ບົດຮຽນຈາກ ຫວຽດນາມ: ເສດຖະກິດດີ ທ່າມກາງເສດຖະກິດໂລກຖົດຖອຍ

ໃນໄລຍະສອງສາມປີທີ່ຜ່ານມາທົ່ວໂລກປະເຊີນໜ້າກັບເສດຖະກິດຖົດຖອຍ, ໄພເງິນເຟີ້ ໄພວ່າງງານຢ່າງໜັກ ແຕ່ຫວຽດນາມພັດເປັນປະເທດທີ່ສາມາດຂັບເຄື່ອນເສດຖະກິດໃຫ້ເຕີບໂຕໄດ້ເຊິ່ງເປັນທີ່ໜ້າສົນໃຈວ່າ ຍ້ອນຫຍັງ?

ການລະບາດຂອງພະຍາດໂຄວິດ 19 ແລະ ສົງຄາມ ໄດ້ເຮັດໃຫ້ທົ່ວໂລກພົບພໍ້ກັບບັນຫາຄວາມຫຍຸ້ງຍາກ ທາງດ້ານເສດຖະກິດ, ເງິນອ່ອນຄ່າ, ຄ່າຂອງຊີບສູງ, ຂາດແຄນນໍ້າມັນເຊິ່ງໄດ້ສົ່ງຜົນກະທົບຕໍ່ຊີວິດການເປັນຢູ່ຂອງປະຊາຊົນ ໂດຍສະເພາະໃນ ສປປ ລາວ ທີ່ເງິນກີບອ່ອນຄ່າຫຼາຍທີ່ສຸດເທົ່າທີ່ເຄີຍເປັນມາ.

ແຕ່ຢ່າງໃດກໍຕາມຫວຽດນາມໄດ້ກາຍເປັນປະເທດທີ່ສາມາດຂັບເຄື່ອນເສດຖະກິດຂອງຕົນໃຫ້ມີຄວາມເຕີບໂຕລື່ນໜ້າລື່ນຕາປະເທດອື່ນ, ພວກເຮົາມາເບິ່ງນຳກັນວ່າຍ້ອນສາເຫດໃດແດ່.

ອີງຕາມການສຶກສາຂອງທະນາຄານໂລກ ​ໃຫ້ຮູ້ວ່າ ເນື່ອງການປ່ຽນແປງສະຖານທີ່ການລົງທຶນເຊັ່ນ ເຄື່ອງອີເລັກໂຕຣນິກ ຈາກ ສປ ຈີນ ເນື່ອງຈາກນະໂຍບາຍການຫຼຸດຜ່ອນຜູ້ຕິດເຊື້ອໂຄວິດໃຫ້ເຫຼືອສູນ ແລະ ສະພາບທາງການເມືອງ ແລະ ນັກລົງທຶນຈາກສະຫະລັດອາເມລິກາ, ເອີຣົບ ແລະບາງປະເທດໃນອາຊີກໍເຊັ່ນດຽວກັນໄດ້ຍ້າຍຖານການຜະລິດ, ການລົງທຶນມາຍັງຫວຽດນາມທີ່ມີຄວາມພ້ອມໃນການເປັນສູນກາງການລົງທຶນ, ການຜະລິດ ເຄື່ອງ ອີເລັກໂທຣນິກ ແລະອື່ນໆ ອັນນີ້ໄດ້ກາຍເປັນປັດໄຈການກະຕຸ້ນການຂະຫຍາຍຕົວເສດຖະກິດຂອງຫວຽດນາມໄດ້ດີ.

ນອກນັ້ນ, ຈາກການປະຕິຮູບທາງດ້ານການສຶກສາ ເຮັດໃຫ້ຄວາມອາດສາມາດຂອງບຸກຄະລາກອນໃນຫວຽດນາມ ແມ່ນມີຄຸນນະພາບສູງ ແລະບວກໃສ່ກັບ ລັດຖະບານທີ່ລົງທຶນໃສ່ການພັດທະນາພື້ນຖານໂຄງລ່າງກ່ອນໜ້ານີ້ເຮັດໃຫ້ສາມາດກະຕຸ້ນເສດຖະກິດຂອງປະເທດໃນປີ 2022 ແລະ ໃນຊຸມປີຂ້າງໜ້າໄດ້ດີ.

