ປີ 2022 ການສົ່ງອອກຂອງກຳປູເຈຍ ຂະຫຍາຍຕົວ 16,4%

ຂ່າວຕ່າງປະເທດລາຍງານ ເມື່ອວັນທີ 10 ມັງກອນ ຜ່ານມາ, ກົມພາສີ ແລະ ອາກອນທົ່ວໄປຂອງກຳປູເຈຍໄດ້ເປີດເຜີຍວ່າ ກຳປູເຈຍໄດ້ສົ່ງອອກສິນຄ້າຄິດເປັນມູນຄ່າ 2,24 ໝື່ນລ້ານໂດລາ ໃນປີ 2022 ເພີ່ມຂຶ້ນປະມານ 16,4% ຈາກລະດັບ 1,93 ໝື່ນລ້ານໂດລາ ໃນປີ 2021.

ບົດລາຍງານລະບຸວ່າ ຜະລິດຕະພັນທີ່ສົ່ງອອກຫຼັກໄດ້ແກ່ ເຄື່ອງນຸ່ງຫົ່ມ, ເກີບ, ສິນຄ້າເພື່ອການເດີນທາງ, ລົດຖີບ ແລະ ສິນຄ້າການກະເສດຈຳນວນໜຶ່ງໄດ້ແກ່ ເຂົ້າ, ຢາງພາຣາ, ມັນຕົ້ນ, ກ້ວຍ ແລະ ໝາກມ່ວງ ໂດຍຈຸດໝາຍສົ່ງອອກຫຼັກ 5 ອັນດັບໄດ້ແກ່ ອາເມຣິກາ, ຫວຽດນາມ, ຈີນ, ຍີ່ປຸ່ນ ແລະ ການາດາ. ຂະນະດຽວກັນ, ກຳປູເຈຍໄດ້ລາຍງານມູນຄ່າການນຳເຂົ້າທັງໝົດ 2,99 ໝື່ນລ້ານໂດລາ ໃນປີ 2022 ເພີ່ມຂຶ້ນປະມານ 4,3% ຈາກ 2,87 ໝື່ນລ້ານໂດລາ ໃນປີ 2021 ໂດຍສິນຄ້ານຳເຂົ້າຫຼັກໄດ້ແກ່ ນຳມັນ ແລະ ແກັສ, ວັດຖຸດິບສຳລັບເຄື່ອງນຸ່ງຫົ່ມ, ເກີບ, ສິນຄ້າເພື່ອການເດີນທາງ, ຍານພາຫະນະ, ເຄື່ອງຈັກ, ອຸປະກອນເອເລັກໂຕຣນິກ, ສິນຄ້າອຸປະໂພກບໍລິໂພກ ແລະ ອື່ນໆ. ທ່ານ ເພັນ ໂສວິຊິດ ໂຄສົກ ແລະ ຮອງລັດຖະມົນຕີກະຊວງການຄ້າຂອງກຳປູເຈຍລະບຸວ່າ ຂໍ້ຕົກລົງຫຸ້ນສ່ວນທາງດ້ານເສດຖະກິດລະດັບພາກພື້ນ (RCEP) ແລະ ຂໍ້ຕົກລົງການຄ້າເສລີກຳປູເຈຍ-ຈີນ (CCFTA) ຊຶ່ງມີຜົນບັງຄັບໃຊ້ນັບຕັ້ງແຕ່ວັນທີ 1 ມັງກອນ 2022 ລ້ວນແຕ່ເປັນແຮງກະຕຸ້ນສຳຄັນຕໍ່ການເຕີບໂຕທາງດ້ານການຄ້າຂອງປະເທດ ແລະ ມີປະໂຫຍດຢ່າງຫຼວງຫຼາຍ ເນື່ອງຈາກເຮັດໃຫ້ກຳປູເຈຍເຂົ້າເຖິງຕະຫຼາດຂະໜາດໃຫຍ່ຂຶ້ນດ້ວຍສິດທິພິເສດທາງດ້ານພາສີອາກອນ.

ທ່ານ ເພັນ ໂສວິຊິດ ກ່າວວ່າ: ການຮ່ວມມືທັງສອງຝ່າຍເປັນໂຕເລັ່ງການຂະຫຍາຍຕົວທາງດ້ານການຄ້າຂອງກຳປູເຈຍໃນໄລຍະຍາວ ແລະ ຍືນຍົງ, ເປັນແມ່ເຫຼັກດຶງດູດການລົງທຶນໂດຍກົງຈາກຕ່າງປະເທດມາຍັງກຳປູເຈຍພ້ອມທັງເປີດເຜີຍວ່າ ຄວາມເຊື່ອໝັ້ນການຄ້າຂອງກຳປູເຈຍຈະຂະຫຍາຍຂຶ້ນໄປອີກໃນປີນີ້ ແລະ ປີຕໍ່ໆໄປ. ອີກຢ່າງໜຶ່ງ, ຂໍ້ຕົກລົງ RCEP ທີ່ປະກອບດ້ວຍ 15 ປະເທດໃນອາຊີ-ປາຊີຟິກ ຊຶ່ງລວມ 10 ປະເທດສະມາຊິກອາຊຽນພ້ອມດ້ວຍຄູ່ການຄ້າອີກ 5 ປະເທດໄດ້ແກ່ ຈີນ, ຍີ່ປຸ່ນ, ສ ເກົາຫຼີ, ອົສຕຣາລີ ແລະ ນູແວນເຊລັງ.