ຢາກໃຫ້ເງິນກີບແຂງຄ່າຕ້ອງເລັ່ງແກ້ໄຂບັນຫາເສດຖະກິດ-ການເງິນໃຫ້ເຕີບໃຫຍ່ແຂງແຮງ
ໂດຍ: ທິດກໍ່າ
ໃນວາລະກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ທີ່ຫາກໍປິດລົງເມື່ອວັນທີ 22 ທັນວາ 2022 ຜ່ານມາ, ມີຜູ້ແທນສະພາແຫ່ງຊາດຫລາຍທ່ານໄດ້ສະເໜີຕໍ່ລັດຖະບານໃນຫລາຍບັນຫາ ໂດຍສະເພາະແມ່ນໃຫ້ເລັ່ງແກ້ໄຂບັນຫາເສດຖະກິດ-ການເງິນທີ່ຍັງເປັນແອກເຕັງຄໍຕໍ່ເນື່ອງມາໄດ້ຫລາຍປີ, ໜຶ່ງໃນຂົງເຂດດັ່ງກ່າວກໍໄດ້ມຸ່ງເປົ້າກ້ຽວກອດໄປໃສ່ທະນາຄານ ໂດຍໃຫ້ເລັ່ງແກ້ໄຂບັນຫາເງິນເຟີ້ຢ່າງໜັກ ເຊິ່ງມາຮອດເດືອນທັນວາ 2022 ລະດັບເງິນ ເຟີ້ຂອງລາວພຸ່ງເປັນ 39,27% ແລະ ໃນສະເພາະໜ້າກໍບໍ່ຮູ້ວ່າເງິນກີບລາວຍັງຈະອ່ອນຄ່າໄປອີກຈັກເປີເຊັນ ແລະ ອີກຈັກເດືອນຈັກປີມັນຈຶ່ງຈະຫວນກັບມາແຂງຄ່າຄົງທີ່ເໝືອນດັ່ງສະກຸນເງິນອື່ນໆຂອງບັນດາປະເທດອ້ອມຂ້າງ.
ເວົ້າເຖິງເງິນກີບອ່ອນຄ່າ ຜູ້ຂຽນບໍ່ແມ່ນນັກເສດຖະສາດ, ແຕ່ກໍພໍເດົາອອກວ່າ ເງິນກີບລາວອາດຈະເດີນໜ້າອ່ອນຄ່າໄປອີກ ຖ້າຫາກເສດຖະກິດຂອງປະເທດເຮົາຍັງຕົກຢູ່ໃນສະພາບດ້ອຍພັດທະນາຄືດັ່ງທຸກວັນນີ້ ໃນເມື່ອເງິນກີບອ່ອນຄ່າໄປເທົ່າໃດ ສິ່ງຕາມມາກໍຄືສິນຄ້ານັບມື້ມີລາຄາແພງຢ່າງບໍ່ຢຸດຢ່ອນ ອັນເປັນການກະທົບໂດຍກົງຕໍ່ຊີວິດການເປັນຢູ່ໂດຍກົງຂອງປະຊາຊົນບັນດາເຜົ່າ.
ຢ່າງໃດກໍດີ, ໃນສະເພາະໜ້າ ແລະ ຍາວນານ ເພື່ອໃຫ້ເງິນກີບລາວຫວນກັບມາແຂງຄ່າໄດ້ນັ້ນ ທາງອອກທີ່ດີມັນກໍພໍມີຢູ່ຫລາຍປັດໄຈພື້ນຖານ ເປັນຕົ້ນ
ອັນທີໜຶ່ງຕ້ອງເລັ່ງພັດທະນາເສດຖະກິດໃຫ້ເຕີບໃຫຍ່ແຂງແຮງ, ຈຸດໜັກແມ່ນເລັ່ງໃສ່ການຜະລິດຂະໜາດນ້ອຍ-ຂະໜາດກາງໃຫ້ຫລາກຫລາຍແຂງແຮງ, ການສົ່ງອອກຕ້ອງຫລາຍກວ່າການນຳເຂົ້າ ທັງສາມາດແກ້ງແຍ່ງເປັນຄູ່ແຂ່ງກັບບັນດາປະເທດອ້ອມຂ້າງໄດ້ໃນລະດັບທີ່ແນ່ນອນ.
ອັນທີສອງ ສິນຄ້າອັນໃດທີ່ເຮົາຜະລິດໄດ້ແມ່ນຫ້າມນຳເຂົ້າເດັດຂາດ, ຖ້າບຸກຄົນ ຫລື ນິຕິບຸກຄົນໃດລະເມີດຕ້ອງປັບໃໝໃສ່ໂທດຕາມກໍລະນີໜັກ ຫລື ເບົາ ທັງເຂັ້ມງວດເດັດຂາດ.
ອັນທີສາມ ແມ່ນມີວິທີການປຸກລະດົມນໍ້າໃຈຮັກຊາດແກ່ຄົນລາວເຮົາໃຫ້ມີນໍ້າໃຈຮັກຊາດຫັນມາຊົມໃຊ້ຜະລິດຕະພັນສິນຄ້າລາວທີ່ເຮົາຜະລິດເອງໄດ້ໃຫ້ຫລວງຫລາຍ ເງິນຕາຈຶ່ງບໍ່ຮົ່ວໄຫລໄປປະເທດເພື່ອນບ້ານຄືດັ່ງທຸກວັນນີ້ ໂດຍສະເພາະແມ່ນປະເທດໄທ.
ອັນທີສີ່ ເບື້ອງກົດໝາຍຕ້ອງເຂັ້ມງວດເດັດຂາດ, ຜູ້ຄຸ້ມຄອງກົດໝາຍຕ້ອງເຮັດແທ້ທຳຈິງ, ເວົ້າໄດ້ຕ້ອງເຮັດໄດ້, ເວົ້າໜ້ອຍເຮັດຫລາຍ, ເວົ້າແລ້ວຕ້ອງເຮັດ, ບໍ່ໃຫ້ແກ້ຕົວ ຫລື ຕົວະປະຊາຊົນ.
ຖ້າເຮັດໄດ້ໃນສີ່ປັດໄຈພື້ນຖານນີ້ ເງິນລາວຈະຫວນມາແຂງຄ່າແບບໝັ້ນຄົງຍືນຍົງກັບຄົນລາວຢ່າງແນ່ນອນໂດຍບໍ່ຕ້ອງສົງໄສ ສະນັ້ນ, ຢາກໃຫ້ເຮັດໄດ້ ກໍຕ້ອງຮຍກຮ້ອງໃຫ້ທຸກຄົນໃນສັງຄົມເປັນນໍ້ານຶ່ງໃຈດຽວ ພ້ອມແກ້ ກໍຕ້ອງພ້ອມກັນຜ່ານພົ້ນວິກິດອັນໂຫດຮ້າຍຍີ້ໄປພ້ອມກັນໄດ້.
