ປີ 2022 ເສດຖະກິດນະຄອນຫລວງວຽງຈັນ ຂະຫຍາຍຕົວ 4,83% ຂອງ GDP
ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫລວງວຽງຈັນ ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມປີ 2022 ຕໍ່ກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນນະ ຄອນຫລວງວຽງຈັນ ຊຸດທີ II ໃນວັນທີ 11 ມັງກອນ 2023 ວ່າ: ປີ 2022 ເປັນປີຢູ່ໃນເງື່ອນໄຂສະພາບການຂອງໂລກ ແລະ ພາກພື້ນ ຍັງສືບຕໍ່ຜັນແປຢ່າງສັບສົນລວມທັງການລະບາດຂອງພະຍາດໂຄວິດ-19, ຄວາມຂັດແຍ່ງດ້ານການເມືອງ ແລະ ເສດຖະກິດບາງປະເທດ ເຮັດໃຫ້ເສດຖະກິດໂລກຫລຸດລົງ 6% ໃນປີ 2021 ມາຢູ່ໃນລະດັບ 3,2% ປີ 2022. ແນວໃດກໍດີເຖິງວ່ານະຄອນຫລວງວຽງຈັນຍັງສືບຕໍ່ຜະເຊີນກັບຄວາມຫຍຸ້ງຍາກ ແລະ ສິ່ງທ້າທາຍຫລາຍດ້ານ ໂດຍສະເພາະຄວາມຫຍຸ້ງຍາກດ້ານເສດຖະກິດ-ການເງິນ ທີ່ສະສົມມາຫລາຍປີ, ການອ່ອນຄ່າຂອງເງິນກີບ, ການລະບາດຂອງພະຍາດໂຄວິດ-19, ການສົ່ງອອກສິນຄ້າໄປປະເທດໃກ້ຄຽງ, ສະພາບລາຄາສິນຄ້າ ແລະ ນໍ້າມັນເຊື້ອໄຟເໜັງຕີງເພີ່ມຂຶ້ນ, ແຕ່ຜ່ານການຈັດຕັ້ງປະຕິບັດ 94 ຄາດໝາຍທີ່ສະພາປະຊາຊົນ ນະຄອນຫລວງວຽງຈັນຮັບຮອງໃນປີ 2022 ເຫັນວ່າລື່ນຄາດໝາຍ 74 ຄາດໝາຍ.
ເຈົ້າຄອງນະຄອນຫລວງວຽງຈັນ ໃຫ້ຮູ້ຕື່ມວ່າ: ປີ 2022 ເສດຖະກິດຂອງນະຄອນຫລວງວຽງຈັນ ຂະ ຫຍາຍຕົວໃນລະດັບ 4,83% (ແຜນດັດແກ້ 4,36%, ແຜນສູ້ຊົນ 6,5%), ລວມຍອດຜະລິດຕະພັນພາຍໃນ (GDP) ບັນລຸ 62.243,93 ຕື້ກີບ (ແຜນການດັດແກ້ 58.412,26 ຕື້ກີບ, ຄາດໝາຍສູ້ຊົນ 63.076 ຕື້ກີບ), GDP ສະເລ່ຍຕໍ່ຫົວຄົນ 62,91 ລ້ານກີບ (ມະຕິສະພາດັດແກ້ 60,28 ລ້ານກີບ); ໃນນີ້ຂະແໜງ ກະສິກຳ ຂະຫຍາຍຕົວເພີ່ມຂຶ້ນ 3,91% ກວມເອົາ 13,77% ຂອງ GDP; ຂະແໜງອຸດສາຫະກຳ ຂະ ຫຍາຍຕົວເພີ່ມຂຶ້ນ 6,54% ກວມເອົາ 49,05% ຂອງ GDP; ຂະແໜງການບໍລິການຂະຫຍາຍຕົວ ເພີ່ມຂຶ້ນ 2,52% ກວມເອົາ 36,36% ຂອງ GDP. ຂະນະທີ່ລາຍຮັບງົບປະມານ ກໍຈັດເກັບໄດ້ 5.610,32 ຕື້ກີບ ເທົ່າກັບ 100,25% ຂອງແຜນການປີ 2022 (ມະຕິສະພາ 5.596,26 ຕື້ກີບ) ທຽບໃສ່ປີ 2021 ເພີ່ມຂຶ້ນ 20,85% ຫລື ເທົ່າກັບ 967,82 ຕື້ກີບ; ດ້ານການດຶງດູດການລົງທຶນປະຕິບັດໄດ້ 20.165,68 ຕື້ກີບ ລື່ນແຜນການ 53%.
