ທາງການແຄລິຟໍເນຍປະກາດເຕືອນນ້ຳຖ້ວມໃຫຍ່ ພົນລະເມືອງປະມານ 90% ຂອງລັດຢູ່ໃນສະພາບເຝົ້າລະວັງ
ສຳນັກຂ່າວຕ່າງປະເທດລາຍງານວ່າ: ເນື້ອທີ່ສ່ວນຫລາຍຂອງລັດແຄລິຟໍເນຍຂອງອາເມລິກາບໍ່ສາມາດຮອງຮັບນ້ຳຝົນໄດ້ອີກຕໍ່ໄປ ເນື່ອງຈາກປະລິມານນ້ຳຝົນທີ່ຕົກລົງມາຢ່າງໜັກກ່ອນໜ້ານີ້, ແຕ່ລັດແຄລິຟໍເນຍຍັງຕ້ອງຜະເຊີນພາຍຸຝົນ ແລະ ລົມພັດແຮງຢ່າງຕໍ່ເນື່ອງ ເຮັດໃຫ້ກະແສໄຟຟ້າມອດ ແລະ ສະພາບການເດີນທາງບໍ່ຄ່ອຍດີ.
ທາງການແຄລິຟໍເນຍປະກາດເຕືອນນ້ຳຖ້ວມໃຫຍ່ ສົ່ງຜົນໃຫ້ພົນລະເມືອງຫລາຍກວ່າ 34 ລ້ານຄົນ ຫລື ປະມານ 90% ຂອງປະຊາກອນໃນລັດແຄລິຟໍເນຍ ແລະ 10% ຂອງປະຊາກອນທົ່ວອາເມລິກາ ຕົກຢູ່ພາຍໃນສະພາບເຝົ້າລະວັງ.
ສູນພະຍາກອນອາກາດລາຍງານວ່າ: ເນື້ອທີ່ບາງສ່ວນຂອງຊາຍຝັ່ງແຄລິຟໍເນຍຕອນກາງມີຝົນຕົກ 1-1,25 ນິ້ວຕໍ່ຊົ່ວໂມງ ໂດຍປະລິມານນ້ຳຝົນທີ່ຕົກລົງມາຢ່າງໜັກໃນວັນທີ 9 ມັງກອນຜ່ານມາ ເຮັດໃຫ້ເກີດນ້ຳຖ້ວມໜັກ, ດິນເຈື່ອນ, ຕະກອນໄຫລ ແລະ ເສັ້ນທາງສັນຈອນຖືກຕັດຂາດ.
ສຳນັກງານບໍລິການສະພາບອາກາດແຫ່ງຊາດອາເມລິກາ (NWS) ໄດ້ປະກາດເຕືອນເຖິງຄວາມສ່ຽງທີ່ອາດຈະເກີດນ້ຳຖ້ວມໃຫຍ່ ລວມທັງບັນຫາດິນເຈື່ອນ ໂດຍຄຳເຕືອນດັ່ງກ່າວມີຜົນບັງຄັບໃຊ້ໃນເຂດຕົວເມືອງລອດແອນເຈລິສ ເຊິ່ງຄວບຄຸມທີ່ພັກອາໄສຂອງຄົນກວ່າ 7 ລ້ານຄົນໃນລັດແຄລິຟໍເນຍ ນັບແຕ່ເຊົ້າວັນທີ 9 ມັງກອນຜ່ານມາໄປຈົນຮອດທ່ຽງຄືນຕາມເວລາທ້ອງຖິ່ນ.
ອ້າງອີງ:
https://edition.cnn.com/2023/01/09/us/california-flooding-atmospheric-river-monday/index.html