ປີ 2022 ອົງການໄອຍະການປະຊາຊົນ ແຂວງອຸດົມໄຊ ສາມາດແກ້ໄຂຄຳຮ້ອງ ແລະ ຄະດີ ໄດ້ 61 ສະບັບ
ກອງປະຊຸມສະຫລຸບວຽກງານຂອງອົງການໄອຍະການປະຊາຊົນ ແຂວງອຸດົມໄຊ ປະຈໍາປີ 2022 ແລະ ທິດທາງແຜນການ ປີ 2023 ໄດ້ມີຂຶ້ນໃນວັນທີ 5 ມັງກອນ 2023, ໂດຍການເປັນປະທານຂອງ ທ່ານ ບຸນທ່ຽງ ວິໄລວົງ ຫົວໜ້າອົງການໄອຍະການປະຊາຊົນ ແຂວງອຸດົມໄຊ, ມີຕາງຫນ້າອົງການໄອຍະການປະຊາຊົນ ເຂດ 1, ເຂດ 2 ແລະ ພະນັກງານພາຍໃນອົງການໄອຍະການປະຊາຊົນແຂວງເຂົ້າຮ່ວມ.
ຕະຫລອດໄລຍະ 1 ປີຜ່ານມາ, ອົງການໄອຍະການປະຊາຊົນ ແຂວງອຸດົມໄຊ ສາມາດແກ້ໄຂຄຳຮ້ອງ ແລະ ຄະດີ ໄດ້ທັງໝົດ 61 ສະບັບ ເທົ່າກັບ 100%, ແກ້ໄຂຄະດີ ສຳເລັດ 229 ເລື່ອງ ເທົ່າກັບ 95,81%, ພວມແກ້ໄຂ 10 ເລື່ອງ ເທົ່າກັບ 4,19%; ວຽກງານຕິດຕາມກວດກາທົ່ວໄປ ໄດ້ປະຕິບັດຄຳຕັດສິນຂອງສານ ສະເພາະຄະດີອາຍາ ມີທັງໝົດ 735 ເລື່ອງ ປະຕິບັດສຳເລັດ 51 ເລື່ອງ, ພວມຄົ້ນຄວ້າ 684 ເລື່ອງ ແລະ ພວມປະຕິບັດ 620 ເລື່ອງ, ບໍ່ສາມາດປະຕິບັດໄດ້ 64 ເລື່ອງ, ຄະດີແພ່ງ ມີທັງໝົດ 74 ເລື່ອງ, ປະຕິບັດແລ້ວ 3 ເລື່ອງ, ພວມຄົ້ນຄວ້າ 71 ເລື່ອງ, ພວມປະຕິບັດ 61 ເລື່ອງ, ບໍ່ສາມາດປະຕິບັດໄດ້ 10 ເລື່ອງ, ກວດກາຄຳຖະແຫລງ ຂອງອົງການໄອຍະການປະຊາຊົນເຂດ ສຳເລັດ 14 ເລື່ອງ ເທົ່າກັບ 100%, ກວດກາ ຄຳຕັດສິນ ແລະ ຄຳພິພາກສາຂອງສານ, ຄະດີທີ່ສານຕັດສິນ, ການເກັບກຳສະຖິຕິອາດຊະຍາກຳ, ການປະຕິບັດກົດຫມາຍ ຂອງອົງການສືບສວນ-ສອບສວນ, ການປະຕິບັດກົດຫມາຍ ໃນການດໍາເນີນຄະດີຢູ່ສານ, ຄ້າຍຄຸມຂັງ-ດັດສ້າງ, ຍົກໃຫ້ເຫັນ ວຽກງານບໍລິຫານ ແລະ ຄຸ້ມຄອງ, ແຜນການ-ການເງິນ ແລະ ວຽກງານຂາເຂົ້າ-ຂາອອກ ຕື່ມອີກ.
ສຳລັບແຜນການເຄື່ອນໄຫວຈັດຕັ້ງປະຕິບັດວຽກງານຮອບດ້ານ ປີ 2023 ແມ່ນຈະໄດ້ສຸມໃສ່ແຕ່ລະບັນຫາທີ່ຍັງຄົງຄ້າງໃນການຈັດຕັ້ງປະຕິບັດວຽກງານຜ່ານມາ ແລະ ທິດທາງແຜນການທີ່ຈະສືບຕໍ່ເຄື່ອນໄຫວໃນຕໍ່ໜ້າ ໂດຍແນ່ໃສ່ເຮັດໃຫ້ການຈັດຕັ້ງປະຕິບັດວຽກງານ ຂອງອົງການໄອຍະການປະຊາຊົນ ແຂວງ ມີປະສິດທິພາບ ແລະ ມີຜົນສຳເລັດຕາມລະດັບຄາດໝາຍ.
