ອາເມລິກາໂຈມຕີທາງອາກາດ ຢູ່ອັບການິດສະຖານ ພົນລະເຮືອນເສຍຊີວິດ 13 ຄົນ
ພົນລະເຮືອນຢ່າງໜ້ອຍ 13 ຄົນເສຍຊີວິດ ແລະ ຍັງມີຜູ້ໄດ້ຮັບບາດເຈັບອີກ 15 ຄົນ ຈາກປະຕິບັດການໂຈມຕີທາງອາກາດຂອງອາເມລິກາ ໃນພື້ນທີ່ທາງຕາເວັນອອກຂອງອັບການິດສະຖານ.
ສຳນັກຂ່າວ AFP ລາຍງານຈາກນະຄອນຫລວງກາບູນ ປະເທດອັບການິດສະຖານ ໃນວັນທີ 31 ສິງຫານີ້ວ່າ: ທາງການແຂວງໂລກາ ທີ່ຢູ່ທາງຕາເວັນອອກຂອງອັບການິດສະຖານ ແລະ ຢູ່ບໍ່ຫ່າງຈາກນະຄອນຫລວງກາບູນ ເຊິ່ງເປັນເມືອງຫລວງຂອງປະເທດ ລາຍງານການເສຍຊີວິດຂອງພົນລະເຮືອນຢ່າງໜ້ອຍ 13 ຄົນ ເຊິ່ງເປັນສະມາຊິກໃນຄອບຄົວດຽວກັນ, ຫລັງເຮືອບິນຮົບຂອງກອງທັບອາເມລິກາເຂົ້າມາປະຕິບັດການໂຈມຕີທາງອາກາດ ໃນວັນທີ 30 ສິງຫາ. ນອກຈາກນີ້ ຍັງສົ່ງຜົນໃຫ້ມີຜູ້ໄດ້ຮັບບາດເຈັບອີກ 15 ຄົນ, ແຕ່ລາຍງານບາງບ່ອນເປີດເຜີຍວ່າ: ມີຜູ້ເສຍຊີວິດຫລາຍກວ່າ 20 ຄົນ ແລະ ໃນຈຳນວນນີ້ອາດຈະມີສະມາຊິກຂອງກຸ່ມຕາລີບັນພຽງ 2 ຄົນເທົ່ານັ້ນ.
ຂະນະທີ່ກອງທັບອາເມລິກາ ເຊິ່ງເປັນກອງກຳລັງຕ່າງປະເທດພຽງປະເທດດຽວທີ່ປະຕິບັດການທາງທະຫານຢ່າງເປີດເຜີຍຢູ່ອັບການິດສະຖານ ອອກຖະແຫລງການສະແດງຄວາມເສຍໃຈໄປຫາຄອບຄົວຂອງຜູ້ເສຍຊີວິດ ແລະ ໄດ້ຮັບບາດເຈັບ, ພ້ອມທັງຢືນຢັນຈະສືບສວນເຫດການທີ່ເກີດຂຶ້ນຢ່າງລະອຽດ ເຊິ່ງເກີດຂຶ້ນພຽງ 3 ອາທິດ ຫລັງລັດຖະບານອັບການິດສະຖານກ່າວຫາປະຕິບັດການໂຈມຕີທາງອາກາດຂອງອາເມລິກາເປັນເຫດໃຫ້ພົນລະເມືອງເສຍຊີວິດ 11 ຄົນ ຢູ່ແຂວງນັກກາຮາທີ່ຢູ່ໃກ້ກັນ, ແຕ່ອາເມລິກາຍັງຢືນຢັນປະຕິເສດກໍລະນີດັ່ງກ່າວ.
ທັງນີ້, ລາຍງານຂອງສະຫະປະຊາຊາດ (UN) ລະບຸຈຳນວນພົນລະເຮືອນເສຍຊີວິດຈາກເຫດຮຸນແຮງຢູ່ອັບການິດສະຖານ ມີຢ່າງໜ້ອຍ 1.662 ຄົນໃນໄລຍະ 6 ເດືອນທຳອິດຂອງປີນີ້ ແລະ ໄດ້ຮັບບາດເຈັບອີກ 3.500 ຄົນ. ຖືເປັນສະຖິຕິສູງທີ່ສຸດນັບແຕ່ປີ 2009. ນອກຈາກນີ້ ຍັງມີເຈົ້າໜ້າທີ່ຝ່າຍຄວາມໝັ້ນຄົງຂອງອັບການິດສະຖານຫລາຍກວ່າ 2.500 ຄົນເສຍຊີວິດໃນໄລຍະເວລາດຽວກັນ.
