ປີ 2022 ຜ່ານມາ ບໍ່ແກ້ວຢຶດຢາບ້າໄດ້ 48,4 ລ້ານກວ່າເມັດ ຈັບຜູ້ຖືກຫາໄດ້ 136 ຄົນ

ທ່ານ ພັນໂທ ເນັງສີດາ ເບຣຍລືມົວ ຫົວໜ້າຫ້ອງການບັນຊາ ກອງບັນຊາການທະຫານແຂວງບໍ່ແກ້ວ ລາຍງານໃນກອງບັນຊາການທະຫານແຂວງບໍ່ແກ້ວໄດ້ຈັດກອງປະຊຸມສະຫຼຸບຖອດຖອນບົດຮຽນວຽກງານປ້ອງກັນຊາດຮອບດ້ານປະຈຳປີ 2022 ແລະ ວາງທິດທາງແຜນການປະຈຳປີ 2023 ວັນທີ 5 ມັງກອນ 2023 ຜ່ານມານີ້ວ່າ: ໃນໄລຍະ 1 ປີຜ່ານມາກອງບັນຊາການທະຫານແຂວງບໍ່ແກ້ວໄດ້ສຸມໃສ່ຈັດຕັ້ງປະຕິບັດຕາມສອງວາລະແຫ່ງຊາດສາມາດແກ້ໄຂປາກົດການຫຍໍ້ທໍ້ທີ່ເກີດຂຶ້ນພາຍໃນແຂວງສາມາດປະຕິບັດໄດ້ຄື: ຢຶດລົດເຖື່ອນຈໍານວນ 17 ຄັນ, ເຮືອບັນທຸກ2 ລໍາ, ມີຄະດີອາຍາເກີດຂຶ້ນ 39 ເລື່ອງ, ກັກຕົວຜູ້ຕ້ອງຫາໄດ້ 39 ຄົນຍິງ3 ຄົນ, ລົດຈັກ 5 ຄັນ, ລົດໄຖນາ2 ຄັນ, ມີຄະດີຢາເສບຕິດເກີດຂຶ້ນຈໍານວນ 94 ເລື່ອງ: ຜູ້ຖືກຫາ 136 ຄົນຍິງ 10 ຄົນ, ຢຶດຢາບ້າຈຳນວນ 48.437.108 ເມັດ, ຢາໄອ 591 ກິໂລກຣາມ, 29 ຫຼອດນ້ອຍ, ເຮໂລອິນ 759 ກຣາມ ແລະ 1 ຖົງນ້ອຍ, ຄາເຟອິນ 168 ກິໂລກຣາມ, ຜົງຂາວ 1 ຖົງ, ລົດໃຫຍ່ 6 ຄັນ, ລົດຈັກ 8 ຄັນ, ປືນສັ້ນ 2 ກະບອກ, ປືນແກັບ 7 ກະບອກ, ໂທລະສັບ 49 ເຄື່ອງ,ກົກຕົວຄົນເຂົ້າ-ອອກເມືອງຜິດກົດໝາຍ 444 ຄົນຍິງ122 ຄົນ.

ຈັດຕັ້ງກໍາລັງລົງກໍ່ສ້າງຮາກຖານການເມືອງຈໍານວນ 24 ຄົນ, ລົງຢູ່3 ເມືອງ 24 ບ້ານຈຸດສຸມແລະ1 ກອງປະຕິບັດງານ, ພ້ອມກັນນັ້ນໄດ້ຊີ້ນໍາແຕ່ລະກົມກອງຫັນລົງກໍ່ສ້າງຮາກຖານການເມືອງຕາມແບບມູນເຊື້ອຂອງກອງທັບຢ່າງຕັ້ງໜ້າ, ໂດຍສະເພາະແມ່ນບ້ານທີ່ໄດ້ແຮກສ່ຽວຢ່າງເປັນທາງການແລ້ວຈໍານວນ 11 ບ້ານກວມເອົາ5 ເມືອງ, ມີເມືອງນ້ອຍໃນຊົນນະບົດ1 ກຸ່ມບ້ານ, ມີ 248 ບ້ານປະກາດຮັບຮອງຄອບຄົວແລະບ້ານປ້ອງກັນຊາດເຂັ້ມແຂງໄດ້ 13 ບ້ານ.

ປັດຈຸບັນທົ່ວແຂວງມີບ້ານປ້ອງກັນຊາດເຂັ້ມແຂງ 29 ບ້ານ ພ້ອມກັນນັ້ນຜູ້ແທນກອງປະຊຸມໄດ້ສຸມສະຕິປັນຍາເຂົ້າໃນການຄົ້ນຄວ້າປະກອບຄຳຄິດເຫັນ, ແລກປ່ຽນບົດຮຽນດ້ວຍບັນຍາກາດຟົດຟື້ນ ແລະ ມີຄວາມໝາຍສຳຄັນຢ່າງເລິກເຊິ່ງເພື່ອປັບປຸງແກ້ໄຂວຽກງານປ້ອງກັນຊາດຮອບດ້ານກໍຄືປັບປຸງກໍ່ສ້າງພັກ-ພະນັກງານ, ກໍ່ສ້າງກຳລັງປະກອບອາວຸດທ້ອງຖິ່ນແຂວງບໍ່ແກ້ວໃນທຸກດ້ານຕາມແນວທາງປ່ຽນແປງໃໝ່ຮອບດ້ານຢ່າງມີຫຼັກການຂອງພັກ, ຮັບປະກັນເຮັດໃຫ້ກຳລັງປະກອບອາວຸດທ້ອງຖິ່ນຮາກຖານມີຄວາມສະຫງົບໂດຍພື້ນຖານ.