ຄລອບ ພ້ອມແຍກທາງ ລີເວີພູລ ຖ້າເປັນຄົນເຮັດໃຫ້ທີມຕົກຕຳ່

ເຈີເກັນ ຄລອບ ຜູ້ຈັດການທີມ ລີເວີພູລ ພ້ອມແຍກທາງກັບ ລີເວີພູລ ເພື່ອສະແດງຄວາມຮັບຜິດຊອບ ຖ້າເປັນຄົນເຮັດໃຫ້ທີມຕົກຕຳ່.

ຄວັນຫລົງຫລັງຈາກເກມທີ່ ລີເວີພູລ ບຸກໄປເສຍໃຫ້ທີມອັນດັບ 10 ຂອງຕາຕະລາງເຊັ່ນ ເບຣນຟອດ ເຖິງສະໜາມ ຈີເທັກ ຄອມມິວນິຕີ ໃນເກມທຳອິດຂອງປີ 2023 ການແຂ່ງຂັນພຣີເມຍລີກ ອັງກິດ ເຮັດໃຫ້ ລີເວີພູລ ມີ 28 ຄະແນນຄືເກ່ົາ ຫລົ່ນໄປຢູ່ອັນດັບ 6 ຂອງຕາຕະລາງ ຕາມຫລັງອັນດັບ 4 ແມນເຊສເຕີ ຢູໄນເຕັດ 7 ຄະແນນ.

ຫລ້າສຸດ ເຈີເກັນ ຄອລບ ຜູ້ຈັດການທີມລີເວີພູລ ອອກມາເປີດເຜີຍວ່າ ຫາກລາວເປັນຕົ້ນເຫດທີ່ພາໃຫ້ລີເວີພູລສ້າງຜົນງານຕົກຕຳ່ ລາວກໍພ້ອມ ແຍກທາງກັບສະໂມສອນເພື່ອສະແດງຄວາມຮັບຜິດຊອບທັນທີ ໂດຍ ຄລອບ ລະບຸວ່າ : “ ເປັນທຳມະດາຂອງມະນຸດທີ່ຈະມີທັງໄລຍະເວລາທີ່ດີ ແລະ ບໍ່ດີ ເວລາເຮົາມີຄວາມສຸກ ຫົວໃຈເຮົາກໍຈະໃຫຍ່ ແຕ່ໃນເວລາຕົກຕຳ່ ມັນກໍຈະມີເລື່ອງໃຫ້ເວົ້າເຖິງຫລາຍຢ່າງ ແຕ່ມັນບໍ່ໄດ້ກວນໃຈຂ້ອຍດອກ ຂ້ອຍຮັບມືໄດ້ສະບາຍ ”.

“  ເຫັນໄດ້ຈະແຈ້ງຈາກການຢູ່ກັບ ໄມ ແລະ ດອດມຸນ ມາ 7 ປີ ແລະ ຕອນນີ້ ເປັນປີທີ 7 ກັບ ລີເວີພູລ ແລະ ຖ້າຂ້ອຍສັງເກດໄດ້ວ່າຂ້ອຍພາທີມ ເດີນທາງຜິດຫລັງຂ້ອຍເຮັດວຽກຜ່ານມາ 7 ປີ ຂ້ອຍນີ້ແຫລະຈະເປັນຄົນທຳອິດທີ່ໄປ ”.

ສຳລັບ ຄລອບ ເຄີຍບອກຈະອອກຈາກລີເວີພູລ ໃນປີ 2024 ເມື່ອສິ້ນສຸດສັນຍາສະບັບສຸດທ້າຍ ແຕ່ຫລັງຈາກນັ້ນກໍເຊັນສັນຍາໃຫມ່ເມື່ອຕົ້ນປີນີ້ ຈົນເຖິງປີ 2026.