ເຕືອນ!! ການສັນຈອນທາງເມືອງປາກງື່ມໃຫ້ມີສະຕິລະມັດລະວັງ ເນື່ອງຈາກທາງເປ່ເພໜັກ ແລະ ພວມປັບປຸງແກ້ໄຂ

ອີງຕາມວິທະຍຸກະຈາຍສຽງແຫ່ງຊາດ ລາຍງານວ່າ: ເຈົ້າເມືອງປາກງື່ມ ນະຄອນຫລວງວຽງຈັນ ຮຽກຮ້ອງເຖິງຜູ້ໃຊ້ລົດໃຊ້ຖະໜົນຢູ່ເສັ້ນທາງ ເຂດເມືອງປາກງື່ມ ໃນໄລຍະນີ້ໃຫ້ມີສະຕິລະມັດລະວັງໃນການຂັບຂີ່ພາຫະນະປະເພດຕ່າງໆ, ເນື່ອງຈາກຫລາຍຈຸດພວມໄດ້ຮັບການປັບປຸງ ແລະ ບາງຈຸດຍັງເປ່ເພເສຍຫາຍໜັກ ເຊິ່ງອາດເຮັດໃຫ້ເກີດອຸບັດຕິເຫດໄດ້.

ທ່ານ ຄໍາໝູນ ຕຽງທະລາດ ເຈົ້າເມືອງປາກງື່ມ ໃຫ້ສຳພາດວ່າ: ປັດຈຸບັນພາກສ່ວນກ່ຽວຂ້ອງ ພວມດໍາເນີນການປັບປຸງສ້ອມແປງເສັ້ນທາງຢູ່ເຂດເມືອງປາກງື່ມໃຫ້ສາມາດສັນຈອນໄປ-ມາໄດ້ຢ່າງສະດວກ. ສະນັັັັັັັັັັັັັັັັັັັັັັັັ້ນ, ຈຶ່ງຮຽກຮ້ອງໃຫ້ປະຊາຊົນກໍຄືຜູ້ໃຊ້ລົດໃຊ້ຖະໜົນໄລຍະນີ້ໃຫ້ມີສະຕິລະມັດລະວັງໃນການຂັບຂີ່ພາຫະນະ ເນື່ອງຈາກບາງຈຸດພວມສ້ອມແປງແລະບາງຈຸດຍັງມີສະພາບເປເພເສຍຫາຍໜັກ ໂດຍສະເພາະເຂດບ້ານສົມສະຫວາດ ຫາຂົວບ້ານໄຮ່ ຫລາຍຈຸດຍັງເປ່ເພ ແລະ ເສັ້ນທາງເລກ 0120 ເຮັດໃຫ້ການສັນຈອນໄປມາມີຄວາມຫຍຸ້ງຍາກຫລາຍສົມຄວນ.

ທ່ານເຈົ້າເມືອງໃຫ້ຮູ້ຕື່ມວ່າ: ສຳລັບເສັ້ນທາງສາຍຫລັກທີ່ຜ່ານເມືອງປາກງຶ່ມມີສາມເສັ້ນທາງຄື: ເສັ້ນທາງຫລວງແຫ່ງຊາດເລກທີ 13 ໃຕ້, ເສັ້ນທາງເລກທີ 11 ໃຕ້ ແລະເສັ້ນທາງ ເລກທີ 0120 ທີ່ລັດອອກໄປຫາແຂວງວຽງຈັນ, ທັງສາມເສັ້ນທາງນີ້ ເປັນເສັ້ນທາງຍຸດທະສາດ ຖ້າສ້ອມແປງໃຫ້ມີສະພາບດີຈະເປັນທ່າແຮງຫນຶ່ງ ທີ່ສາມາດດຶງດູດການທ່ອງທ່ຽວໃຫ້ເມືອງປາກງື່ມໄດ້ເປັນຢ່າງດີ ນອກນີ້ຍັງອຳນວຍຄວາມສະດວກໃຫ້ການຂົນສົ່ງ ແລະການຜະລິດຂອງປະຊາຊົນພາຍໃນເມືອງໄດ້ຢ່າງສະກວກສະບາຍຂຶ້ນ.