິນໃຈເອງວ່າຈະລະເບີດມັດສະຍິດ ເຊິ່ງເປັນຖານທີ່ໝັ້ນສຸດທ້າຍຂອງກຸ່ມຕິດອາວຸດຢູ່ເມືອງມາລາວີທາງຕອນໃຕ້ຂອງປະເທດ ຫລື ບໍ່ ເພື່ອຢຸດການສູ້ຮົບທີ່ຍືດເຍື້ອມາກວ່າ 100 ວັນ.
ປະທານາທິບໍດີ ດູເຕີເຕ ກ່າວວ່າ: ຄວາມອົດທົນຂອງທ່ານມີຂີດຈຳກັດ ແລະ ບໍ່ສາມາດປ່ອຍໃຫ້ສະຖານະການການສູ້ຮົບຍືດເຍື້ອຕໍ່ໄປໄດ້, ຈາກນີ້ກອງທັບຈະເປັນຜູ້ຕັດສິນໃຈເລືອກໃຊ້ແນວທາງຕາມຄວາມເໝາະສົມໃນການທວງຄືນເມືອງມາລາວີຈາກກຸ່ມຕິດອາວຸດ.
+ ຈຳນວນຜູ້ເສຍຊີວິດຢູ່ເມືອງມາລາວີ ຂອງຟີລິບປິນສູງເຖິງ 500 ຄົນແລ້ວ
+ ປະທານາທິບໍດີຟີລິບປິນເລັ່ງໃຊ້ກົດໄອຍະການເສິກແກ້ໄຂບັນຫາພາຍໃນປະເທດ
ທ່ານ ດູເຕີເຕ ຍອມຮັບວ່າ: ກ່ອນໜ້ານີ້ ທ່ານເປັນຜູ້ເຮັດໃຫ້ເຫດການຢູ່ເມືອງມາລາວີຕ້ອງຍືດເຍື້ອ ເພາະບໍ່ເຫັນພ້ອມກັບແຜນລະເບີດມັດສະຍິດຂອງກອງທັບ ເພື່ອຈັບກຸມ ແລະ ສັງຫານແກນນຳກຸ່ມນັກຮົບຈີຮັດ, ແຕ່ຕ້ອງແລກກັບການເສຍສະຫລະຊີວິດຂອງຕົວປະກັນຊາວຟີລິບປິນທີ່ຍັງຖືກຈັບກຸມຢູ່ພາຍໃນ. ທ່ານເຫັນວ່າ: ການກະທຳໃນລັກສະນະນີ້ມີແຕ່ຈະສ້າງຄວາມກຽດຊັງ ແລະ ສ້າງສັດຕູໃຫ້ແກ່ລັດຖະບານເພີ່ມຂຶ້ນ ສົ່ງຜົນໃຫ້ສະຖານະການຢູ່ເມືອງມາລາວີເດີນທາງມາເຖິງທາງຕັນ.
