ປີໃໝ່ພ້ອມກັນສ້າງທ່າຫັນປ່ຽນທີ່ຕັ້ງໜ້າເພື່ອປົກປັກຮັກສາ ແລະ ພັດທະນາປະເທດຊາດ

ກ້າວສູ່ປີ 2023 ຂໍໃຫ້ທຸກທ່ານຜາສຸກ ໂຊກດີ ແລະ ປະສົບຜົນສໍາເລັດໃນຊີວິດ ຄອບຄົວ ແລະ ວຽກງານໃຫຍ່ຫລວງກວ່າເກົ່າ.

ປີ 2022 ຜ່ານມາ, ໂດຍລວມແລ້ວສະພາບຢູ່ພາກພື້ນ-ສາກົນ ກໍຄືປະເທດພວກເຮົາໄດ້ຜະເຊີນຄວາມຫຍຸ້ງຍາກ ແລະ ສິ່ງທ້າທາຍນາໆປະການ ໂດຍສະເພາະຍັງສືບຕໍ່ໄດ້ຮັບຜົນກະທົບຈາກການແພ່ລະບາດ ຂອງພະຍາດໂຄວິດ-19 ແລະ ຄວາມຫຍຸ້ງຍາກດ້ານເສດຖະກິດການເງິນທີ່ໜັກໜ່ວງ. ແນວໃດກໍດີ, ສໍາລັບປະເທດລາວພວກເຮົາ, ດ້ວຍຄວາມເປັນນໍ້າໜຶ່ງໃຈດຽວຂອງທົ່ວພັກ ທົ່ວລັດ ແລະ ທົ່ວປວງຊົນລາວ ທັງຊາດ ແລະ ການສະໜັບສະໜູນຊ່ວຍເຫລືອຂອງເພື່ອນມິດສາກົນ ຈຶ່ງສາມາດແກ້ໄຂບັນຫາເຫລົ່ານັ້ນໄດ້ໂດຍພື້ນຖານ, ສາມາດສະກັດກັ້ນ ແລະ ປະຄັບປະຄອງບໍ່ໃຫ້ເກີດວິກິດການທີ່ຮ້າຍແຮງມາໄດ້ ອັນໄດ້ເຮັດໃຫ້ປະເທດຊາດມີສະຖຽນລະພາບດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບ, ເສດຖະກິດຄ່ອຍໆໄດ້ຮັບການຟື້ນຕົວຂຶ້ນຢ່າງຕໍ່ເນື່ອງ ເຊິ່ງໄດ້ສ້າງເງື່ອນໄຂຫລາຍດ້ານທີ່ຈະເຮັດໃຫ້ເສດຖະກິດຂອງປະເທດພວກເຮົາມີພື້ນຖານຈຳນວນໜຶ່ງເພື່ອເປັນທ່າແຮງກ້າວຂຶ້ນໃນປີຕໍ່ໆໄປ.

ສໍາລັບປີໃໝ່ 2023 ນີ້, ຕາມການຄາດຄະເນຂອງນັກວິເຄາະ ນັກສັງເກດການຫລາຍປະເທດ ລ້ວນແຕ່ມີຄໍາເຫັນຄ້າຍຄືກັນວ່າສະພາບການໂລກຍັງຈະຜະເຊີນຄວາມຫຍຸ້ງຍາກຫລາຍປະການ ໂດຍສະເພາະບັນຫາເສດຖະກິດການເງິນ, ນໍ້າມັນເຊື້ອໄຟ…ເຊິ່ງນັ້ນກໍໝາຍວ່າ ປະເທດພວກເຮົາກໍຍັງຈະສືບຕໍ່ຜ່ານຜ່າບັນດາສິ່ງທ້າທາຍ ແລະ ອຸປະສັກດັ່ງກ່າວຕື່ມອີກໃນຖານະສະມາຊິກຮ່ວມໂລກດຽວກັນທີ່ບໍ່ອາດຫລີກເວັ້ນໄດ້, ສໍາຄັນພວກເຮົາຕ້ອງ ເຊື່ອໝັ້ນຕໍ່ການນໍາພາຂອງພັກ-ລັດ, ມີຄວາມສາມັກຄີພາຍໃນເປັນປຶກແຜ່ນແໜ້ນໜາ, ດຸໝັ່ນ, ຫ້າວຫັນ, ອົດທົນ, ປະຢັດ… ຊຶ່ງໂອກາດປີໃໝ່ 2023, ທ່ານ ທອງລຸນ ສີສຸລິດ ປະທານປະເທດແຫ່ງສປປ ລາວ ໄດ້ຮຽກຮ້ອງປວງຊົນລາວທຸກຖ້ວນໜ້າທັງຢູ່ພາຍໃນ ແລະ ຕ່າງປະເທດຈົ່ງພ້ອມກັນສຸມທຸກສະຕິປັນຍາ, ເຫື່ອແຮງ ແລະ ກຳລັງໃຈເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດພວກເຮົາໃຫ້ບັນລຸຈຸດໝາຍທີ່ວາງໄວ້, ນໍາເອົາປະເທດຊາດໄປສູ່ບາດກ້າວໃໝ່ຂອງການພັດທະນາ ເຮັດໃຫ້ປະຊາຊົນມີຄວາມຜາສຸກຮົ່ມເຢັນ, ສັງຄົມນັບມື້ນັບມີຄວາມສະຫງົບ ເເລະ ສີວິໄລຢ່າງບໍ່ຢຸດຢັ້ງ.

ປີ 2023 ມາພ້ອມກັບກາລະໂອກາດທີ່ອໍານວຍ, ຕາມການຄາດຄະເນຍັງຈະມີສິ່ງທ້າທາຍບໍ່ໜ້ອຍທີ່ພວກເຮົາຕ້ອງເຂົ້າໃຈໃຫ້ເລິກເຊິ່ງພ້ອມກັນຕັດສິນໃຈຜ່ານຜ່າ, ສ້າງທ່າຫັນປ່ຽນທີ່ຕັ້ງໜ້າເພື່ອປົກປັກຮັກສາແລະ ພັດທະນາປະເທດຊາດໃຫ້ມີຜົນສໍາເລັດໃໝ່ ຕາມທິດກ້າວຂຶ້ນສັງຄົມນິຍົມຢູ່ປະເທດເຮົາ.