ແລະເຖິງແມ່ນວ່າໃນປີ 2023​ ນີ້ຊ່ຽວຊານທົ່ວໂລກຕ່າງກໍເຫັນຄ້າຍຄືກັນວ່າເສຖະກິດຂອງໂລກຈະຍັງ ສືບຕໍ່ຖົດຖອຍ ແລະຫຍຸ້ງຍາກຕື່ມອີກ ເນື່ອງຈາກວ່າເສດຖະກິດທີ່ເປັນເສົາຫຼັກຂອງໂລກ ເຊັ່ນ ສປ ຈີນ, ສະຫະລັດອາເມລິກາ ແລະ ສະຫະພາບເອີຣົບມີທ່າທີຈະອ່ອນຕົວລົງ ແຕ່ເສດຖະກິດຂອງຫວຽດນາມອາດຍັງສາມາດປະຄັບ ປະຄອງໄດ້ເນື່ອງຈາກຄວາມສະຖຽນລະພາບຂອງເງິນດົ່ງ ທີ່ຍັງເປັນປະເທດເນື້ອຫອມຈາກນັດລົງທຶນ ແລະ ພ້ອມນັ້ນ ຄວາມສະຖຽນລະພາບຂອງເງິນດົງຍັງມາຈາກນະໂຍບາຍຂອງທະນາຄານແຫ່ງລັດ ຂອງຫວຽດນາມນຳໃຊ້ເງິນແຮເພື່ອການຊຳລະ ແລກປ່ຽນເງິນຕາຕ່າງປະເທດ ແລະທະນາຄານດັ່ງກ່າວຍັງຈະນຳໃຊ້ອັດຕາດອກເບ້ຍເພື່ອຊ່ວຍໃນການຫຼຸດຜ່ອນຄວາມສ່ຽງໄພເງິນເຟີ້ໃນອະນາຄົດຕື່ມອີກ.

ໃນໄລຍະ 9 ເດືອນຕົ້ນປີ 2022 ນັ້ນ ເງິນດົງອ່ອນຄ່າພຽງແຕ່ 4.4% ເຊິ່ງຖືວ່າຕໍ່າຫຼາຍຖ້າທຽບໃສ່ເງິນໂດລາ ແລະເງິນກີບພວກເຮົາ ແລະແນ່ນອນຫວຽດນາມຍັງມີນະໂຍບາຍອື່ນໆ ທີ່ປະກອບສ່ວນໃຫ້ເສດຖະກິດ ຂະຫຍາຍຕົວດີຄືແນວນີ້ ແລະ ທັງໝົດນັ້ນໄດ້ກາຍເປັນບົດຮຽນທີ່ດີແກ່ພວກເຮົາໃນການຖອດຖອນນຳຫວຽດນາມທີ່ເປັນເພື່ອນມິດທີ່ດີຂອງ ສປປ ລາວ.​

ໃນທ່າມກາງສະເສດຖະກິດພາຍໃນປະເທດເຮົາຍັງສືບຕໍ່ມີຄວາມຫຍຸ້ງຍາກໂດຍມີນາຍົກຜູ້ໃໝ່ເຂົ້າມາບໍລິຫານ ປະເທດກໍເຊື່ອແນ່ວ່າເພິ່ນຈະມີນະໂຍບາຍທີ່ຮັດກຸມສອດຄ່ອງກັບສະພາບຈຸດພິເສດຂອງປະເທດເຮົາ ຄຽງຄູ່ກັບການຖອດຖອນບົດຮຽນທີ່ດີຈາກປະເທດເພື່ອນມິດດັ່ງຫວຽດນາມເພື່ອແກ້ໄຂບັນຫາເສດຖະກິດຂອງປະເທດເຮົາກັບມາມີສະຖຽນລະພາບ ແລະ ໝັ້ນຄົງໂດຍໄວ.