ທ່ານ ໄບເດນ ກຽມຖືກກວດສອບ ຫລັງພົບ ເອກະສານລັບຊຸດທີ 2 ຢ້ານລະເມີດ ກົດໝາຍ-ກະທົບຄວາມໝັ້ນຄົງອາເມລິກາ

ວັນທີ 11 ມັງກອນ, ສໍານັກຂ່າວຕ່າງປະເທດລາຍງານວ່າ: ຜູ້ຊ່ວຍປະທານາທິບໍດີ ໂຈ ໄບເດນ ຂອງອາເມລິກາ ພົບເອກະສານລັບຂອງທາງການຊຸດທີ 2 ພາຍໃນສະຖານທີ່ທີ 2 ຕໍ່ຈາກເອກະສານລັບຊຸດທໍາອິດທີ່ພົບໃນບ່ອນເຮັດວຽກສ່ວນຕົວໃນນະຄອນຫລວງວໍຊິງຕັນ ບ່ອນທີ່ທ່ານ ໄບເດນ ເຄີຍໃຊ້ເຮັດວຽກຫລັງຈາກພົ້ນຈາກຕຳແໜ່ງຮອງປະທານາທິບໍດີໃນຍຸກທ່ານ ບາຣັກ ໂອບາມາ ສົ່ງຜົນໃຫ້ຜູ້ນໍາອາເມລິກາຄົນປັດຈຸບັນອາດກຽມຖືກກວດສອບຈາກຄະນະກໍາມາທິການຂອງລັດຖະສະພາ ຢ້ານລະເມີດກົດໝາຍ ແລະ ກະທົບຄວາມໝັ້ນຄົງອາເມລິກາ.

ໂດຍກະຊວງຍຸຕິທໍາຂອງອາເມລິກາ ໄດ້ເລີ່ມພິຈາລະນາກ່ຽວກັບບັນຫາດັ່ງກ່າວແລ້ວ ເຊິ່ງກໍລະນີດັ່ງກ່າວເກີດຂຶ້ນຫລັງຈາກອະດີດປະທານາທິບໍດີ ໂດນັລ ທຣໍາ ຖືກສອບສວນຈາກກໍລະນີທີ່ທ່ານຖືກກ່າວຫາວ່າແກ້ໄຂເອກະສານລັບແບບບໍ່ຖືກຕ້ອງເໝາະສົມເຊັ່ນກັນ ເນື່ອງຈາກພົບເອກະສານລັບຂອງທາງການຢູ່ພາຍໃນລີສອດສ່ວນຕົວຂອງທ່ານ ທຣໍາ ໃນປາມບີດ ລັດຟໍຣິດາ ຫລັງຈາກພົ້ນຈາກຕໍາແໜ່ງປະທານາທິບໍດີ.

ເບື້ອງຕົ້ນຍັງບໍ່ຮູ້ແນ່ນອນວ່າເອກະສານລັບຊຸດໃໝ່ທີ່ຫາກໍຄົ້ນພົບນີ້ພົບຕອນໃດ ແລະ ພົບຢູ່ໃສ ໂດຍເອກະສານລັບຊຸດທໍາອິດປະມານ 10 ສະບັບຂອງທ່ານ ໄບເດນ ຖືກພົບພາຍໃນສູນວິໄຈເພນ ໄບເດນ ເຊິ່ງຢູ່ບໍ່ໄກຈາກທຳນຽບຂາວ ໃນເດືອນພະຈິກຜ່ານມາ ແຕ່ເລື່ອງດັ່ງກ່າວຫາກໍໄດ້ຮັບການເປີດເຜີຍໃນອາທິດນີ້.

ໂດຍເອກະສານເຫລົ່ານັ້ນສ່ວນຫລາຍເປັນຂໍ້ມູນລັບຂອງລັດຖະບານ ແລະ ບັນທຶກຂ່າວລັບອາເມລິກາ ລວມທັງມີເອກະສານລາຍງານສະຫລຸບກ່ຽວກັບຢູເຄຣນ, ອີຣານ ແລະ ອັງກິດ ເຊິ່ງເບື້ອງຕົ້ນທໍານຽບຂາວຍັງບໍ່ໄດ້ສະແດງຄວາມຄິດເຫັນໃດໆຕໍ່ການຄົ້ນພົບເອກະສານລັບຊຸດທີສອງ. ພ້ອມລະບຸວ່າສິ່ງນີ້ກໍາລັງຢູ່ລະຫວ່າງການກວດສອບຂອງກະຊວງຍຸຕິທໍາອາເມລິກາ.

ທ່ານ ໄບເດນ ກ່າວວ່າ: ທ່ານຮູ້ສຶກປະຫລາດໃຈທີ່ມີຜູ້ພົບເອກະສານລັບດັ່ງກ່າວ ພ້ອມກໍາລັງໃຫ້ການຮ່ວມມືຕໍ່ກະຊວງຍຸຕິທໍາໃນການກວດສອບເອກະສານ ແລະ ສິ່ງທີ່ເກີດຂຶ້ນ ໂດຍຫລາຍຝ່າຍຄາດວ່າທ່ານ ໄບເດນ ຈະຕ້ອງຜະເຊີນແຮງກົດດັນ ແລະ ການກວດສອບຂໍ້ມູນຄວາມຈິງຢ່າງເຂັ້ມງວດຈາກບັນດາສະມາຊິກສະພາຜູ້ແທນລາສະດອນສຽງສ່ວນຫລາຍຈາກພັກຣີພັບລິກັນ.

ອ້າງອີງ:

https://www.nbcnews.com/…/biden-aides-find-second-batch…

https://www.bbc.com/news/world-us-canada-64244007

https://edition.cnn.com/…/biden-classified…/index.html